2
1 Dai Madu gaw Elia hpe bungsha hte sumsing lamu de shalun la hkrum na aten du ai shaloi, Elia hte Elisha yan Gilgala mare kaw nna pru sa wa ma ai;
2 hkrun lam e hkawm nga yang, Elia gaw Elisha hpe, ?Ya nang e naw hkring nga u; dai Madu ngai hpe Behtela mare de sa wa na matu hkang da nga sai,? ngu nna tsun wu ai.
Rai ti mung Elisha mahtang, ?Ngai nang hpe n kau da na nngai gaw ahkrung nga ai dai Madu hta ngai sadi dung nga nngai hte maren, nang hpe dagam nngai,? ngu nna htan wu ai. Dai rai nna shan lahkawng Behtela mare de matut sa mat wa ma ai.
3 Dai yang e nga ai myihtoi hpung mi gaw Elisha hpang de sa nna shi hpe, ?Dai Madu gaw na a madu hpe nang kaw na dai ni jang woi la na hpe nang chye da wu ni?,? ngu nna san mu ai.
Shaloi Elisha gaw, ?Rai sa ngai chye nngai; rai ti mung de a lam anhte n tsun jahta ga,? ngu nna htan wu ai.
4 Elia gaw Elisha hpe, ?Ya ndai yang e nga nga u; Yerihko mare de sa wa na matu dai Madu ngai hpe hkang dat wu ai,? ngu nna tsun wu ai.
Rai ti mung Elisha gaw, ?Ahkrung nga ai dai Madu hte nang hpe ngai dagam nngai hte maren, ngai nang hpe n kau da na nngai,? ngu nna htan wu ai. Shing rai shan lahkawng gaw Yerihko mare de sa mat wa ma ai.
5 Dai yang e nga ai myihtoi hpung mi gaw Elisha kaw sa nna shi hpe, ?Dai Madu gaw na a madu hpe nang kaw na dai ni jang woi la na hpe, nang chye da wu ni?,? ngu nna san mu ai.
Elisha mung, ?Rai sa, ngai chye nngai; rai ti mung de a lam anhte n tsun jahta ga,? ngu nna htan wu ai.
6 Dai hpang Elia gaw Elisha hpe, ?Ya nang e naw hkring nga u: dai Madu gaw ngai hpe Yawdan hka de sa wa na matu hkang da ni ai,? ngu nna tsun wu ai.
Rai ti mung Elisha chyawm gaw ngai nang hpe n kau da na ngu ngai gaw ahkrung nga ai dai Madu hte nang hta sadi dung nga nngai hte maren dagam nngai,? ngu nna htan wu ai. Shing rai shanhte matut hkawm mat wa yang,
7 myihtoi manga shi mung Yawdan hka du hkra shan kaw hkan nang nga ma ai. Elia hte Elisha yan hka kau e hkring nga jang, myihtoi manga shi hte mung tsan tsan e tsap nga ma ai.
8 Dai hpang Elia gaw shi a ntsa palawng hpe raw katsu nhtawm dai hte hka kayat dat wu ai rai nna hka lahkawng brang rai garan mat ai. Shaloi shi hte Elisha mung hka wora hkran de hkun hkraw ai ga ntsa hku rap lai mat wa ma ai.
9 Dai yang e Elia gaw Elisha hpe, ?Ngai woi la ai garai n hkrum yang, na a matu ngai hpa galaw ya ra ai lam ngai hpe tsun dan e,? ngu nna tsun wu ai.
Shaloi Elisha gaw, ?Ngai hpe na a hkringhtawng dagraw la shangun nhtawm nang hta rawng ai wenyi daru magam n-gun kamhtaw htam lahkawng ngai hpe lu la shangun e law,? ngu nna htan wu ai. Ref 2:9: Trj 21:17.
10 Elia mahtang, ?Dai gaw jaw ya na matu yak la ai lam hpe hpyi nga ndai. Rai ti mung, na a man kaw na ngai woi la kau hkrum ai hpe nang mu jang dai hpe nang lu la na rai ndai; ngai hpe n mu kau dat ai rai yang, dai hpe nang lu la na ndai n rai,? ngu nna tsun htang wu ai.
11 Shan lahkawng tsun chyai let naw hkawm nga ma yang, wan gumra ni garawt ai wan leng gaw shan a lapran e akajawng sha pru wa nhtawm Elia gaw bungsha hte sumsing lamu de lung mat wa wu ai.
