14
(2 Hl 25:1-24)
1 Israela Hkawhkam Yehoahaza a kasha Yehoasha hkaw dung ai lahkawng ning hta Yosha a kasha Amazia mung,
2 shi a asak hkun manga ning hta Yuda hkawhkam tai wa sai; dai hpang Yerusalem hta shi hkaw dung nna hkun jahku ning tup up nga ai. Shi a kanu gaw Yerusalem mare na Yehoadin rai nga ai.
3 Shi gaw dai Madu awng sharawng ai amu hpe galaw ti mung, shi a kaji kawa Hkawhkam Dawi zawn n rai; shing rai na malai, Kawa Yosha galaw nu ai hte maren shi hkan galaw nga ai.
4 Shi gaw tara maigan masha ni a nawku shara ni hpe n run jahten kau nga ai; amyu masha ni mung dai shara ni hkan e shagu hkungga ni hte manam pyaw ai baw ni hpe matut nna nawng ya nga ma ai.
5 Amazia gaw daru magam n-gun hpe ngang ngang jum da lu nu ai rai nna shi a kawa hkawhkam wa hpe sat kau ai du salang ni hpe sat kau wu ai.
6 Kaning mi rai ti mung shi chyawm gaw Mawshe a Tara hta dai Madu ndai hku nna hkang da nga ai lam hkan nga ai majaw shanhte a kashu kasha ni hpe n sat kau ya mu ai. Dai tara hta, ?Kanu kawa ni shut kau ai ru hka amu a majaw kashu kasha ni sat kau hkrum na n rai; shanhte a kashu kasha ni shut kau ai ru hka amu ni a majaw kanu kawa ni sat kau hkrum na mu ai n rai; shi hkum nan shut kau ai ru hka amu a majaw sha dai wa sat kau ai hkrum na rai wu ai,? ngu ai rai nga ai. Ref 14:6: Trj 24:16.
7 Amazia gaw Jum Kadit e Edom hpyenla mun mi hpe sat kau wu ai; bai shi gaw Sela mare hpe gasat dang la nna dai mare a mying hpe dai ni du hkra Yokhtela ngu nna shamying da wu ai.
8 Dai hpang Amazia gaw Israela Hkawhkam Yehoasha hpang de gasat dakat hkying hkat na lam tsun dan na matu dat kasa ni hpe shangun dat wu ai.
9 Rai ti mung Hkawhkam Yehoasha mahtang ning ngu nna bai htang shana dat wu ai: ?Kalang mi Lebanon Bum ntsa hkan nga ai ju maling gaw marau hpun langai mi hpang de ning ngu mungga tsun dat wu ai gaw, ?Na a shayi sha hpe nye a kasha hte ya sha ga, ?? ngu nna tsun nga yang, nam na matse labye dusat lai sa wa nna ju sumwum hpe kabye agrawp kau wu ai.
10 Ya chyawm gaw Amazia e, Edom masha ni hpe nang gasat dang kau nit dai majaw nang gaw gumrawng gumtawng ai myit hte hpring nga ndai. Na a mying dan hkung ai hta myit dik nga u. Nang hte na a amyu masha ni a ntsa ru yak tsin-yam tsindam chyu byin shangun ai jamjau lam hpe hpa majaw shapraw nga n ta??
11 Rai ti mung Amazia mahtang n madat hkraw ai rai nna Hkawhkam Yehoasha gaw shi a masha ni hte rau rawt sa wa nhtawm Yuda mung Bet Sheme mare e gasat anut hkat ma ai.
12 Amazia a hpyen luksuk ni sum mat ma ai rai nna shi a hpyenla ni yawng shanhte a nta ni de hprawng wa shajang nga ma ai.
13 Yehoasha gaw Amazia hpe bawng masha zawn rim la nna Yerusalem mare de lung wa nhtawm Ehprim chyinghka kaw nna Jut Chyinghka du hkra pe kru tsa daram galu ai mare bunghku hpe run kau mu ai.
