YONA LAIKA
(JONAH)
Ga Nhpaw
Yona Laika gaw Chyum Laika na kaga myihtoi laika ni hte n bung ai, dai gaw maumwi rai nna, Karai Kasang a hkang da ai ga hpe n madat ai myihtoi langai mi a sak dan galaw ai amu hpe ka matsing da ai laika rai nga ai. Karai Kasang gaw Yona hpe Israela a hkrit tsang hpyen rai nga ai Asuri mungdan a mare daju Ninewe mare de sa na matu hkang dat wu ai. Rai ti mung shi gaw dai mare de Karai Kasang a mungga gun let n kam sa wu ai, hpa majaw nga yang, Karai Kasang gaw dai mare hpe jahten shaza kau na matu jahkrit shama da ai hte maren n galaw na re ngu nna shi a myit hta hkawn da wu ai. Byin wa ai lam amyu myu a hpang e, shi gaw grai n kam ai hte madat nga ai, hten za mat na ngu ai shi a mungga n dik wa ai shaloi, jahtum e shalu mat wu ai.
Ndai laika gaw Karai Kasang shi hpan da ai a ntsa e shi a awng dawm ahkang aya lu ai lam hpe madun dan nga ai. Rai ti mung, grau nna Karai Kasang gaw tsaw ra matsan dum nna shi a amyu masha ni a gumlau hpyen ni hpe pyi ari jaw nna jahten kau na malai mara dat nna hkye la mayu ai wa rai nga ai lam hpe shadan dan ai laika rai nga ai.
1
1 Lani mi hta, Amihtai a kasha Yona hpe dai Madu ga shaga wu ai. Ref 1:1: 2Hk 14:25.
2 Shi gaw, ?Kaba la ai Ninewe mare de sa nna ninghkap ai ga tsun su; Ngai gaw dai mare masha ni kade daram n hkru nga ai lam chye nga nngai,? ngu nna tsun wu ai.
3 Yona gaw gara hku mi rai tim, dai Madu a man kaw na hprawng mat wa lu na matu kaga shara de sa mat wa wu ai. Shi gaw Yopa de sa wa nna dai shara e Spain mung de sa wa hkyen ai sanghpaw li langai sa mu wu ai. Shi gaw Karai Kasang a man kaw na hprawng mat wa na nga li jahpu jaw nna Spain mung de sa mat wa na matu sanghpaw masha ni hte rau sanghpaw li ntsa de shang mat wa wu ai.
4 Rai ti mung dai Madu gaw ja la ai nbung shangun dat ai rai nna dai nbung laru gaw grai ja ai majaw sanghpaw li gaw agrawp mat na daram hkrit tsang ra nga ai.
5 Sanghpaw masha ni hkrit kajawng mat nna tinang nang a hpara shagu kaw karum la na matu hpyi jahtau ma ai. Dai hpang sanghpaw li n lup mat u ga, ntsa na arai ni hpe panglai hta kabai bang kau ma ai. Shing rai galaw nga yang, Yona gaw sanghpaw li a kata gawk de shang nna kaleng yup pyaw nga ai.
6 Li agyi wa dai yang e shi hpe mu nna shi hpe, ?Nang hpa rai yup nga n ta? Rawt nna karum la lam a matu na a karai kaw akyu hpyi u. Shi mi she anhte hpe myit dum nna anhte a asak ni hpe shalawt la dam nhten,? ngu nna tsun wu ai.
7 Sanghpaw masha ni gaw shanhte shada da, ?Anhte hpe ndai tsin-yam tsindam hkrum shangun ai wa gaw kadai rai nga ai hpe mara shagun lu na matu hpaida da nna tam yu ga,? nga nna tsun hkat ma ai. Shanhte dai hku galaw ma yang, Yona hta ang wa nga sai.
8 Dai rai nna, shanhte gaw shi hpe, ?Ya, dai rai yang gaw, anhte hpe tsun dan mi! Ndai lam kadai hpe mara shagun na rai ta? Nang gaw nang e hpa galaw nga n ta? Nang gaw gara mung na sa wa n ta? Nang gaw hpa baw amyu masha rai n ta?,? ngu nna tsun ma ai.
9 Yona gaw, ?Ngai gaw Hebre masha rai nga nngai. Ngai gaw hkarang hte panglai hpe hpan da ai dai Madu sumsing lamu a Karai Kasang hpe nawku nngai,? ngu nna htan wu ai.
10 Yona gaw matut nna dai Madu kaw na shi hprawng mat wa ai lam shanhte hpe tsun dan wu ai.
Sanghpaw masha ni hkrit gari mat ma ai hte shi hpe, ?Dai gaw hkrit hpa amu langai rai nga a hka!,? ngu nna tsun ma ai.
11 Nbung laru gaw aten tup grau grau sawng wa nga ai, dai rai nna sanghpaw masha ni gaw shi hpe, ?Nbung laru hkring mat hkra, anhte nang hpe kaning di na rai ga ta?,? ngu nna san ma ai.
12 Yona gaw, ?Ngai hpe panglai hka de kabai bang kau mi, shaloi dai hka sim mat wa na ra ai. Ndai nanhte hkrum ai laru kaba gaw nye a mara a majaw rai nga ai hpe ngai chye nngai,? ngu nna htan wu ai.
13 Shing di na malai, sanghpaw masha ni gaw sanghpaw li hpe hkin-gau de du hkra shanhte a n-gun tup hte shap shaja ma ai. Rai ti mung, dai laru gaw grau grau sawng wa ai majaw shanhte n dang di lu ma ai.
14 Dai rai nna shanhte gaw dai Madu hpe, ?O Madu e, ndai masha wa a asak dan ya ai majaw, anhte hpe ari n jaw mi ga, anhte hpyi nem ga ai! O Madu e, nang gaw ndai amu yawng a matu lit lu nga ndai, dai gaw nang galaw ai amu rai nga ai,? ngu nna jahtau tsun ma ai.
15 Dai hpang shanhte gaw Yona hpe hpai la nhtawm panglai hta kabai bang kau mu ai rai nna, dai hka gaw kalang lata sim mat nga ai.
16 Ndai amu a majaw, sanghpaw masha ni dai Madu hpe grai hkrit mat ma ai rai nna shanhte gaw shagu hkungga nawng ya ai hte shi hpe daw jau na matu ga sadi jaw ma ai.
17 Dai Madu hkang da ai ga hte maren, nga kaba langai gaw Yona hpe mayu kau ai rai nna shi gaw nga kan kata hta masum ya masum na rawng nga ai.