31
1 Dai Madu gaw, ?Ngai gaw Israela amyu bawsang ni yawng a Karai Kasang tai nna, shanhte gaw nye a amyu masha ni tai wa ai shaloi dai aten gaw du wa na ra ai.
2 Si hkrung si htan kaw na lawt wa ai amyu masha ni hpe nam mali e matsan dum la ai lam ngai madun dan ni ai. Israela amyu masha ni ban sa la na matu marit nga ma ai shaloi,
3 ngai gaw tsan tsan kaw nna shanhte hpang de dan pru ni ai. Israela amyu masha ni e, ngai gaw nanhte hpe tut nawng e tsaw ra nga nngai majaw nanhte hpe nye a dinggrin tsaw ra myit matut madun na nngai.
4 Ngai gaw nanhte hpe kalang mi bai de da na mawe ai. Nanhte gaw kalang mi bai chying bau ni dum let kabu gara ai hte ka manawt lu na rai myit dai.
5 Nanhte gaw Samari bum ntsa hkan e, sabyi sun ni kalang mi bai hkai lu nna sabyi sun galaw ai ni gaw sabyi sun kaw nna pru ai asi ni hpe sha lu na marin dai.
6 Rai sa, Ehprim bum ntsa hkan e sin nga ai masha ni gaw, ?Ziun bum e nga ai dai Madu anhte a Karai Kasang hpang de anhte rawt lung wa saga, nga nna marawn tsun ai aten du wa na ra ai,?? nga ai.
7 Dai Madu gaw,
?Amyu baw ni hta galu kaba htum ai Israela a matu
kabu gara ai hte mahkawn mangoi nga mu.
?Dai Madu gaw shi a amyu masha ni hpe hkye hkrang la nu ai hte,
naw ngam nga ai ni hpe mawai la nu ai majaw, mahkawn shakawn kungdawn nga mu.?
8 Ngai gaw shanhte hpe dingdung maga de nna woi wa nhtawm,
lamu ga htum ai shara kaw nna shanhte hpe shinggyin da na nngai.
Myi n mu ai ni hte lagaw hten ai ni,
hkum gawng li ai num ni hte shinggyim machyi hkrum ai num ni gaw shanhte hte rau sa wa na mara ai.
Shanhte gaw amyu kaba bai tai wa na mara ai.
9 Nye a amyu masha ni gaw hkrap ai hte nhtang wa na mara ai;
akyu hpyi ai ni hpe ngai bai woi wa na nngai.
Ngai gaw hka kau lam hku ahtu kataw shara n nga hkra tsawm htap manu ai
lam hte shanhte hpe woi lakawn wa na nngai.
Ngai gaw Israela a kawa rai nga nngai;
Ehprim gaw nye a kasha alat rai nga ai,? ngu nna tsun ai.
10 Dai Madu gaw,
?Masha amyu ni e, nye a ga madat mara mu;
nye a mungga hpe sumtsan zunlawng ni de hkaw tsun mu.
Ngai gaw nye a amyu masha ni hpe shabra kau nngai, rai ti mung, ngai shanhte hpe bai shinggyin da na nngai,
sagu rem ai wa gaw sagu hpung hpe bau rem nga ai zawn, ngai mung shanhte hpe bau rem nga na nngai.
11 Ngai gaw Israela amyu masha ni hpe shalawt dat ni ai,
shanhte hpe n-gun chyalai ja ai amyu baw a lata kaw na hkye mawai la ni ai.
12 Shanhte gaw Ziun bum ntsa de du wa nna, kabu gara mahkawn mangoi na mara ai,
shanhte gaw nye a kumhpa ngu ai
nai mam nsi naisi, sabyi ntsin hte tsanlun sau,
sagu kasha hte dumsu kasha ni hpe ra sharawng na mara ai.
Shanhte gaw hka atsawm sha jaw ai sun zawn tai nna;
shanhte hta ra kadawn nga ai lam shagu hkam la lu na mara ai.
13 Dai hpang, numsha ni gaw ka manawt ai hte kabu gara na mara ai,
lasha kaji kaba ni gaw kabu gara na mara ai.
Ngai gaw shanhte hpe shalan shabran ai hte shanhte a sharung shayawt ai hpe kabu gara lam shatai ya na nngai,
shanhte a yawn hkyen ai hpe kabu pyaw shangun na nngai.