14 Shi mu tam ai aja, gumhpraw ni yawng hpe mung, Nawku Htingnu na arai ni yawng hpe mung, hkawhkam htingnu na sut rai yawng hpe mung la nna Samari mare de htaw mat wa ma ai. Shi gaw sat hkam na masha ni hpe mung shi hte rau woi mat wa wu ai.
15 Yehoasha galaw nu ai amu magup ngu na Yuda Hkawhkam Amazia hpe sa gasat ai shi a share shagan ai lam hpe Israela Hkawhkam ni a Labau Laika hta ka matsing da nga ai.
16 Yehoasha si mat sai rai nna Samari mare na hkawhkam ni a lupwa hta lup makoi da nga ma ai. Shi a kasha Yeroboam II gaw shi a hkang hta hkaw dung nna hkawhkam tai wa sai.
(2 Hl 25:25-28)
17 Israela Hkawhkam Yehoasha si mat ai hpang Yuda Hkawhkam Amazia gaw shi manga ning naw hkrung nga ai.
18 Amazia galaw nu ai amu magup hpe Yuda Hkawhkam ni a Labau Laika hta ka matsing da nga ma ai.
19 Amazia hpe gasat kau na nga, Yerusalem mare e gumlau ai lam langai pru wa ai majaw Lahkisha mare de hprawng mat wa wu ai; rai ti mung shi a gumlau hpyen ni hkan shachyut nna dai yang e shi hpe sat kau mu ai.
20 Shi a moi mang hpe gumra ntsa hta mara nna Yerusalem mare de la wa nhtawm Dawi a Mare na hkawhkam ni a lupwa hta lup makoi da nga ma ai.
21 Yuda amyu masha ni chyawm gaw asak shi kru ning re ai shi a kasha Uzia hpe janmau shagup ya nhtawm hkawhkam shatai da nga ma ai.
22 Shi a kawa si mat ai hpang, Uzia gaw Elat mare hpe bai madu la nna mare bai de da nga wu ai.
23 Yuda Hkawhkam Yosha a kasha Amazia hkaw dung ai shi manga ning hta Yehoasha a kasha Yeroboam mung Israela hkawhkam tai wa nhtawm Samari mare hta hkaw dung let mali shi langai ning tup up nga ai.
24 Shi gaw Israela hpe yubak lam de lam woi shadam sa wa ai shi a shawng na hpu shawng hpu ba rai nga ai Nebat a kasha Hkawhkam Yeroboam a n hkru n shawp ai kasi hta hkan nna dai Madu hpe shut kau wu ai.
25 Dai Madu Israela a Karai Kasang gaw shi a shangun ma, Gat Hehpera kaw na Amati a kasha myihtoi Yona hku nna jaw tawn da ai ga sadi hte maren, Israela ni madu da sai lamu ga rai nga ai dingdung maga Hamat uhkan kaw nna dingda maga Jum Nawng du hkra dam ai lamu ga yawng hpe shi bai gasat dawm la wu ai. Ref 14:25: Yon 1:1.
26 Dai Madu gaw Israela masha ni a hkrit hpa nni nkri hpe mu ya wu ai; shanhte hpe karum la na masha langai mi pyi n nga nga ai.
27 Rai ti mung Israela masha ni hpe htani htana tsep kawp jahten sharun kau na dai Madu a yaw shada ai lam n rai nga ai majaw Hkawhkam Yeroboam II a lata hte shi shanhte hpe hkye mawai la nga ai.
28 Yeroboam II galaw da nu ai amu magup ngu na shi a share shagan ai myit hte majan gasat ai lam ni, Israela a lata de Damasku mare hte Hamat mare hpe kaning rai bai nhtang ap ya ai lam ni yawng hpe Israela hkawhkam ni a Labau Laika hta ka matsing da nga ai.
29 Yeroboam si mat sai rai nna hkawhkam ni a lupwa hta lup makoi da ma ai. Shi a kasha Zehkaria gaw shi a hkang hta hkaw dung nna hkawhkam tai wa sai.