9
1 Gidon a kasha Abimelek gaw shi kanu a makyin jinghku ni yawng nga ai Shehkem mare de sa wa nhtawm Shehkem masha ni hpe san yu na nga,
2 shanhte hpe, ?Gidon a kasha sanit shi hte ting up hkang na hta langai sha up na gara mahtang nanhte ra sharawng nga myit ni? Abimelek chyawm gaw nanhte a shan, nanhte a asai majing nan rai nga ai hpe dum mu,? ngu nna tsun wu ai.
3 Shi kanu a makyin jinghku ni mahtang Shehkem masha ni hpe shi a matu dai lam tsun ya mu ai rai nna mung, shi nan shanhte a jinghku rai nga ai majaw mung, Shehkem masha ni gaw Abimelek a hpang hkan na daw dan da ma ai.
4 Shanhte gaw shi hpe Bala Ga Shaka htingnu kaw na gumhpraw sanit shi shaw ya dat ma ai rai nna gumhpraw dai hte shi matut mahkai na masha gumbyak hpung mi hpe saw la wu ai.
5 Shi gaw Ohpra mare e nga ai shi a kawa a nta de wa nna, Gidon a shadang sha ni ngu na shi a hpu nau sanit shi hte hpe lunghtawn langai mi a ntsa e sat sharu kau wu ai. Rai ti mung, Gidon a shadang sha hpungdim ngu na Yohtam chyawm gaw makoi nga ai majaw sat kau hkrum wu ai n rai.
6 Dai hpang Shehkem masha ni yawng hte Betmilo mare na masha ni jawm zup hpawng nhtawm, Shehkem mare e nga ai chyoi pra ai wamyi hpun de sa nhtawm Abimelek hpe hkawhkam aya dang ya ma ai.
7 Dai lam Yohtam na jang, Gerizim bum pungding e shi lung tsap nhtawm shanhte hpe, ?Shehkem masha ni e, nye a ga madat mu; Karai Kasang gaw nanhte a ga madat ya malit ga law!
8 Moi lang mi, hpun ni shanhte a matu hkawhkam langai mi lata san da na nga, jawm hpawng ma ai. Shaloi shanhte gaw tsanlun hpun hpe, ?Anhte a hkawhkam tai ya mi,? ngu nna tsun ma ai.
9 Dai tsanlun hpun mahtang, ?Nanhte hpe up hkang na matu karai ni hpe mung, shinggyim masha ni hpe mung shagrau sha-a ai hta lang ai nye a sau shapraw ya ai amu hpe ngai jahkring kau na rai nga a ni?,? ngu nna htan wu ai.
10 Dai hpang hpun ni gaw maihpang hpun hpe, ?Nang sa nna anhte a hkawhkam tai ya mi,? ngu nna tsun ma ai.
11 Rai ti mung, maihpang hpun mahtang, ?Nanhte hpe up hkang na matu nye a dwi ai namta hte kaja ai namsi shapraw ya ai amu hpe ngai jahkring kau na rai nga a ni?,? ngu nna htan wu ai.
12 Dai rai nna hpun ni mung sabyi ru hpe, ?Nang sa nna anhte a hkawhkam tai ya mi,? ngu nna tsun ma ai.
13 Rai ti mung sabyi ru gaw, ?Nanhte hpe up hkang na matu karai ni hpe mung, shinggyim masha ni hpe mung, kabu awng sharawng shangun ai nye a sabyi ntsin shapraw ai hpe ngai jahkring kau na rai nga a ni?,? ngu nna tsun wu ai.
14 Dai rai nna hpun ni yawng gaw ju hpun hpe, ?Nang sa nna anhte a hkawhkam tai ya mi,? ngu nna tsun ma ai.
15 Ju hpun gaw, ?Nanhte teng teng ngai hpe hkawhkam shatai mayu myit yang gaw ngai kaw sa nna nye a shingnip hta shingbyi nga mu. Nanhte n sa myit yang gaw dai ju hpun lakung lakying hta na wan hkru wa nhtawm Lebanon arit hpun ni hpe pyi hkru kau na ra ai,? ngu nna htan wu ai.
16 Dai rai nna Yohtam gaw, ?Nanhte Abimelek hpe hkawhkam dang ya ai gaw nanhte hta teng teng ding man ai hte kang ka re ai myit rawng nga myit ni? Gidon hte shi a dinghku masha ni hpe hkungga lara rai myit dai hte shi galaw sai chyeju hpe ging dan ai hku htang myit yang gaw mai kaja nga ai, n rai ni?
17 Nanhte a matu nye wa majan gasat ya ai hpe mung, shi a asak dan let Midian masha ni a lata na nanhte hpe hkye hkrang la manit dai hpe mung adum nga mu.