14 Ngai gaw hkinjawng ni hpe mu htum ai lusha hte jahpring ya na nngai,
nye a amyu masha ni a ra kadawn ai lam yawng hpe myit shadik ya na nngai.
Dai Madu ngai nan tsun ni ai,? ngu nna tsun ai.
15 Dai Madu gaw,
?Rama shara hta nsen langai na lu nga ai,
dai nsen gaw ja ja hkrap agru ai nsen rai nga ai.
Rahkela gaw shi a kashu kasha ni a matu hkrap shabam nga ai;
shanhte n nga mat masai,
shi gaw shalan shabran na hpe ningdang nga ai. Ref 31:15: Nin 35:16-19.
16 Na a hkrap ai hpe shangap kau u
na a myi prwi hpe katsut kau u.
Na a nshu nsha ni a matu nang galaw sai lam yawng mayawng hte maren
shabrai n hkam la na ma ai n rai;
shanhte gaw gumlau hpyen ni a mung kaw nna nhtang wa na mara ai.
17 Du na ra ai aten hta na a matu myit mada shara nga nga ai;
na a nshu nsha ni gaw dum nta de bai wa na mara ai.
Dai Madu ngai nan tsun ni ai.
18 ?Ngai gaw Israela a amyu masha ni tsun ai yawn hkyen nsen hpe na nngai,
Shanhte gaw, ?Madu e, anhte gaw zai ai dusat zawn rai mat saga ai,
rai ti mung, nang gaw anhte hpe madat mara na matu sharin ya nga nit dai.
Anhte hpe woi nhtang wa mi;
anhte gaw dai Madu anhte a Karai Kasang hpang de nhtang wa na matu
jin jin rai nga saga ai.
19 Anhte gaw nang kaw na kayin mat wa ga ai,
rai ti mung, kade n na yang, bai nhtang wa na matu ra sharawng nga ga ai.
Nang anhte hpe ari jaw ngut ai hpang,
anhte a baw ni gaw yawn hkyen ai hta dukrung taru nga saga ai.
Anhte gaw prat naw ram nga yang, anhte galaw shut kau ai yubak mara ni a majaw,
kaya kahpa hte jahpoi jahpyak ai hkrum nga saga ai,? nga tsun ma ai.
20 ?Israela e, nang gaw nye a tsaw ra dik htum ai kasha rai nga ndai
ngai tsaw ra dik htum ai ma mung rai nga ndai.
Na a amying hpe ngai tsun shaga ai aten shagu,
nang hpe tsaw ra myit hte sha ngai sumru nngai.
Nye a myit masin nang hta myit kap nga ai rai nna,
nang hpe matsan dum na nngai.
21 Masat kumla jung u, lam nmaw masat tawn u;
nang pru mat wa ai lam hpe bai sagawn u.
Israela amyu masha ni e, nhtang wa marit,
nang shakram kau da ai mare, buga dum nta de wa marit.
22 Sadi n dung ai amyu masha ni e, galoi aten du hkra kanung nga na ngu myit ni?
Ngai gaw ningnan re ai hte shai ai lam lama mi hpe hpan da ni ai,
dai gaw numsha gaw lasha hpe makawp maga nga ai zawn shai nga ai,? ngu nna tsun ai.
23 Chyahtum Chyalai N-gun Rawng ai dai Madu Israela a Karai Kasang gaw, ?Amyu masha ni hpe shanhte a mungdan de ngai bai woi wa ai shaloi, shanhte gaw Yuda mung hte de a mare ni hkan,
?Dai Madu gaw Yerusalem a chyoi pra ai bum,
shi shanu nga ai chyoi pra ai shara hpe shaman ya nga u ga,? ngu nna kalang mi bai tsun lu na mara ai.
24 Amyu masha ni gaw Yuda mung hte de a mare ni yawng hkan shanu nga na mara ai; dai shara ni hta sun galaw sha ai ni hte shanhte a sagu hpung ni hpe rem nga ai ni nga nga na mara ai.
25 Ngai gaw hki ba hkrum ai ni hpe n-gun nnan awai ya nhtawm kawsi hpang gara hkrum nna n-gun kya nga ai masha shagu hte hpe lusha hte jahkru shakat ya na nngai.
26 Dai rai nna, amyu masha ni gaw, ?Ngai gaw yup ra shang lu ni ai; n-gun nnan awai la lu ai hte bai hprang wa ni ai,? nga nna tsun na mara ai.
