42
1 Dai hpang, hpyen du ni yawng, Karea a kasha Yohanan, Hoshaia a kasha Yezania hte mung masha tsang shara shagu de na ni gaw
2 ngai kaw sit sa nna, ?Anhte nang hpe hpyi lajin ai ga hpe chyeju hte galaw ya mi! Anhte a matu dai Madu anhte a Karai Kasang hpang de akyu hpyi ya mi. Anhte hta naw ngam nga ai amyu masha ni a matu akyu hpyi ya mi; anhte gaw shawng de grai law la ga ai rai ti mung, ya gaw nang mu mada ai hte maren kachyi mi sha ngam nga saga ai.
3 Anhte hkawm sa ang ai hkrun lam hte anhte hpa galaw ang ai amu hpe dai Madu anhte a Karai Kasang anhte hpe lam madun la mi ga, akyu hpyi ya mi law,? ngu nna tsun ma ai.
4 Ngai gaw, ?Shing rai jang gaw grai kaja sai law. Nanhte ngai kaw hpyi lajin manit dai hte maren, dai Madu anhte a Karai Kasang kaw ngai akyu hpyi na we ai. Shi tsun ai lam magup hte hpe mung ngai nanhte hpe tsun dan na we ai. Ngai gaw nanhte kaw na hpa mung makoi magap da na nngai n rai,? ngu nna htan nngai.
5 Dai hpang, shanhte gaw ngai hpe, ?Anhte a matu ngu nna dai Madu anhte a Karai Kasang nang hpe htet da ai hkang da ai lam yawng mayawng hte hpe anhte n madat n mara ai rai yang, dai Madu gaw anhte hta teng man ai hte kangka ai sakse tai nga u ga.
6 Dai gaw anhte hpe sharawng awng shangun ai mi rai rai, n rai dam ai mi rai rai, nang hpe hpyi ya na matu anhte lajin nga ai dai Madu anhte a Karai Kasang a mungga hpe madat mara na ga ai. Anhte gaw shi a ga madat mara ga ai rai yang, anhte gaw lam shagu hta ngamu ngamai ngwi pyaw kabu gara wa na ga ai,? ngu nna tsun ma ai.
7 Nhtoi shi ya na ai hpang, dai Madu a mungga ngai kaw ning nga du ai:
8 dai rai nna, ngai gaw Yohanan hte rau shi kaw hkan nang nga ai hpyen du ni mahkra hte kaga mung masha ni mahkra hte hpe shaga zup hpawng da nngai.
9 Ngai gaw shanhte hpe, ?Nanhte ngai hpe shangun dat nna nanhte a hpyi lajin shangun ai dai Madu Israela a Karai Kasang gaw,
10 ?Nanhte ndai mungdan hta matut nna shanu nga mayu ai rai yang, ngai nanhte hpe de da na nngai; nanhte hpe ashep ashin di kau na n rai; ngai nanhte hpe hkai da na nngai, nanhte hpe baw kau na n rai. Ngai nanhte a ntsa e shapraw dan sai jahten shabyak lam gaw ngai hpe yawn hkyen kaba shabyin ya nga sai.
11 Babelon hkawhkam wa hpe hkum hkrit nga myit. Ngai gaw nanhte hte rau rai nga nngai. Ngai gaw nanhte hpe shi a lata kaw na mawai la na nngai.
12 Hpa majaw nga yang, ngai gaw matsan chye dum ai wa rai nga nngai, ngai gaw shi hpe nanhte a ntsa matsan dum shangun na we ai, shing rai nanhte hpe dum nta de nhtang wa shangun na myit dai. Dai Madu ngai nan tsun ni ai,? ngu nna tsun we ai.
13-15 ?Rai ti mung, Yuda mung hta naw hti ngam nga ai amyu masha ni gaw dai Madu na a Karai Kasang a ga hpe n madat n mai ai hte ndai mung hta shanu nga na matu mung n hkap la n mai rai nga myit dai. Nanhte gaw, ?N rai law, anhte gaw Egutu mung de yu sa nna dai mung hta shanu nga na ga ai, anhte gaw dai mung hta hpyen majan loi mi mung hkrum kadup na ga ai n rai, majan gasat na matu jasu ai nsen mung na na ga ai n rai, kawsi hpang gara ai mung hkrum na ga ai n rai,? nga nna n tsun myit ga nga ai. Nanhte dai ga tsun myit dai rai yang, Chyahtum Chyalai N-gun Rawng ai dai Madu Israela a Karai Kasang gaw, ?Nanhte Egutu mung de yu sa nna dai mung e shanu nga na matu myit daw dan ai rai yang,
16 nanhte hkrit ai hpyen majan gaw nanhte hpe hkan dep nang na ra ai; nanhte hkrit kajawng nga ai kawsi hpang gara ai gaw nanhte kaw hkan nang nna nanhte gaw dai Egutu mung hta si mat na rai myit dai.
17 Egutu mung de sa shanu shingbyi na matu yu sa wa na, myit jahkut daw dan ai amyu masha ni yawng hte gaw hpyen majan hta mung, kawsi hpang gara ai hta mung, ana zinli hta mung si mat na mara ai. Shanhte a ntsa e ngai shapraw dan na tsin-yam tsindam hta, shanhte kaw na langai mi mung ngam nga na ra ai n rai, langai mi mung hprawng lawt lu na ra ai n rai,? ngu nna tsun ai.
18 ?Dai Madu Israela a Karai Kasang gaw, ?Nye a pawt sindawng ai hte masin kahtet ai hpe Yerusalem masha ni a ntsa e ru bun ai zawn nanhte Egutu mung de yu sa ai rai yang nanhte a ntsa e mung nye a masin kahtet ai hpe ru bun na nngai. Nanhte gaw yu hkrit shara tai na marin dai; masha amyu ni mung nanhte hpe asawng asang di ai hte na a amying hpe dagam dala ga tsun ai hta lang na mara ai. Nanhte gaw ndai shara hpe galoi mung bai mu lu na ra ai n rai,?? ngu nna tsun wu ai.
19 Dai hpang, ngai gaw, ?Yuda mung hta naw ngam nga ai amyu masha ni hpe Egutu mung de n yu sa na matu, dai Madu nanhte hpe tsun nu ai. Ya mung ngai gaw
20 nanhte galaw maw mawn nga ai si chye ai shut hpyit amu hpe sadi jaw nga nngai. Nanhte a matu dai Madu anhte a Karai Kasang hpe hpyi lajin ya na, nanhte ngai hpe hpyi nem shangun myit dai; shi hkang da ai lam shagu hpe nanhte galaw shatup na ga ai nga nna ga sadi tawn da myit dai.
21 Ya chyawm gaw, ngai nanhte hpe tsun dan ni ai, rai ti mung nanhte gaw dai Madu anhte a Karai Kasang nanhte hpe tsun shangun ai lam magup hte hpe n madat n mara nga myit dai.
22 Dai re ai majaw, nanhte sa shanu nga mayu ai mungdan hta hpyen majan hta mung, kawsi hpang gara ai hta mung, ana zinli hta mung si mat na rai myit dai,? ngu nna matut tsun ni ai.