18 Rai ti mung, nanhte dai ni nye wa a dinghku hpe nhtang gumlau nga manit dai. Shi a shadang sha sanit shi hte hpe lunghtawn langai sha hta nanhte sat kau manit dai. Shi a nchyang num kaw na kasha Abimelek rai nga ai majaw nanhte a hpu nau re ai hku shi hpe Shehkem hkawhkam shatai kau manit dai.
19 Dai rai nna nanhte dai ni Gidon hte shi a dinghku hpe ding man ai hte kang ka re ai hku galaw kau manit dai rai yang gaw, Abimelek hta kabu gara nga mu, shi mung nanhte hta kabu gara nga u ga.
20 Rai ti mung, dai hku n re ai sha, Abimelek kaw na wan grung pru wa nhtawm, Shehkem masha ni hte Betmilo ni hpe hkru kau u ga; dai hte maren, Shehkem hte Betmilo masha ni kaw na wan grung pru wa nhtawm Abimelek hpe hkru kau u ga,? ngu nna matut tsun wu ai.
21 Dai hpang shi gaw kahpu Abimelek hpe hkrit wu ai majaw hprawng mat wa nhtawm Bera e sa nga nga wu ai.
22 Abimelek gaw Israela hpe masum ning tup up lu wu ai.
23 Shaloi, Karai Kasang gaw Abimelek hte Shehkem masha ni langai hte langai a lapran e nhtan shai shangun ai hte shi hpe gumlau ma ai.
24 Gidon a kasha sanit shi hpe sat kau na matu Abimelek hpe Shehkem masha ni n-gun jaw ai majaw ndai lam byin sai. Shing re ai ru hka amu a mara hpe hkam la na rai ma ai.
25 Shehkem masha ni gaw Abimelek hpe mayun gyam na matu, bum pungding hkan e masha tawn da ma ai rai nna dai lam hku bu hkawm lai wa ai masha shagu hte hpe hkap hpya la ma ai. Dai lam Abimelek hpe shana ya ma ai.
26 Dai hpang Ebed a kasha Gala gaw shi a kahpu kanau ni hte rau Shehkem mare de du sa ma ai. Shehkem masha ni mung shi hpe kam hpa nga ma ai.
27 Shanhte yawng mung shanhte a sabyi sun ni de sa nhtawm, sabyi si di, sabyi ntsin shup shapraw let poi galaw ma ai. Shanhte gaw shanhte a hpara htingnu de shang nhtawm lu let, sha let Abimelek hpe jahpoi asawng ma ai.
28 Gala mung, ?Shehkem mare hta nga ai anhte gaw kaning re ai ni sha rai nga ga ta? Abimelek hpe hpa lam a majaw anhte daw jau ra ga ta? Shi gaw kaning re ai wa rai nga a ta? Gidon a kasha rai nga ai! Zebula chyawm gaw shi a ga hpe madat mara nga ai; rai ti mung anhte mahtang hpa lam a majaw shi hpe daw jau ang nga ga ni? Nanhte a amyu lakung lama daju kaji kawa Hamora a ntsa e sadi dung nga mu!
29 Ndai masha ni hpe ngai woi awn taw gaw le! Abimelek hpe ngai tsan kau na we ai! Ngai mung shi hpe, ?Na a hpyen luksuk hpe n-gun shalaw la nhtawm sa gasat rit!,? ? ngu nna tsun na we ai.
30 Gala tsun ai ga hpe mare up ai Zebula na wu ai shaloi shi masin pawt wu ai.
31 Aruma mare e nga ai Abimelek hpang de kasa ni hpe shangun dat nhtawm, ?Ebed a kasha Gala hte shi a kahpu kanau ni Shehkem mare e du nga masai rai nna nang hpe mare kata de n shang lu hkra shingdang da nga ma ai.
32 Dai majaw nang hte na a masha ni shana e rawt sa nhtawm yi sun ni hkan sa makoi gyem nga mu.
33 Hpang jahpawt jau jau jan pru ai hte rau mare hpe akajawng sha htim gasat myit. Gala hte shi a masha ni nang hpe hkap gasat na pru sa ma ai shaloi nang rai lu ai made shanhte hpe nyawp di kau u!,? ngu nna tsun wu ai.
34 Shaloi Abimelek mung shi a masha ni yawng hpe shana e rawt shangun nhtawm Shehkem mare shinggan e hpung mali garan nna makoi gyem nga ma ai.
35 Abimelek hte shi a masha ni gaw Gala pru wa nna mare chyinghka e tsap nga ai hpe mu ma ai shaloi makoi gyem nga ai shara kaw na shanhte rawt lung wa ma ai.
