16
1 Dai Madu gaw Hanani a kasha myihtoi Yehu hpe ga shaga nhtawm Basha a matu ndai mungga hpe shi jaw wu ai:
2 ?Nang gaw hpa manu n dan ai wa rai nga ti mung, nang hpe nye a amyu masha Israela a ningbaw shatai da ni ai. Ya chyawm gaw Yeroboam zawn nang shut hpyit kau nna nye a amyu masha ni hpe yubak lam de woi sa kau nit dai. Shanhte galaw ai yubak mara ni gaw ngai hpe pawt shangun nga ai,
3 Yeroboam hpe ngai galaw se ai zawn nang hte na a dinghku masha ni hpe ngai jahten shaza kau na we ai.
4 Mare kata e si taw nga ai na a dinghku masha ni kadai mung gwi ni e sha kau ai hkrum na mara ai; pa ga hkan e si taw nga ai ni kadai mung langda ni e sha kau ai hkrum na ra ai.?
5 Basha galaw nu ai amu lam magup ngu na shi a share shagan ai amu ni hpe Israela Hkawhkam ni a Labau Laika ni hta ka matsing da nga ai.
6 Basha si wa sai rai nna Tiza mare e lup makoi da mu ai; shi a kasha Ela mahtang shi a hkang hta hkaw dung nna hkawhkam tai wa sai.
7 Dai Madu hpe shut hpyit kau ai Basha a yubak mara ni a majaw Basha hte shi a dinghku masha ni hpe ninghkap na matu dai Madu kaw na pru ai mungga gaw myihtoi Yehu hku nna jaw ya nga ai. Shi a shawng na Hkawhkam Yeroboam galaw shut kau ai zawn shi galaw ai n hkru ai amu a majaw dai Madu hpe pawt shangun ai sha n rai; Yeroboam a dinghku masha ni yawng hpe mung shi sat kau wu ai majaw mung rai nga ai.
8 Yuda Hkawhkam Asa hkaw dung ai hkun kru ning hta Basha a kasha Ela mung Israela hkawhkam tai wa nhtawm Tiza mare e lahkawng ning up nga ai.
9 Shi a du salang langai mi rai nga ai Zimri gaw hkawhkam wa a hpyen leng ni a ka-ang hkup hpe hpareng ai wa rai nga ai. Shi hpe gumlau na maw mawn wu ai. Lani mi na aten hta Tiza mare kata hkawhkam hkaw hpe woi hpareng ai Arza a nta hta Ela chyaru nang nga wu ai.
10 Zimri gaw nta nhku de shang wa nhtawm Ela hpe sat kau nna shi bai hkaw galai dung nga wu ai. Yuda Hkawhkam Asa hkaw dung ai hkun sanit ning hta ndai lam byin wa sai.
11 Zimri hkawhkam tai wa ai hte rau Basha dinghku masha ni yawng hpe sat kau wu ai. Jinghku jingyu hte makyin jinghku manaw manang ni hta na lasha shagu hte hpe sat kau wu ai.
12 Dai rai nna Basha hte lakap nna myihtoi Yehu a n-gup hte dai Madu tsun da nu ai hte maren Zimri gaw Basha a dinghku masha ni yawng hpe sat shamyit kau wu ai.
13 Hpara sumla nawku ai htung lailen a majaw mung, Israela hpe yubak lam de lam woi shadam kau ai majaw mung, Basha hte shi a kasha Ela yan gaw dai Madu Israela a Karai Kasang hpe pawt bu shangun nga ai.
14 Ela galaw ai amu magup shagu hpe Israela Hkawhkam ni a Labau Laika hta ka matsing da nga ai.
15 Yuda Hkawhkam Asa hkaw dung ai hkun sanit ning hta Zimri gaw Tiza mare e hkaw dung nna Israela hpe sanit ya up nga ai. Dai rai nna Israela hpyen hpung ni gaw Hpilisti mung na Gibehton mare hpe wang tawn da ma ai rai nna;
16 Zimri mahtang hkawhkam wa hpe maw mawn nhtawm sat kau nu ai lam hpe shanhte na jang, shanhte yawng mung shanhte a up hkang du Omri hpe Israela hkawhkam shatai da mu ai.
