HKAWHKAM LAIKA LANGAI
(1 KINGS)
Ga Nhpaw
Ndai Hkawhkam Laika Langai mung Samuela Laika ni hta rawng hpang wa sai Israela magam hkawhkam up hkang ai labau hpe matut nna tsun da ai laika rai nga ai. Dai ni hpe daw masum hku garan da nga ai: (1) Israela hte Yuda masha ni a hkawhkam aya hkam la ai Shawlumon a lam hte shi a kawa Dawi si mat ai lam. (2) Shawlumon a mungdan up hkang lam hte galaw shapraw da lu ai amu ni rai nga ai. Grau nna matsing la mai ai lam gaw Yerusalem mare e galaw ai Nawku Htingnu rai nga ai. (3) Dingdung hte dingda mungdan lahkawng garan mat wa ai hte jaw prat 9 B.C. a ka-ang prat du hkra up hkang yu wa ai hkawhkam ni a maumwi ni rai nga ai.
Hkawhkam Laika Langai hte Lahkawng yan hta mungdan hpe up hkang ai masha shagu hte gaw Karai Kasang hta shi sadi dung ai hte maren jeyang ai hkrum nga ai; amyu masha ni a awng dang ai lam mung ndai sadi dung ai lam hta mu lu nga ai. Hpara sumla nawku ai lai hte n madat n mara ai lai gaw tsin-yam tsindam de woi sa nga ai. Dingda mungdan Yuda hkawhkam ni a labau hta awng dang ai lam hte hkrat sum ai lam hpe gayau gaya rai ka mazing da nga yang, dingdung na Israela hkawhkam ni yawng gaw chyam dinglik yu ai hta hkrat sum ai hkrum nga ma ai.
Hkawhkam Laika Langai hta laklai ai lam ni gaw hpara sumla ni hpe n nawku ai sha Karai Kasang a ga hpe madat mara na matu amyu masha ni hpe Karai Kasang a matu nden ja ja hte sadi jaw, tsun shaga ai dai Madu a myihtoi ni a lam rai nga ai. Grau nna matsing la ging ai lam gaw Elia hte Bala hkinjawng ni hte shingjawng ai maumwi a lam rai nga ai (Daw Kaba 18).
1
1 Ya Hkawhkam Dawi gaw dingla ugut gu, prat shanut nu sai rai nna shi a shangun ma ni shi hpe nba jahpun timung, shi a hkum hpe n shalum la lu nga sai.
2 Dai rai nna shi a du salang ni gaw shi hpe, ?Madu hkawhkam e, nang hte rau nga nga nna nang hpe lanu lahku na matu numsha langai mi tam yu ga. Shaloi shi gaw nang hte htep galeng nna nang hpe shalum ya na ra ai,? ngu nna tsun mu ai.
3 Shaloi shanhte gaw Israela mung ting hta e ahpraw tsawm htap ai numsha langai mi tam nna Shunem numsha Abishaga mying ai numsha hpe mu jang hkawhkam wa hpang de woi wa ya mu ai.
4 Dai numsha gaw nachying ahpraw tsawm htap nga ai rai nna, hkawhkam wa hpe sin yu let lanu lahku ya wu ai, rai ti mung hkawhkam wa chyawm gaw shi hte n kanawn yu nga ai.
5-6 Ya Absalom si mat jang, Dawi hte Hagit yan a kasha Adoniya gaw naw hkrung nga ai shadang sha kaba rai nga ai. Shi gaw nachying ahpraw asam tsawm ai wa rai nga ai. Hkawhkam tai wa na matu shi myit makun da nga ai lam hte seng nna, Dawi shi hpe galoi mung n daru kau yu wu ai. Shi gaw shi a matu hpyen leng ni mung, gumra ni mung, asak sin na matu masha manga shi hpe mung san tawn da wu ai.Ref 1:5: 2Sa 3:4.
7 Shi gaw (kanu Zeruia) a kasha yan rai nga ai Yoab hte hkinjawng Abiahta yan hte bawng nna, shi galaw ai amu hpe karum madi shadaw la na myit jahkrum da wu ai.
8 Rai ti mung hkinjawng Zadok, Yehoiada a kasha Benaia, myihtoi Nahtan, Shime, Rei hte Dawi hpe hkan sin ya ai ni gaw Adoniya a maga de n tsap nga ma ai.
