37
1 Babelon Hkawhkam Nebuhkadneza gaw Yehoiakim a kasha Yehoiahkin a malai Yuda Hkawhkam Yoshia a kasha Zedekia hpe hkaw shadun wu ai. Ref 37:1: 2Hk 24:17; 2Hl 36:10.
2 Rai ti mung, Hkawhkam Zedekia mung, shi a du salang ni hte amyu masha ni mung ngai hpe tsun shangun ai dai Madu a mungga hpe n madat nga ma ai.
3 Hkawhkam Zedekia gaw Shelemia a kasha Yehuhkala hte hkinjawng Masea a kasha Zehpania yan hpe ngai hpang de shangun dat nhtawm amyu masha ni yawng a malai dai Madu anhte a Karai Kasang kaw akyu hpyi ya na matu ngai hpe htet dat wu ai.
4 Ngai gaw htawng garai n hkrat yu nga nngai; amyu masha ni a lapran e ndut ndang naw hkawm sa shamu shamawt lu nga nngai.
5 Babelon hpyen luksuk ni gaw Yerusalem mare hpe wang da nga ma ti mung, Egutu hpyen luksuk ni Egutu mung lamu ga jarit hpe lai di mat wa sai lam hpe shanhte na ma ai shaloi htingnut mat wa ma ai.
6 Dai shaloi, dai Madu Israela a Karai Kasang gaw Zedekia hpe,
7 ?Egutu hpyen luksuk ni gaw nang hpe karum la na matu pru sa wa ma ai, rai ti mung, dai ni gaw shanhte a dum nta de nhtang mat wa na mara ai.
8 Dai hpang, Babelon hpyen luksuk ni bai nhtang sa wa nhtawm, ndai mare hpe htim gasat ai hte mung masha ni hpe rim la nna mare dai hpe nat kau na mara ai.
9 Dai Madu ngai gaw Babelon masha ni nhtang sa wa na mara ai n rai nga nna nanhte myit sawn yu ai hte nanhte hkum hpe n masu hkalem u ga, sadi jaw nga nngai. Hpa majaw nga yang, shanhte nhtang sa na mara ai.
10 Nang gaw Babelon hpyen luksuk ting hpe gasat dang kau nna hkala nba hkrum ai ni chyu sha ngam nga ai hte shanhte a sum ni hta taw nga ma ti mung, dai masha ni rawt wa nna ndai mare hpe dap byin mat hkra nat kau na mara ai,? ngu nna tsun wu ai.
11 Egutu hpyen luksuk ni shani sa wa ma ai majaw, Babelon hpyen luksuk ni gaw Yerusalem kaw nna kanut mat wa masai.
12 Dai re ai majaw, ngai gaw nye a gambum rai nga ai dinghku sali wunli hpe hkam la lu hkra, Benyamin mungdaw de wa na matu Yerusalem kaw nna pru wa ni ai.
13 Rai ti mung, Benyamin Chyinghka lam de ngai du shang wa ai shaloi, Hanania a kashu, Shelemia a kasha, sin langa ni a agyi Iriya mying ai wa gaw, ngai hpe hkap jahkring nhtawm, ?Nang gaw Babelon masha ni hpang de hprawng shang mat wa ai wa rai nga ndai!,? ngu nna hkap tsun wu ai.
14 Ngai gaw, ?Dai hku n rai law! Ngai n hprawng shang mat wa nngai,? ngu nna htan ni ai. Rai ti mung, Iriya gaw ngai tsun ai ga hpe n madat ya wu ai. Shing rai na malai, shi gaw ngai hpe rim la nna du salang ni nga ai de woi sa mat wa wu ai.
15 Shanhte gaw ngai hpe masin pawt bu ma ai hte ngai hpe kayat nhtawm htawng shatai tawn ai htingnu amu madu Yonahtan a nta hta sharen da ma ai.
16 Ngai gaw nta npu na nhkun gawk kaji hta nhtoi tsawmra mi na hkra rawng nga nngai.
17 Dai hpang, kade n na yang, Hkawhkam Zedekia gaw ngai hpe shaw la na matu masha shangun dat wu ai; dai hkaw htingnu kata hta, ?Dai Madu kaw nna mungga naw nga a ni?,? ngu nna ngai hpe alak mi san wu ai.
Shing rai, ngai mung, ?Nga ai,? dai gaw, ?Nang Babelon hkawhkam wa a lata de ap kau ai hkrum na rai ndai,? ngu nna htan ai hte kahtap tsun ni ai.
18 Dai hpang, ngai gaw, ?Nang ngai hpe htawng hta sharen da shangun na daram, nang hpe mung, na a du salang ni hte amyu masha ni hpe mung, ngai hpa baw ru hka amu galaw shut sata?
19 Babelon hkawhkam wa gaw nang hte na a mungdan hpe htim gasat na n rai, nga nna nang hpe tsun ai na a myihtoi ni hta hpa baw byin sani?
20 Ya chyawm gaw, nye a madu hkawhkam wa e, ngai tsun ai ga hpe madat mara nna ngai hpyi lajin ai hpe lajang ya e law. Chyeju hte ngai hpe Yonahtan a nta htawng de hkum nhtang wa shangun e. Nang lama nhtang wa shangun ai rai yang, ngai gaw dai shara hta teng teng si mat na ring ngai,? ngu nna tsun nngai.
21 Shaloi Hkawhkam Zedekia gaw ngai hpe hkawhkam wang kata e rawng da na matu hkang dat wu ai. Ngai gaw dai yang e nga nga nna, mare kata hta kabaw ai muk tawng ni yawng ma mat ai aten du hkra, ngai gaw shani shagu muk kabaw seng kaw na muk tawng tawng hpe sha let nga nga nngai.