12 Elisha gaw dai hpe mu nna Elia hpe, ?Nye a wa e, nye a wa e! Israela hpe chyalai n-gun hte makawp maga ai wa e! Nang gaw hkawm mat wa nit hka!,? ngu nna jahtau tsun wu ai. Shing rai Elia hpe shi galoi mung bai n mu lu mat nu ai.
Elisha chyawm gaw yawn ai myit hte shi a ntsa palawng hpe lahkawng brang di nna gang je kau wu ai. Ref 2:12: 2Hk 13:14.
13 Dai hpang shi gaw Elia kaw na hkrat wa ai ntsa palawng hpe hta la nna nhtang wa nhtawm Yawdan hka hkin-gau e tsap nga ai.
14 Shi gaw Elia kaw na ntsa palawng hte hka hpe kayat nhtawm, ?Dai Madu Elia a Karai Kasang kanang nga nga a ta?,? ngu nna san wu ai. Dai hpang hka dai hpe bai kayat dat wu yang, hka gaw gade nde garan mat wa nna shi mung wora hkran maga mi de rap mat wa wu ai.
15 Yerihko mare na myihtoi manga shi gaw shi hpe mu nna, ?Elia a daru magam n-gun gaw Elisha a ntsa e nga nga a hka!,? ngu nna tsun ma ai. Shi hte hkrum na nga shanhte sa wa nhtawm shi a man e dingnyawm dagup let,
16 ?Nang e n-gun ja ai masha yawng anhte hta manga shi rai nga ga ai. Na a madu hpe sa tam saga. Dai Madu a wenyi gaw shi hpe shapoi mat wa nna bum ntsa hkan e mung, kadit shara nkau mi hkan e mung shi hpe tawn kau da mai nga ai,? ngu nna tsun ma ai.
Elisha gaw, ?N rai law, nanhte sa lu na myit dai n rai,? ngu nna htan wu ai.
17 Rai ti mung shanhte hpe sa shangun mu ga nga, myit n-gun kya mat ai aten du hkra shanhte shi hpe akroi anoi hpyi ma ai. Ya masha manga shi hte gaw pru sa nhtawm bum lang hkaraw nhkap hkan masum ya tup Elia hpe hkan tam hkawm ma ti mung, shi hpe n mu tam nga ma ai.
18 Dai hpang Yerihko mare e naw ala nga ai Elisha hpang de shanhte nhtang wa ma ai rai nna, shi gaw shanhte hpe, ?Hkum sa tam masa, ngu nna ngai nanhte hpe hkum da made ai n rai ni?,? ngu nna tsun wu ai.
19 Yerihko mare masha nkau mi gaw Elisha hpang de sa nhtawm, ?Madu e, nang chye ai hte maren, ndai gaw pyaw ai mare langai mi rai nga ai, rai ti mung hka n kaja nga ai majaw lamu ga hpe nbya bya shangun nga ai,? ngu nna tsun mu ai.
20 Shi gaw, ?Hka wan hta jum loi mi bang nhtawm ngai kaw la wa marit,? ngu nna hkang dat wu ai. Shaloi shanhte mung dai hpe shi hpang de la sa wa ya ma ai;
21 shi gaw hka hpawk de sa nna, hka de jum kabai bang let, ?Dai Madu tsun ai ga ndai hku rai nga ai: ?Ngai gaw ndai hka hpe jasan jaseng ni ai. Si ai mung, nbya bya ai mung galoi mung byin sana ra ai n rai.?
22 Dai zawn byin wa na ra ai ngu nna Elisha tsun da nu ai hte maren, dai hka gaw dai shani kaw nna san seng nga sanu ai.
23 Elisha gaw Yerihko mare nna pru mat wa nhtawm Behtela mare de sa wa ai hkrun lam hta lasha ma nkau mi mahtang mare kaw nna pru wa nhtawm shi hpe, ?Pungkrin wa e, ndai shara kaw nna pru mat wa u,? ngu ashu let shanhte jahtau tsun ma ai.
24 Shi gaw nhtang kayin yu let shanhte hpe mada azi yu nna, dai Madu a mying ningsang hta shanhte hpe dagam kau wu ai. Dai hpang tsap yi lahkawng maling de nna pru wa nhtawm lasha ma mali shi lahkawng hte hpe ashep ashin di amya je da nga ai.
25 Elisha gaw Hkarmela Bum de lung wa nhtawm Samari mare de bai nhtang mat wa wu ai.