27 ?Dai Madu ngai gaw Israela mung hte Yuda mung hta amyu masha ni hte yam nga dusat ni hte jahpring da na aten du nga sai, ngu nna tsun nngai.
28 Shanhte hpe baw kau na, agrawp daw kau na, gale galau kau na, jahten sharun kau na hte jahten shabyak kau na matu ngai galaw ai hte maren, shanhte hpe hkai da na hte bai de da na matu mung ngai bai galaw na nngai.
29 Dai aten du ai shaloi, amyu masha ni gaw,
?Kanu kawa ni gaw hkri ai sabyi si ni sha ma ai,
Rai ti mung, kashu kasha ni gaw wa makrim na ma ai,? nga nna galoi mung tsun na mara ai n rai. Ref 31:29: Eze 18:2.
30 Shing ngu tsun na malai, kadai rai ti mung hkri ai sabyi si ni hpe sha ai wa gaw wa makrim na ra ai, shi galaw ai yubak a majaw langai hte langai si na mara ai,? ngu nna dai Madu ngai nan tsun ni ai.
31 Dai Madu gaw, ?Israela hte Yuda amyu masha ni hte ngai ga shaka ningnan tawn da ai aten gaw du wa na ra ai. Ref 31:31: Mat 26:28; Mrk 14:24; Luk 22:20; 1Ko 11:25; 2Ko 3:6. Ref 31:31-34: Heb 8:8-12.
32 Dai ga shaka gaw ngai shanhte hpe Egutu mung kaw nna lata hte dun wa nhtawm shanhte hpe woi shapraw wa ai shaloi, shanhte a kaji kawa ni hte tawn da ai ga shaka zawn n rai. Ngai gaw shanhte a matu madu wa zawn rai nga ti mung, shanhte gaw dai ga shaka hpe run kau ma ai.
33 Israela amyu masha ni hte tawn da na ga shaka ningnan gaw ndai rai nga ai: Ngai gaw shanhte kata hta nan nye a tara hpe tawn da ai hte dai hpe shanhte a kraw lawang ni hta e ka da na nngai. Ngai gaw shanhte a Karai Kasang tai nna shanhte gaw nye a amyu masha ni tai na mara ai. Ref 31:33: Heb 10:16.
34 Kaji htum ai kaw na kaba htum ai du hkra, nlang hte gaw ngai hpe chye wa na mara ai majaw, dai Madu a lam chye na na matu shanhte kaw na langai wa mi mung shi a htingbu ni hpe sharin achyin ya ra na n rai. Ngai gaw shanhte a yubak mara ni hpe raw dat kau ya nna shanhte a shut hpyit ai amu ni hpe galoi mung dum nga na nngai n rai. Dai Madu ngai nan tsun ni ai.? Ref 31:34: Heb 10:17.
35 Dai Madu gaw shani nhtoi a matu ajan,
shana e htoi ya na matu shata hte shagan ni hpe tawn da nga ai.
Shi gaw panglai ni hpe kabrawng dat nna dai hpe wu kadu shangun nga ai;
shi a amying gaw Chyahtum Chyalai N-gun Rawng ai dai Madu rai nga ai.
36 Mungkan shingra htung tara agrin nga dingsa
Israela amyu masha ni amyu baw langai hku agrin nga na ra ai nga nna shi ga sadi tawn da nga ai.
37 Lani mi na nhtoi hta, sumsing lamu hpe shadawn lu nna
ginding aga a npawt nhpang ni hpe sawk yu lu ai rai yang chyu sha,
Israela amyu masha ni shanhte yawng galaw sai amu a majaw
shi kabai kau na ra ai.
38 Dai Madu gaw, ?Hananela langchyi kaw nna mare Jut Chyinghka du hkra, Yerusalem mare hpe nye a mare zawn bai gaw gap ai nhtoi du wa na ra ai.
39 Mare jarit gaw dai kaw nna Gareb kawng de du hkra, dai hpang Goa shara hpe matut shinggrup da na ra ai.
40 Si ai ni hpe makoi mayang ai lupwa hte maza mala ni hpe kabai sumpum da ai kadit ting hte sinpraw maga Gumra Chyinghka du hkra Kidron hkaraw ntsa hkan na sun ni yawng gaw nye a chyoi pra ai shara ni tai na mara ai. Dai mare gaw galoi mung bai run kau ai hte jahten shabyak kau ai hkrum na n rai,? nga nna tsun ai.