9 Lani mi na aten hta, Adoniya gaw sagu, usu ni hte hpum sau ai dumsu kasha ni hpe Enrogela hka hpawk makau na Lapu Lungrawk hta shagu hkungga sat nawng ya wu ai. Shi gaw ndai sat nawng ai lusha poi de sa na matu, hkawhkam Dawi a shadang sha ni hte Yuda mung na du sa wa ai hkawhkam Dawi a du salang ni hpe saw shaga da wu ai;
10 rai ti mung shi a kanau daw ai Shawlumon, myihtoi Nahtan, Benaia hte hkawhkam wa a asak sin ai ni hpe chyawm gaw n shaga wu ai.
11 Dai hpang Nahtan gaw Shawlumon a kanu Batsheba hpang de sa nhtawm, ?Hagit a shadang sha Adoniya gaw shi hkum shi hkawhkam shatai la nu ai hpe nang n na wu ni? Hkawhkam Dawi chyawm gaw dai lam hpe n chye wu ai!Ref 1:11: 2Sa 12:24.
12 Na a asak hte na a kasha Shawlumon a asak hpe nang hkye la mayu ai rai yang, ngai nang hpe hpaji jaw de ga;
13 Hkawhkam Dawi kaw kalang lata sa nhtawm shi hpe, ?Madu hkawhkam e, nye a kasha Shawlumon gaw na a hkang hta hkawhkam tai wa na matu, nang ngai hpe n dagam da lu n ni? Dai rai yang, Adoniya gaw kaning rai hkawhkam tai nga sani?,?? ngu san su, ngu nna tsun wu ai.
14 Nahtan gaw, ?Hkawhkam Dawi hte nang naw shaga nga yang pyi ngai hkan shang wa nna na a ga hpe shagrin shangang ya na de ai,? ngu nna tsun jat wu ai.
15 Dai rai nna Batsheba gaw hkawhkam wa a yup gawk de shang yu wu ai. Shi chyawm gaw nachying dingla nga sai rai nna, Shunem numsha Abishaga mung shi hpe lanu lahku nga wu ai.
16 Batsheba gaw hkawhkam wa a man e gum dagup wu yang, hkawhkam wa mahtang, ?Nang hpa ra n ta?,? ngu nna san wu ai.
17 Shi chyawm gaw, ?Madu hkawhkam e, na a hpang hkawhkam tai wa na nye a kasha Shawlumon hpe dai Madu na a Karai Kasang a mying ningsang hta nang ngai hpe dagam let ga sadi shagrin da nga ndai.
18 Rai ti mung Adoniya mahtang hkawhkam tai nga sanu ai, dai lam hpa mung nang n chye da sam nga ndai.
19 Shi gaw usu, sagu hte dumsu kasha law law hte shagu hkungga nawng ya nhtawm dai poi de na a shadang sha ni, hkinjawng Abiahta hte na a hpyen luksuk hpe up hkang ai Yoab ni hpe shaga timung, na a kasha Shawlumon hpe chyawm gaw n shaga wu ai.
20 Madu hkawhkam e, na a magam tingnyang hta hkaw kadai matut dung na lam, Israela amyu masha ni yawng shanhte hpe tsun dan mi ga nga, nang hpe mada yu nga ma ai.
21 Dai lam hpe nang n tsun da ai sha si mat wa ai rai yang, ngai sha Shawlumon hte ngai gaw gumlau gumle galaw ai ni hpe zawn di kau ai hkrum na raga ai,? ngu nna htan wu ai.
22 Hkawhkam hkaw de Nahtan du shang wa nga yang, Batsheba ga naw shaga nga ai.
23 Myihtoi wa dai yang e du nga sai lam hkawhkam wa hpe sa tsun dan mu ai. Shaloi Nahtan shang wa nna hkawhkam wa a man e myi man gum dagup nga ai.
24 Dai hpang shi gaw, ?Madu hkawhkam e, Adoniya hpe na a magam tingnyang hta hkaw matut dung na matu nang tsun ndau shabra kau da wu ni?
