8
1 Ya Elisha gaw shi asak jahkrung ya yu sai ma kanu ngu na Shunem mare na numsha hpe ndai mung e dai Madu gaw sanit ning tup hkuwa wa shangun na rai nu ai majaw shi hte shi a dinghku masha ni hpe shara ra de sa shanu nga na matu tsun wu ai. Ref 8:1: 2Hk 4:8-37.
2 Dai numsha mung shi a matsun maroi ga ni hte maren, shi a dinghku masha ni hte rau Hpilisti mung e sanit ning tup sa shingbyi nga ai.
3 Ya sanit ning htum jang, shi gaw Israela mung de bai nhtang wa nhtawm shi a nta hte lamu ga bai jaw ya na matu sa hpyi na nga, hkawhkam wa kaw sa wa wu ai.
4 Elisha a shangun ma Gehazi hte ga shaga nga ai hkawhkam wa hpe shi sa mu wu ai. Hkawhkam wa chyawm gaw Elisha galaw ai mauhpa lamik kumla hte seng ai lam ni hpe chye la mayu nga wu ai.
5 Gehazi gaw hkawhkam wa hpe Elisha gaw si mat sai masha langai mi hpe kaning rai jahkrung da sai lam tsun dan nga yang, numsha wa mung hkawhkam wa kaw hpyi lajin nga wu ai. Shaloi Gehazi gaw hkawhkam wa hpe, ?Madu hkawhkam e, ndai numsha hte ndai ma mung Elisha jahkrung ya ai shi a kasha rai nga ai!,? ngu nna tsun wu ai.
6 Hkawhkam wa san ai ga san hpe htai na matu Gehazi tsun dan ai maumwi hpe dai numsha mung tsun shagrin sakse hkam ya nga ai rai nna, hkawhkam wa mung du langai mi hpe shaga la nhtawm dai numsha hkawm mat wa ai sanit ning laman shi a yi hkauna hta na pru ai nsi naisi yawng a manu hte hpawn shi hte seng maseng arai magup hte hpe nhtang ya na matu tsun wu ai.
7 Suri Hkawhkam Benhadad machyi nga ai aten hta, Elisha gaw Damasku mare de sa du wu ai. Dai yang e, Elisha nga nga ai lam hkawhkam wa hpe tsun dan mu ai rai nna,
8 shi gaw shi a du salang ni hta na langai mi rai nga ai Hazaela hpe, ?Myihtoi wa hpang de kumhpa la gun nhtawm ngai hkam kaja wa na nngai kun? N kaja na nngai kun?, mahtai tam shapraw lu na matu dai Madu kaw san yu na shi hpe san yu u,? ngu nna tsun dat wu ai.
9 Dai rai nna Hazaela mung Damasku mare hta pru ai kaja htum ai arai baw hkum sumhpa yawng hpe gawla-uk mali shi hta htaw nhtawm Elisha hpang de sa wa wu ai. Hazaela mahtang shi hte hkrum jang shi gaw, ?Na a shangun ma Hkawhkam Benhadad shi hkrum sha nga ai machyi makaw ana ahkya kaw nna mai tsai wa na, n mai tsai wa na lam, nang kaw sa san shangun ai,? ngu nna tsun wu ai.
10 Elisha gaw, ?Dai Madu ngai hpe madun dan ai hte maren, shi si na rai wu ai rai ti mung, shi kaw sa nna shi bran wa lu na lam tsun u,? ngu nna htan wu ai.
11 Dai hpang Elisha gaw Hazaela myit ru myit tsang mat wa ai aten du hkra, shi a myi man hpe hkrit kajawng shangun ai nsam hte azi yu da wu ai. Elisha mung akajawng sha myi prwi ni pru wa nga ai.
12 Hazaela gaw, ?Nang hpa majaw hkrap nga n ta?,? ngu nna san wu ai.
Elisha chyawm gaw, ?Israela amyu masha ni hpe nang galaw na ra ai hkrit kajawng hpa amu ni a lam hpe ngai chye nga nngai. Nang gaw shanhte a hpyen dap ni hpe nat kau ya nhtawm wa ngan shabrang ni hpe sat sharu kau nna shanhte a ma kaji ni hpe gumpye sat ai hte na-um nasin re ai numsha ni hpe kan ga kau ya na rai myit dai majaw re,? ngu nna htan wu ai.
13 Hazaela gaw, ?Ngai hpa n rai nga nngai mi, kaning rai daru magam n-gun rawng wa lu na rai nga a ta?,? ngu nna san wu ai.
