14
1 Dai Madu gaw jan gri ai hte seng nna ngai hpe,
2 ?Yuda mung gaw sharung shayawt nga nna
de a mare ni gawng kya taw nga sai,
de a amyu masha ni gaw yawn hkyen ai hte ga ntsa e kaleng taw nga ma ai,
Yerusalem gaw karum la na matu hkrap shabam nga ai.
3 Sut su ai masha ni gaw shanhte a shangun ma ni hpe hka ja shangun ma ai;
shanhte gaw hka lawng de sa ma ai,
rai ti mung, hka n mu tam ma ai;
shanhte gaw di bu kaman sha hte nhtang wa ma ai.
Shanhte gaw myit daw ai hte ashuk ashak byin nna myi man magap da ma ai.
4 Dai shara hta marang n htu,
lamu ga hkun hkraw mat ai majaw
hkauna galaw ai ni myit yu machyi nga ma ai;
shanhte a myi man ni hpe makoi da nga ma ai.
5 Pa layang ni hta ushat n nga ai majaw,
chyahkyi kanu gaw shi a kasha
hkalung hpe kau da nga ai.
6 Lawze nhprang ni gaw kawng pungding ntsa hkan e
tsap nga nna, gwi ma-a ni zawn nbung marawp nga ma ai;
shanhte hta lusha shahpa n nga ai majaw,
shanhte a myi ni amam mat nga malu ai.
7 Nye a amyu masha ni gaw ngai hpe,
?Anhte a yubak mara ni anhte hpe mara shagun tim pyi,
Madu e, na a ga sadi hte maren, anhte hpe karum la mi.
Anhte gaw nang kaw na law law lang kayin mat wa saga ai;
anhte gaw nang hpe shut hpyit kau saga ai.
8 Nang chyu sha Israela a myit mada shara rai nga ndai;
nang gaw anhte hpe ru yak tsin-yam tsindam kaw na hkye hkrang la ai wa rai nga ndai.
Nang gaw anhte a mungdan kata hta manam zawn mung,
lana mi chyu sha shingbyi shalai ai bu hkawm wa zawn hpa majaw tai nga n ta?
9 Nang gaw hpa majaw mau mak mat ai hte
karum la na matu n-gun n rawng ai hpyenla wa zawn tai nga n ta?
Kaja wa tsun ga nga yang, Madu e, nang gaw anhte hte rau nga nga ndai!
Anhte gaw na a amyu masha ni rai nga ga ai;
anhte hpe hkum kau da nga et,?? ngu nna jahtau tsun ma ai.
10 Dai Madu gaw ndai amyu masha ni hte seng nna, ?Shanhte gaw ngai kaw nna hprawng mat wa na ra sharawng ma ai; shanhte gaw tinang hkum ni hpe hkang lu na mara ai n rai. Dai majaw, ngai gaw shanhte hpe awng sharawng nga nngai n rai. Shanhte galaw shut kau sai mara ni hpe ngai dum nga nna shanhte a yubak ni a majaw shanhte hpe ari jaw na we ai,? nga nna ngai hpe tsun ai.
11 Dai Madu gaw ngai hpe, ?Ndai amyu masha ni hpe karum la na matu ngai hpe hkum hpyi nga et.
12 Shanhte lusha gam tim pyi, ngai gaw karum la na matu shanhte a hpyi jahtau ai nsen hpe madat ya na n rai; shanhte gaw ngai hpe wan nat hkungga hte lusha hkungga ni hpe nawng jau yang pyi gaw, dai ni hta ngai awng sharawng nga na nngai n rai. Shing rai na malai, ngai gaw shanhte hpe majan, kawsi hpang gara ai hte ana zinli ni hte sat kau na we ai,? ngu nna tsun ai.
13 Dai hpang, ngai gaw, ?Tsaw Htum ai Madu e, nang ga sadi tawn da nit dai hte maren, shanhte gaw anhte a mungdan hta ngwi pyaw sim sa ai chyu sha a nga nga na ra ai nga nna tsun ma ai majaw, myihtoi ni gaw amyu masha ni hpe majan hte kawsi hpang gara ai hkrum na n rai, nga nna tsun nga ma ai hpe nang chye nga ndai,? ngu nna tsun ni ai.