25 Shi gaw dai ni jang yu sa nna usu, sagu hte dumsu kasha law law hte shagu hkungga nawng ya nhtawm na a shadang sha ni yawng hpe mung, na a hpyen luksuk hpe up hkang ai Yoab hpe mung, hkinjawng Abiahta hpe mung saw shaga la nna ya e pyi shanhte hte rau shi lu sha nhtawm, ?Hkawhkam Adoniya asak galu u ga law!,? ngu nna jahtau garu nga masai.
26 Rai ti mung madu e, shi gaw ngai hpe mung, hkinjawng Zadok hpe mung, Benaia hte Shawlumon hpe mung n saw shaga nga ai.
27 Ndai amu yawng hte na a magam tingnyang hta hkaw matut dung na hkawhkam kadai rai na lam na a du salang ni hpe pyi n shana dan hkra, madu hkawhkam nang shagrin kau ya wu ni?,? ngu nna tsun wu ai.
28 Hkawhkam Dawi gaw, ?Batsheba hpe bai shaga wa mi,? ngu nna tsun dat wu yang, shi mung sa wa nhtawm shi a man e tsap nga ai.
29 Dai hpang shi gaw Batsheba hpe, ?Nye a ru yak tsin-yam tsindam yawng kaw na ngai hpe hkye mawai hkrang shaw la ai ahkrung nga ai dai Madu hta ngai nang hpe ga sadi tawn da nga nngai,
30 na a kasha Shawlumon mahtang nye a magam tingnyang hta hkaw matut dung na hkawhkam tai na ra ai gaw, dai Madu Israela a Karai Kasang a mying ningsang hta ngai nang hpe dagam da sai dai ga sadi hpe dai ni jang ngai shatup na we ai,? ngu nna tsun wu ai.
31 Shaloi Batsheba gaw myi man gum let, ?Nye a madu hkawhkam wa gaw htani htana ahkrung nga nu ga law!,? ngu nna tsun wu ai.
32 Dai hpang hkawhkam Dawi gaw Zadok, Nahtan hte Benaia ni hpe shaga shangun dat wu ai. Shing rai shanhte shang wa jang,
33 shi shanhte hpe, ?Nanhte hte rau nye a hkaw wang na du salang ni hpe woi wa mu; nye a kasha Shawlumon hpe mung nye a lawze hta shajawn nhtawm shi hpe sin let Gihon hka hpawk de yu wa masu;
34 dai yang e, Zadok hte Nahtan gaw shi hpe Israela hkawhkam tai wa na matu namman jaw ya na rai myit dai. Dai hpang pahtau dum dat nhtawm, ?Hkawhkam Shawlumon asak galu u ga law!,? ngu nna jahtau tsun na rai myit dai.
35 Shi a hpang bai hkan gumbawm wa marit, shaloi nye a hkaw tingnyang hta shi dung na ra ai. Shi gaw Israela hte Yuda mung hpe up hkang na matu ngai lata da sai wa rai nga sai majaw nye a magam tingnyang hta hkaw matut dung na hkawhkam shi tai na ra ai,? ngu nna tsun wu ai.
36 Dai hpang Benaia gaw, ?Dai hku rai wa sanu ga law, dai Madu na a Karai Kasang gaw dai amu hpe shagrin shangang da sanu ga law.
37 Dai Madu gaw madu hkawhkam hte rau nga nga ai zawn Shawlumon hte mung shi rau nga nga nna, Shawlumon a up hkang ai gaw na a hkaw dung ai hta grau nna pyi galu kaba ngamu ngamai shangun u ga law,? ngu nna htan wu ai.
38 Dai rai nna, Zadok, Nahtan Benaia hte hkawhkam wang sin ai sin langa ni gaw Shawlumon hpe hkawhkam Dawi a lawze hta shajawn nhtawm shi hpe hkan sin let Gihon hka hpawk de woi yu wa ma ai.
39 Zadok mung dai Madu a hpung shingkang shanu nga ai Sum kaw nna la sa wa ai tsanlun sau jarung mi hpe la nhtawm Shawlumon hpe jaw ya wu ai. Shaloi pahtau hpe mung shanhte dum dat ai hte amyu masha ni yawng mung, ?Hkawhkam Shawlumon asak galu u ga law!,? ngu nna jahtau tsun mu ai.
40 Dai hpang shanhte yawng mung shi a hpang de hkan lung wa nhtawm sumpyi dum let ja ja kabu jahtau nga ma ai rai nna, lamu ga gaw shanhte a garu marawn ai a majaw kadu ashun nga ai.
