20
(Esa 38:1-8, 21, 22; 2Hl 32:24-26)
1 Dai aten hte yang, Hkawhkam Hezekia gaw machyi hkrum ai hte ganoi noi si mat hkra rai nga wu ai. Amot a kasha Esaia gaw shi hpe sa hkrum nna, ?Nang gaw bai kaja wa sana n rai sai majaw lam shagu hpe kup kup tsup tsup lajang tawn nhtawm si na matu jin jin di da u, nga nna dai Madu nang hpe tsun nga ai,? ngu nna shi hpe tsun wu ai.
2 Hezekia gaw shakum maga de myi man yawng nna akyu hpyi wu ai:
3 ?Madu e, ngai gaw nang hpe kangka ai hte sadi dung let daw jau ni ai; nang ra sharawng ai hpa lam hta rai ti mung ngai tut nawng shakut shaja galaw ai amu ni hpe dum ya e law.? Shi gaw ahkup ahka nga mat hkra hkrap let hpyi nem wu ai.
4 Esaia gaw hkawhkam wa kaw nna pru mat wa wu ai, rai ti mung shi gaw hkawhkam wang ka-ang hku garai n lai di mat wa yang, dai Madu a amyu masha ni a mung du Hezekia hpang de nhtang sa wa na matu Esaia hpe hkang dat nna,
5 shi hpe, ?Na a nji nwa Dawi a Karai Kasang ngai Madu nan na a akyu hpyi ai ga hpe na ni ai; na a myi prwi ngai mu se ai; Ngai gaw nang hpe masum ya laman shamai ya na de ai; shaloi Nawku Htingnu de nang sa lu na rai ndai.
6 Ngai gaw nang hpe shi manga ning naw jahkrung da na nngai; ngai gaw nang hpe mung, ndai Yerusalem mare hpe mung, Asuri hkawseng wa a lata kaw nna mawai la na made ai. Ngai hkum nan a arawng sadang majaw mung, nye a shangun ma Dawi hpe jaw ya ai ga sadi a majaw mung, ndai mare hpe ngai makawp maga na we ai,? ngu nna tsun wu ai.
7 Dai hpang Esaia gaw hkawhkam wa a ali ama ni hpe maihpang si gumpa mi la wa nhtawm shi a shakrwi hta up ya na tsun wu ai; shing rai shi mai tsai wa wu ai.
8 Hkawhkam Hezekia gaw, ?Dai Madu ngai hpe shamai shatsai ya nna masum ya a hpang e Nawku Htingnu de ngai sa lu na nngai ngu ai gaw kaning re sakse kumla dan pru na rai ta?,? ngu nna san wu ai.
9 Esaia gaw, ?Shi a ga sadi hpe shi shatup na ra ai sakse kumla gaw dai Madu nang hpe jaw ya na ra ai. Ya shingna gaw shawng de n-gam shi sit lung wa na shing n rai n-gam shi hpang de htingnut wa na hpe nang sharawng awng nga n ni?,? ngu nna tsun htang wu ai.
10 Hezekia chyawm gaw, ?Shingna hpe n-gam shi sit lung wa shangun na loi nga ai, n-gam shi hpang de htingnut shangun u,? ngu nna htan wu ai.
11 Esaia gaw dai Madu kaw akyu hpyi nga wu ai rai nna dai Madu gaw Hkawhkam Ahaza sharawt da ai lakang hta shingna n-gam shi hpang de htingnut kau shangun dat wu ai.
(Esa 39:1-8)
12 Dai aten daram hta nan Baladan a kasha Babelon Hkawhkam Merodak Baladan gaw Hkawhkam Hezekia machyi nga ai hpe na wu ai majaw shi hpang de laika hte kumhpa shagun dat wu ai.
13 Hezekia mung dat kasa ni hpe atsawm sha hkalum la nhtawm shanhte hpe shi a sut gan ni rai nga ai aja gumhpraw, manam pyaw ai baw namji namya hte manam hawm ai sau hte shi a hpyen laknak madun ai shi a sut gawk ni hte shi a mungdan shara shagu hkan nga ai arai yawng mayawng hpe madun dan wu ai. Shi n madun dan ai gaw shara mi pyi n nga nga lu ai.
14 Dai hpang myihtoi Esaia gaw Hkawhkam Hezekia hpang de sa nna, ?Ndai masha ni gaw kanang na du sa wa ai ni rai nga ma ta? Shanhte gaw nang hpe hpa lam sa tsun nga ma ni?,? ngu nna san yu wu ai.
Hezekia gaw, ?Shanhte gaw grai tsan la ai Babelon mung kaw nna du sa ai ni rai nga ma ai,? ngu nna htan wu ai.
15 ?Shanhte gaw ndai hkawhkam htingnu kata hta hpa baw mu la ma ni?? ?Shanhte gaw arai mahkra hpe guji guyang mu la masai. Shanhte hpe ngai n madun ai sut gawk kata na arung arai hpa mung n nga sai.?
16 Esaia gaw hkawhkam wa hpe, ?Chyahtum Chyalai n-gun rawng ai dai Madu gaw
17 na a hkawhkam htingnu kata hta rawng marawng arai ni mahkra hte, na nji nwa ni dai ni du hkra mahkawng da nga ai arung arai ni hpe Babelon mung de htawm mat wa ai hkrum nna hpa mung n ngam da ya ai aten du na ra ai.
18 Nang hte ading tawk seng ai amyu matu ni mung woi wa ai hkrum nna Babelon hkawhkam htingnu hta e daw jau ai amu galaw na matu unuk tai na mara ai,? ngu nna tsun wu ai. Ref 20:18: 2Hk 24:14-15; Dan 1:1-7.
19 Hkawhkam Hezekia gaw shi a prat hta ngwi pyaw sim sa ai hte shim lam nga nga sana re hpe shi chye na wu ai majaw, shi gaw, ?Ngai hpe nang jaw ya ai dai Madu kaw na mungga gaw mai kaja nga ai,? ngu nna tsun htang wu ai.
(2Hl 32: 32-33)
20 Hkawhkam Hezekia galaw ai amu magup ngu na shi a share shagan ai sat lawat ni, hka lawng hte hka hkawng hpe shi kaning rai galaw nna mare kata de hka shalen ai lam ni hpe Yuda Hkawhkam ni a Labau Laika hta ka matsing da nga ai.
21 Hezekia si mat sai rai nna, shi a kasha Manashe mahtang shi a hkang hta hkaw dung let hkawhkam tai wa sai.