14 Rai ti mung, dai Madu gaw, ?Dai myihtoi ni nye a mying hta masu magaw ga ni hpe tsun nga ma ai; ngai shanhte hpe shangun ai n rai, ngai gaw shanhte hpe hkang dat na hte tsun shaga na ga hkum ni a matu ahkang aya ap ya ai n rai. Shanhte tsun shaga ai shingran ga ni gaw ngai kaw na n rai; shanhte tau nna tsun ai shaba wawt ai lam ni gaw shanhte myit sawn la ai kaman lila amu ni rai ma ai.
15 Dai Madu ngai gaw ndai mungdan hta majan hte kawsi hpang gara hpa mung hkrum hkra na ra ai n rai nga nna, ngai n shangun ti mung nye a amying gang let tsun ai ndai myihtoi ni hpe ngai galaw sa wa na amu, dai Madu ngai nan nang hpe tsun dan na nngai- Ngai gaw shanhte hpe majan hte kawsi hpang gara hkrum shangun ai hte sat kau na nngai.
16 Shanhte tsun shaga ai ga ni hpe hkan hta la ai amyu masha ni gaw dai hte maren sat kau ai hkrum na mara ai. Shanhte a moi mang ni gaw Yerusalem lam nmaw ni hkan kabai tawn ai hkrum nna, shanhte hpe lup makoi na masha langai mi mung nga na n rai. Ndai lam ni gaw shanhte a madu jan ni, shadang sha ni hte shayi sha ni yawng hta byin wa na mara ai. Shanhte a n hkru ai amu a shabrai, ngai shanhte hpe jaw na we ai,? nga nna tsun ai.
17 Dai Madu gaw nye a yawn hkyen ai lam hpe ning ngu amyu masha ni hpe tsun na matu ngai hpe hkang da nga ai:
?Nye a myi prwi ni shani shana lwi nga u ga,
ngai gaw galoi mung n sim n sa hkrap ngu hkrap ngoi nga u ga;
hpa majaw nga yang, nye a amyu masha ni gaw grai sawng hkra hkala nba hkrum ai hte
laja lana re machyi hkrum nga sai.
18 Ngai pa layang ni de pru hkawm ai shaloi,
majan hta sat hkrum sai masha ni a moi mang ni hpe ngai mu nngai;
Ngai mare ni de pru hkawm ai shaloi,
kawsi hpang gara nna si ai masha ni hpe mu nngai.
Myihtoi ni hte hkinjawng ni shanhte a amu matut galaw ma ai,
rai ti mung, shanhte gaw shanhte hpa galaw nga ai n chye ma ai.?
19 Madu e, nang gaw Yuda mung hpe atsai awai kau da nu ni?
Nang gaw Ziun amyu masha ni hpe n dawng nga n ni?
Anhte n mai wa lu hkra nang anhte hpe hpa majaw
laja lana di machyi shangun mi ta?
Anhte gaw ngwi pyaw sim sa lam hpe tam ga ai,
rai ti mung mai kaja ai amu hpa mung n byin wa nga ai;
anhte gaw shamai shatsai hkrum na matu myit mada ga ai, rai ti mung
de a malai, hkrit hpa lam pru wa nga sai.
20 Madu e, anhte gaw nang hpe shut saga ai;
anhte gaw anhte nan galaw ai yubak mara ni hte
anhte a kaji kawa ni a yubak ni hpe yin la ga ai.
21 Na a ga sadi ni hpe adum nga u, anhte hpe hkum matsat kau nga et;
na a hpung shingkang tingnyang shara nga ai Yerusalem hpe kaya hkum jahkrum nga et.
Nang anhte hte galaw da nit dai ga shaka hpe hkum jahten kau nga et.
22 Masha amyu baw ni a hpara sumla ni kadai mung marang n lu jahtu ya nga ai;
lamu gaw shi hkrai marang jahtu lu nga ai n rai;
O Madu anhte a Karai Kasang e, anhte gaw nang hpe myit mada nga ga ai.
hpa majaw nga yang, nang gaw ndai amu ni hpe galaw ai wa nan rai nga ndai.