41 Ya Adoniya hte shi a manam ni yawng lusha sha ngut wa magang yang, garu kachyi nga ai nsen hpe shanhte na ma ai. Shing rai pahtau dum ai nsen hpe Yoab na jang, ?Mare kata de garu kachyi nga ai gaw hpa baw lachyum wa rai nga a ta?,? ngu nna san wu ai.
42 Ya shi ga tsun ai pyi garai n htum yang, yu u, hkinjawng Abiahta a kasha Yonahtan du sa wa nga ai. Shaloi Adoniya gaw, ?Shang wa rit; nang gaw masha kaja rai nga ndai - shiga kaja mung gun sa na rai nga ndai,? ngu nna tsun wu ai.
43 Yonahtan chyawm gaw, ?Dai hku n rai law, Hkawhkam Dawi gaw Shawlumon hpe hkawhkam shatai kau nu ai.
44 Dawi gaw Zadok, Nahtan, Benaia hte hkawhkam wang sin ai sin langa ni hpe shangun dat nhtawm shanhte gaw hkawhkam wa a lawze hta shi hpe shajawn mu ai.
45 Shing rai Zadok hte Nahtan gaw shi hpe hkawhkam shatai na matu Gihon hka hpawk shara e shi hpe namman jaw ya mu ai. Dai hpang shanhte gaw mare kata de shang nhtawm kabu gara ai hte jahtau garu nga ma ai majaw ya amyu masha nlang mung garu kachyi rai nga masai. Ya nanhte na lu ai garu kachyi ai nsen gaw dai rai nga ai.
46 Ya Shawlumon gaw hkawhkam tai wa nga sai.
47 Ya hkawhkam wang na du salang ni gaw Hkawhkam Dawi hpe shagrau hkungga jaw na matu shang sa wa ma ai rai nna, ?Na a Karai Kasang gaw Shawlumon hpe nang hta grau nna gumhkawng shangun u ga; Shawlumon a hkaw tingnyang gaw na a tingnyang hta grau nna pyi ngang grin nna ngamu ngamai shangun nu ga law,? ngu nna tsun mu ai. Dai hpang hkawhkam Dawi gaw shi a yup ku ntsa hta dingnyawm let nawku
48 nhtawm, ?Dai ni nye a amyu matu na marai langai ngai hpe nye a magam tingnyang hta hkaw matut dung na hkawhkam hpe nye myi hte chyaw mu shangun ai dai Madu Israela a Karai Kasang hpe anhte shakawn kungdawn nga ga law!,?? ngu nna tsun wu ai.
49 Dai hpang Adoniya a manam ni hkrit mat ma ai rai nna shanhte yawng rawt nhtawm tinang lam ang ai de pru mat wa ma ai.
50 Adoniya mung Shawlumon hpe hkrit kaba hte hkrit wu ai rai nna dai Madu a hpung shingkang shanu nga ai Sum de sa wa nhtawm tawn hkungri a jut nrung ni a 1:50: Tawn hkungri a jut nrung ni: Tawn hkungri a jut mali hta nrung zawn re ai arai ni hpe jung shakap da ai. hpe hkan jum nga wu ai.
51 Adoniya gaw shi hpe hkrit nga ai rai nna tawn hkungri a jut nrung ni hpe hkan jum da nhtawm, ?Shawng nnan Shawlumon gaw ngai hpe n sat u ga, ngai hpe dagam da na ngai ra nga nngai,? ngu nna hkawhkam Shawlumon hpe shana ya mu ai.
52 Shawlumon gaw, ?Shi sadi dung ai rai yang chyawm gaw shi a baw na kara singgawng langai mi hpe pyi hkra lu na ra ai n rai; rai ti mung shi sadi n dung ai rai yang gaw, si lu na rai wu ai,? ngu nna tsun htang wu ai.
53 Dai hpang hkawhkam Shawlumon gaw Adoniya hpe shaga shangun dat wu ai rai nna tawn hkungri de na shi hpe woi yu wa mu ai. Adoniya gaw hkawhkam wa kaw sa nhtawm shi a man e gum dagup wu ai; shaloi hkawhkam wa gaw shi hpe, ?Nang nta de wa mai nga nit dai,? ngu nna tsun wu ai.