33
1 Ngai gaw htawng wang kata e bawng naw dung nga yang, dai Madu a mungga ngai kaw kalang mi bai du ai.
2 Ginding aga hpe hpan da nna dai hpe hkrang gyin da ai hte shi a shara hta tawn da ai dai Madu gaw ngai hpe tsun ni ai. Shi gaw dai Madu mying ai wa rai nga nna,
3 ?Ngai hpe shaga e, ngai nang hpe htan ya na nngai; nang hpa mung n chye lu ai mauhpa amu ni hte mau kajawng na zawn re ai amu ni ngai nang hpe tsun dan na de ai.
4 Yerusalem a nta ni hte Yuda hkawhkam htingnu ni gaw wang shinggrup ai hte htim gasat hkrum ai a majaw hten run mat na ra ai nga nna dai Madu Israela a Karai Kasang ngai nan tsun ni ai.
5 Nkau mi gaw Babelon masha ni hpe htim gasat ma ti mung nye a pawt sindawng ai hte masin kahtet ai hta ngai adup sat ai masha ni a moi mang ni hte nta hkan jahpring da na nngai. Ndai mare masha ni galaw ai n hkru ai amu ni a majaw ngai gaw ndai mare kaw nna myi man kayin mat wa na nngai.
6 Rai ti mung, ngai gaw ndai mare hte dai hta shanu nga ai amyu masha ni hpe shamai shatsai ai hte shanhte hpe hkam kaja shangun na nngai. Ngai shanhte hpe ngwi pyaw sim sa lam law htam shangun nna shim lum ai lam madun dan na nngai.
7 Ngai gaw Yuda mung hte Israela hpe ngamu ngamai shangun nna; shanhte hpe shawng de na zawn ngai bai de da na nngai.
8 Shanhte ngai hpe shut hpyit kau ai yubak ni kaw na ngai shanhte hpe jasan jaseng da na nngai; shanhte a shut hpyit ai yubak mara ni hte shanhte a gumlang ai amu ni hpe ngai mara raw dat ya na nngai.
9 Yerusalem mare masha ni hte ndai mare a ngamu ngamai na lam a matu, ngai galaw ai mai kaja ai amu ni a lam, shanhte na ma ai shaloi, mungkan ga na amyu baw shagu hte gaw hkrit gari wa na mara ai; Yerusalem gaw nye a matu kabu gara ai, arawng sadang hkam la ai hte gumrawng shara hka hpawk tai na ra ai,? ngu nna tsun ai.
10 Dai Madu gaw, ?Ndai shara gaw zaibru jang zawn rai mat nna, dai shara ni hta shanu nga na mare masha ni hte yam nga ni hpa mung n nga ai sha, shingran katsi ai shara tai mat nga sai nga nna amyu masha ni tsun nga ma ai. Dai byin ai lam gaw teng nga ai; Yuda mare ni hte Yerusalem mare lam ni gaw shingran sharat katsi nga ai hte mare masha ni mung, yam nga ni mung dai shara ni hkan shanu nga ai n rai. Rai ti mung, ndai shara ni hkan,
11 nang gaw kabu gara garu jahtau nsen, mani pyaw ai nsen hte kabu gara ai hkungran poi lusha sha ai nsen ni hpe kalang mi bai na lu na rin dai. Shanhte gaw nye a Nawku Htingnu de mahku hkungga ni la sa let mahkawn shakawn ai nsen hpe nang na lu na rin dai; shanhte gaw,
?Shi gaw mai kaja nga ai hte
shi a tsaw ra myit htani htana prat dingsa agrin nga ai majaw,
Chyahtum Chyalai N-gun Rawng ai dai Madu hpe chyeju dum mu,? ngu nna tsun na mara ai.
Ngai gaw ndai mungdan hpe shawng na hte maren, ngamu ngamai shangun na nngai. Dai Madu ngai nan tsun ni ai,? nga nna tsun wu ai. Ref 33:11: 1Hl 16:34; 2Hl 5:13; 7:3; Ezr 3:11; Shk 100:5; 106:1; 107:1; 118:1; 136:1.
12 Chyahtum Chyalai N-gun Rawng ai dai Madu gaw, ?Mare masha mung, yam nga ni mung n nga ai shingran sharat katsi ai zaibru jang zawn rai nga ai ndai lamu ga hta, sagu rem ai ni shanhte a sagu ni hpe rem lu na matu, tsit lali ai udat shara ni kalang mi bai nga wa na mara ai.
