20
1 Dai Madu gaw Mawshe hku nna
2 Israela amyu masha ni hpe ning ngu tsun na matu hkang da wu ai: ?Nanhte hta na kadai rai ti mung, nanhte hta hkan nang nga ai maigan masha kadai rai ti mung Molek hpara hpe nawng jau ai hta tinang a kashu kasha ni hpe jaw ya ai wa kadai hpe mung shawa masha ni a man e nlung hte kabai sat kau ai hkrum na ra ai.
3 Tinang a kashu kasha ni hpe dai Molek hpara hpe nawng ya nhtawm nye a chyoi pra ai Sum hpe matsat shabat di let, nye a chyoi pra ai mying ningsang hpe jahpoi asawng ai wa kadai hpe mung ngai hpyen tai nna, dai wa hpe nye a amyu masha ni hta na sumri dan kau na we ai.
4 Rai ti mung shi galaw ai amu hte maren dai wa hpe shawa hpung ni hpa n nawn ai sha, si ari n jaw ai rai yang,
5 dai wa hte shi a dinghku masha ni hpe mung, ngai hta sadi n dung ai sha shi hte matut mahkai nna Molek hpara hpe nawku ai ni yawng hpe mung ngai hpyen tai nna shi hpe nye a amyu masha ni hta na sumri dan kau na we ai.
6 ?Si mat sai ni a wenyi ni hte ga shaga hkrum ai masha ni hpang de hpaji sa hpyi na matu marai langai ngai sa ai rai yang, ngai shi hpe hpyen tai nna shi hpe nye a amyu masha ni hta na sumri dan kau na we ai.
7 Nanhte a hkum ni hpe shachyoi shapra nga mu, hpa majaw nga yang ngai gaw dai Madu nanhte a Karai Kasang rai nga nngai.
8 Nye a tara ni hpe hkan sa madat mara mu; ngai gaw nanhte hpe shachyoi shapra ai dai Madu rai nga nngai.
9 Dai Madu gaw ndai hkan sa na tara lam ni hpe jaw ya wu ai; kadai rai tim tinang kanu kawa hpe matsa ai wa gaw si ai hkrum na rai wu ai. Shi gaw shi a si hkrung si htan a matu lit lu nga ai.Ref 20:9: Pru 21:17; Mat 15:4; Mrk 7:10.
10 Israela amyu masha hta na manang wa a madu jan hte num shaw amu shut hkat ai wa gaw shi shaw ai num hte rau sat kau ai hkrum na rai wu ai.Ref 20:10: Pru 20:14; Jaw 18:20; Trj 5:18.
11 Tinang kawa a madu jan hte nga sha ai wa gaw kawa hpe sari jahpoi ya nga ai rai nna shan lahkawng sat kau ai hkrum na rai ma ai. Shan gaw si hkrung si htan a matu lit lu nga ma ai. Ref 20:11: Jaw 18:8; Trj 22:30, 27:20.
12 Tinang kanam hte nga sha ai rai yang, shan lahkawng sat kau ai hkrum na rai ma ai. Shan lahkawng gaw jauwawng amu shut hpyit nga ma ai majaw si hkrung si htan a matu shan hta lit lu nga ma ai. Ref 20:12: Jaw 18:15.
13 Lasha shada da kanawn ai rai yang, shan gaw matsat shabat amu galaw kau nga ma ai majaw shan lahkawng sat kau ai hkrum na rai ma ai. Ref 20:13: Jaw 18:22.
14 Masha langai ngai gaw shi a shayi sha hte shi a kanu hpe la ai rai yang, dai gaw ladu lai nna n shawp ai lam rai nga ai majaw nanhte hta dai zawn re ai n nga lu myit ga, shanhte masum hpe wan nat kau na rai nga ai. Ref 20:14: Jaw 18:17; Trj 27:23.
15 Dusat hte kanawn ai rai yang shi hte hpawn dusat hpe mung sat kau na rai nga ai. Ref 20:15-16: Pru 22:19; Jaw 18:23; Trj 27:21.