Elisha gaw, ?Nang Suri hkawhkam tai wa na rai nga ai gaw, dai Madu ngai hpe madun dan nga sai,? ngu nna tsun htang wu ai. Ref 8:13: 1Hk 19:15.
14 Hazaela gaw Benhadad hpang de nhtang wa wu yang, ?Elisha kaning nga tsun a ta?,? ngu nna shi hpe hkap san wu ai.
Bai Hazaela gaw, ?Nang teng teng hkam kaja wa lu na ndai, nga nna shi ngai hpe tsun ai,? ngu nna htan wu ai.
15 Rai ti mung hpang shani e, Hazaela gaw nba langai la nna hka hta madit la let hkawhkam wa hpe ka-up marit ya wu ai.
Hazaela gaw shi a hkaw tingnyang hta galai dung nna hkawhkam tai wa sai.
(2Hl 21: 1-20)
16 Israela Hkawhkam Ahab a kasha Yoram hkaw dung ai manga ning hta Yuda Hkawhkam Yehoshahpat a kasha Yehoram mung
17 shi a asak sumshi lahkawng ning hta Yuda hkawhkam tai wa nga sai. Shi gaw Yerusalem mare hta matsat ning hkaw dung let up hkang nga ai.
18 Shi a madu jan mahtang Ahab a shayi sha rai nga ai majaw Ahab a dinghku masha ni zawn Israela hkawhkam ni a lam hkan nna dai Madu a man e shut hpyit ai amu galaw nga ma ai.
19 Rai ti mung dai Madu gaw shi a shangun ma Dawi hte shi a amyu matu ni tut nawng matut up nga mu ga, nga nna shi hte ga sadi tawn da nu ai majaw Yuda mung hpe n jahten kau mayu nga wu ai. Ref 8:19: 1Hk 11:36.
20 Yehoram hkaw dung ai laman hte yang, Edom gaw Yuda hpe gumlau wu ai rai nna shanglawt lu ai mungdan tai wa sai. Ref 8:20: Nin 27:40.
21 Dai rai nna Yehoram gaw shi a hpyen leng ni mahkra hte rau Zara mare de rawt sa wa ai; dai yang e, Edom hpyen luksuk ni shanhte hpe wang shinggrup da ma ai. Shana e shi hte shi a hpyen leng ni hpe up hkang ai du ni hte hparan lajang gasat dat mu yang, shanhte hprawng lawt mat wa nna shi a hpyenla ni mung tinang nang a nta de hprawng bra mat wa ma ai.
22 Dai aten kaw nna Edom gaw Yuda hpe dai ni du hkra gumlu gumlang rai gumlau nga ai. Dai aten e nan Libna mare mung gumlau rawt nga ai.
23 Yehoram galaw nu ai amu magup hpe Yuda Hkawhkam ni a Labau Laika hta ka matsing da nga ai.
24 Yehoram si mat sai rai nna, Dawi a Mare na hkawhkam ni a lupwa shara hta lup makoi da mu ai; shi a kasha Ahazia gaw shi a hkang hta hkaw dung nna hkawhkam tai wa sai.
(2Hl 22:1-6)
25 Israela Hkawhkam Ahab a kasha Yoram hkaw dung ai shi lahkawng ning hta Yehoram a kasha Ahazia mung shi a asak hkun lahkawng ning hta
26 Yuda hkawhkam tai wa sai rai nna Yerusalem mare e laning mi hkaw dung let up hkang nga ai. Shi a kanu gaw Hkawhkam Ahab a shayi sha Ahtalia rai nna Israela Hkawhkam Omri a kashu shayi sha rai nga ai.
27 Ahazia gaw Hkawhkam Ahab hte mayu dama daw hkrang nga ai majaw Ahab a dinghku masha ni galaw shut ai zawn shi mung dai Madu hpe shut hpyit kau nga ai.
28 Hkawhkam Ahazia gaw Israela Hkawhkam Yoram hte matut nna Suri Hkawhkam Hazaela hpe majan gasat wu ai. Dai hpyen luksuk ni gaw Gilead mung Ramot mare hta gasat hkat ma ai rai nna Yoram gaw dai majan hta hkala hkrum mat wu ai.
29 Shi a ningma ni hpe shamai shatsai la na matu Yezrela mare de nhtang wa ai rai nna, Ahazia mung dai de sa let shi kaw sa chyai ai hte hpu yu wu ai.