13 Bum ga na mare ni, layang ga na mare ni, Yuda mung dingda maga de na mare ni, Benyamin mungdaw, Yerusalem makau grup yin na kahtawng ni hte Yuda mung na mare ni hta sagu rem ai ni gaw shanhte a sagu ni hpe kalang mi bai hti lu na mara ai. Dai Madu ngai nan tsun ni ai,? ngu nna tsun ai.
14 Dai Madu gaw, ?Israela hte Yuda amyu masha ni hpe ngai tawn da ai ga sadi hpe ngai shadik mat wa na aten gaw du wa ra ai. Ref 33:14-16: Yer 23:5-6.
15 Dai aten hta ding hpring ai Dawi a aru arat hpe hkawhkam hku nna ngai lata san da na nngai. Dai hkawhkam wa gaw mungdan ting hta ding hpring ai hte teng man ai hku bungli daw dan na ra ai.
16 Yuda hte Yerusalem na amyu masha ni gaw hkye mawai la ai hkrum nna shim lum ai hte shanu nga na mara ai. Dai mare hpe mung ?Anhte a hkye hkrang la Madu? ngu nna shamying na mara ai.
17 Israela a hkawhkam hkaw dung na matu, Dawi a aru arat ni tut nawng e aprut nga na mara ai; Ref 33:17: 2Sa 7:12-16; 1Hk 2:4; 1Hl 17:11-14.
18 Ngai hpe nawku daw jau na hte wan nat hkungga, lusha hkungga hte shagu hkungga ni hpe nat nawng na matu Lewi amyu baw hta na hkinjawng ni tut nawng e anga nga na mara ai,? nga nna dai Madu ga sadi jaw wu ai. Ref 33:18: Bhk 3:5-10.
19 Dai Madu gaw ngai hpe,
20 ?Ngai gaw shani hte shana hte ga shaka tawn da ni ai, dai gaw shanhte hpe masat da ai ahkying hta tut nawng hkawm nga na ra ai; ga shaka tawn ai shani hte shana gaw galoi mung galai shai mat na ra ai n rai.
21 Dai hte maren, nye a shangun ma Dawi a hkaw hta hkawhkam hkaw dung na aru arat langai mi hpe tut nawng san da na lam, ngai Dawi hte ga shaka tawn da ni ai. Lewi amyu baw kaw na hkinjawng ni ngai hpe tut nawng e daw jau na matu, shanhte hte ngai ga shaka tawn da ni ai; dai ga shaka ni gaw galoi mung hten mat na ra ai n rai.
22 Ngai gaw nye a shangun ma Dawi a aru arat ni hpe mung, Lewi amyu bawsang kaw na hkinjawng ni hpe mung shalaw jahtam na nngai, shing rai lamu na shagan ni hte panglai zaibru ni hpe hti yu na matu n mai byin ai zawn, shanhte law htam wa na mara ai,? ngu nna tsun ai.
23 Dai Madu gaw ngai hpe,
24 ?Ndai ngai lata san da sai dinghku amyu lahkawng rai nga ai Israela hte Yuda hpe ngai kau da ni ai nga nna masha ni kade tsun nga ma ai hpe nang myit dum yu nga n ni? Shanhte gaw nye a amyu masha ni hpe n kaw n law rai mada yu ma ai; shanhte hpe amyu langai mi zawn loi mi pyi n myit nawn da ma ai.
25 Rai ti mung, dai Madu ngai nan shani hte shana hpe ga shaka ai hte mung, ginding aga hte sumsing lamu hpe up hkang na tara ni hpe mung ngai tawn da ni ai.
26 Dai amu hpe ngai tup hkrak galaw ni ai zawn, ndai nye a ga shaka hpe Yaku a aru arat ni hte mung, nye a shangun ma Dawi hte mung, ngai shangang shakang da na nngai. Abraham, Isak hte Yaku ni a aru arat ni a ntsa e up hkang na matu Dawi a aru arat langai mi hpe ngai lata san da na nngai. Ngai gaw nye a amyu masha ni hpe matsan dum nna shanhte hpe kalang mi bai ngamu ngamai shangun na nngai,? ngu nna tsun ai.