17 Omri hte shi a hpyen hpung ni gaw Gibehton mare kaw nna pru sa nhtawm Tiza mare hpe sa wang tawn da ma ai.
18 Dai mare hkrat mat ai hpe Zimri mu jang, hkawhkam htingnu a kata hpyen dap de shang sa nhtawm dai hkawhkam htingnu hpe nat kau ai hte shi mung dai wan shinglet hta galip si mat wu ai.
19 Dai lam gaw dai Madu hpe ninghkap ai yubak mara ni a majaw rai nga ai. Shi a shawng na Yeroboam zawn Israela hpe yubak lam de woi shadam kau ai shi a yubak mara ni hte dai Madu hpe myit n pyaw shangun ai majaw mung byin wa nga sai.
20 Zimri galaw nu ai lam magup ngu na shi a gumlau rawt ai amu hpe Israela Hkawhkam ni a Labau Laika hta ka matsing da nga ai.
21 Israela amyu masha ni hta hpung garan mat ai rai nna, nkau mi Ginat a kasha Tibni hpe hkawhkam shatai mayu ma ai; kaga hpung mi chyawm gaw Omri hpe ra sharawng nga ma ai.
22 Hpang jahtum e, Omri a masha ni mahtang dang kau ma ai; Tibni si mat sai rai nna Omri mahtang hkawhkam tai wa sai.
23 Dai rai nna Yuda Hkawhkam Asa hkaw dung ai sumshi langai ning hta Omri gaw Israela a hkawhkam tai wa nhtawm shi lahkawng ning tup hkaw dung nna up hkang nga ai. Shawng daw na kru ning tup Tiza mare e hkaw dung nga wu ai;
24 dai hpang shi gaw Shemera mying ai wa kaw nna Samari kawng hpe gumhpraw hkying kru hte mari la wu ai. Omri gaw dai kawng hta dap de nna mare de da wu ai. Dai hpe shawng na kawng madu Shemera a mying hkan let dai hpe Samari ngu nna shamying da nga ai.
25 Omri gaw shi a shawng na hpu shawng hpu ba ni kadai hta mung grau nna dai Madu hpe shut kau nga wu ai.
26 Shi a shawng na Yeroboam zawn shi galaw shut ai yubak ni hte amyu masha ni hpe yubak lam de lam woi shadam let hpara sumla nawku ai lai hkan ai amu hte dai Madu Israela a Karai Kasang hpe pawt bu shangun nga ai.
27 Omri galaw nu ai lam magup hte shi shangut shakre da lu ai amu yawng a lam hpe Israela Hkawhkam ni a Labau Laika hta ka matsing da nga ai.
28 Omri si mat sai rai nna Samari mare hta lup makoi da mu ai. Shi a kasha Ahab gaw shi a hkang hta hkaw dung nga ai.
29 Yuda Hkawhkam Asa hkaw dung ai sumshi matsat ning hta, Omri a kasha Ahab gaw Israela hkawhkam tai wa sai rai nna Samari mare hta hkaw dung let hkun lahkawng ning tup up hkang nu ai.
30 Shi mung shi a shawng na hpu shawng hpu ba ni kadai hta mung grau nna dai Madu hpe shut hpyit kau nga ai.
31 Hkawhkam Yeroboam zawn yubak galaw na shi a matu n ram dum nga wu ai; dai rai nna Sidon Hkawhkam Etbala a shayi sha Yezebela hpe hkungran la let Bala hpe nawku wu ai.
32 Shi gaw Samari mare e Bala a matu htingnu langai gap nhtawm shi a matu tawn hkungri langai galaw nna dai hpe htingnu kata e tawn da wu ai.
33 Shi gaw Ashera karai num a gawkngu sumla langai mi hpe mung shadun da wu ai. Shi gaw shi a shawng na Israela hkawhkam ni yawng hta dai Madu Israela a Karai Kasang hpe pawt bu shangun nga ai.
34 Shi hkaw dung ai laman hta Behtela mare na Hiela gaw Yerihko mare hpe bai de da nga wu ai. Dai Madu gaw Nun a kasha Yawshu hpe tau tsun da nu ai hte maren, Yerihko mare npawt nhpang hpe jahkrat da yang, shi a kasha alat Abiram si mat nga ai, mare chyinghka ni hpe galaw da yang, kasha hpungdim Seguba si mat nga ai.