16 Dusat hte kanawn lu na matu numsha mahtang shakut ai rai yang, shi hte dusat hpe sat kau na rai myit dai. Shan gaw si hkrung si htan a matu lit lu nga ma ai.
17 Masha langai ngai shi a kajan shing n rai kanu kaga ga rai tim kawa pawng ai kajan hpe la ai rai yang, dai gaw shawa man e kaya kahpa lam rai nga ai majaw shawa hpung kaw na gawt shapraw kau hkrum na rai ma ai. Shi mahtang shi a kajan hte nga sha kau nu ai majaw de a mara hpe hkam sha lu na rai wu ai.Ref 20:17: Jaw 18:9; Trj 27:22.
18 Num hking lang nga ai numsha hte kanawn ai rai yang, shan lahkawng gaw n san n seng ai tara ni hpe tawt lai kau manu ai majaw shan lahkawng shawa hpung hta na gawt shapraw kau ai hkrum na rai ma ai.Ref 20:18: Jaw 18:19.
19 Marai langai ngai gaw shi a kamoi hte kanawn ai rai yang shan lahkawng jauwawng wawng ai majaw de a mara hkam sha lu na rai wu ai.
20 Marai langai ngai gaw shi a kanu tung hte kanawn ai rai yang, dai wa gaw shi a kawa di hpe sari jahpoi ya nga ai majaw ari jaw ai hkrum nna kashu kasha mung shaprat na ma ai n rai.Ref 20:20: Jaw 18:12-14.
21 Marai langai ngai gaw naw hkrung nga ai tinang a kahpu kanau wa a madu jan hpe la ai rai yang, shan gaw kashu kasha n shaprat ai sha si mat na rai ma ai. Shi gaw matsat shabat amu galaw kau nu ai hte shi a kahpu kanau wa hpe sari jahpoi ya nu ai. Ref 20:21: Jaw 18:16.
22 Dai Madu gaw, ?Nye a tara ni hte hkang da ai ga ni yawng hpe hkan sa shadik shatup mu; shaloi nanhte hpe ngai woi wa ai Hkanan mung de shang wa lu na matu ningdang kau hkrum na myit dai n rai.
23 Nanhte shang sha lu na mung hta nga ai tara maigan masha ni hpe ngai gawt shapraw kau na amyu ni a htung lailen hta hkum hkan nang nga myit. Shanhte gaw shanhte a n hkru n shawp ai arawn alai ni yawng hte nye a man e matsat shabat amu galaw kau manu ai.
24 Rai ti mung dai ngamu ngamai ai sut hte ga sau hpring nna ningru ningja ai mung hpe nanhte madu la na matu ngai nanhte hpe jaw na ngu nna ga sadi tawn da ni ai. Ngai gaw dai Madu nanhte a Karai Kasang rai nga nngai majaw kaga amyu ni kaw na nanhte hpe jahka jasan la ni ai.
25 Dai re ai majaw san seng ai hte n san n seng ai ashu ashan, san seng ai ntsa malen u ni hte n san n seng ai ni hpe chye ginhka lu na rai myit dai. N san n seng ai ashu ashan hte ntsa malen u ni hpe sha lu na myit dai n rai. Dai ni hpe n san n seng ai ngu nna ngai tsun da ni ai majaw dai ni hpe sha ai rai yang, nanhte hpe n san n seng shangun na rai nga ai.
26 Nanhte chyawm gaw chyoi pra nna ngai madu da ai amyu tai lu na rai myit dai; ngai gaw dai Madu rai nga nngai rai nna chyoi pra nga nngai hte amyu gale ni kaw na jahka da ma sade ai majaw ngai hte sha seng ai ni rai nga myit dai.
27 ?Si mat sai masha ni a wenyi hte ga shaga ai numsha lasha kadai mung nlung hte kabai sat kau ai hkrum na rai wu ai; dai zawn re ai amu galaw ai wa gaw shi a si hkrung si htan lam a matu lit lu nga wu ai.