36 Gala gaw dai ni hpe mu ai shaloi, Zebula hpe, ?Yu u! Bum pungding ni de na masha ni yu hkrat wa mara ai!,? ngu nna tsun wu ai.
Shaloi Zebula gaw, ?Dai ni gaw masha n rai, bum a shingnip shingna ni she rai nga ai,? ngu nna htan wu ai.
37 Gala gaw, ?Yu u! Bum pungding kaw nna masha ni yu wa nhtawm, hpung mi mung gumhpan wamyi hpun kaw na lam dingyang sa wa nga ma ai!,? ngu nna tsun wu ai.
38 Dai hpang Zebula gaw shi hpe, ?Nang tsun ai ga kaba ni yawng ya kanang rai mat salit ta? Ndai Abimelek hpe anhte hpa lam a majaw daw jau ang na ga ta?, nga nna nang san yu nit dai n rai hka! Ndai masha ni gaw nang e n gawn n sawn ngu hkrum ai ni n rai nga ma hka! Ya pru sa nna shanhte hpe gasat sanu,? ngu nna tsun wu ai.
39 Gala mung Shehkem masha ni hpe woi nna Abimelek hpe gasat wu ai.
40 Abimelek gaw Gala a hpang hkan ai rai nna Gala hprawng mat wa wu ai. Masha law law ni pyi mare chyinghka lam e hkala hkrum nga ma ai.
41 Abimelek chyawm gaw Aruma e nga nga wu ai; Zebula gaw Gala hte shi a kahpu kanau ni hpe Shehkem mare kaw na gawt shapraw kau dat mu ai rai nna shanhte dai yang e loi mi mung n nga lu manu ai.
42 Hpang shani e, Shehkem masha ni pa layang de pru hkawm na hkyen nga ma ai hpe Abimelek mu wu ai rai nna,
43 shi gaw shi a masha ni hpe woi la nhtawm hpung masum di karan nna pa layang ni hta makoi gyem let ala nga ma ai. Masha dai ni mare kata kaw nna pru sa wa ai hpe shi mu wu ai shaloi shanhte gyem makoi nga ai kaw na pru nhtawm shanhte hpe sat kau mu ai.
44 Abimelek gaw shi a hpung mi hte mare chyinghka hta sin hkap na matu shawng de tin tin rawt sa mat wa yang, kaga hpung lahkawng gaw pa layang de nga ai masha ni hpe htim gasat nhtawm shanhte yawng hpe sat kau ma ai.
45 Majan gaw shani tup matut gasat nga ai rai nna, Abimelek gaw dai mare hpe gasat dang la kau ai hte mare masha ni hpe sat kau nhtawm mare hpe run kau ai hte aga hpe jum hte gat ka-up kau wu ai.
46 Shehkem mare na hpyen ninghkap dap hta woi awn nga ai masha ni yawng dai lam hpe na ma ai shaloi, Bala Ga Shaka htingnu na ngang ai hte shim ai shara hpe shanhte hkan tam nga ma ai.
47 Shanhte gaw dai yang e shinggyin rawng nga ai lam Abimelek hpe tsun dan ma ai;
48 dai rai nna shi a masha ni hte rau Zalmon bum de lung wa wu ai. Shi gaw ningwa langai la nhtawm hpun lakung ni kran hpai wu ai. Shi gaw shi galaw ai zawn alawan hkan galaw na matu shi a masha ni hpe tsun wu ai.
49 Shaloi langai hte langai gaw hpun lakung ni kran hpai nna Abimelek a hpang de hkan nhtawm dai ngang kang ai ninghkap shara hta sumpum tawn nna, dai hpe nat mu ai; shing rai kata e rawng nga ai masha ni hte dai ninghkap dap hta nga ai masha ni yawng ngu na lasha, numsha hkying mi, si htum mat ma ai.
50 Dai hpang Abimelek gaw Htebe mare hpe wang da nhtawm gasat dang la kau wu ai.
51 Ngang ai langchyi langai mare hta e nga nga ai rai nna, dai mare na numsha lasha nlang hte hte ningbaw ni du hkra dai de hprawng shang mat ma ai. Shanhte nan chyinghka la kau nhtawm ntsa htap de lung mat wa ma ai.
52 Abimelek mung dai langchyi hpe sa gasat let, dai langchyi hpe nat kau na nga, chyinghka lam de sit sa wu ai.
53 Rai ti mung, numsha langai mi shi a baw ntsa e htumrin nlung kabai jahkrat bun nna shi a pungkum nra ga mat lu ai. Ref 9:53: 2Sa 11:21.
54 Dai hpang shi gaw ri nhtu lang ai shabrang wa hpe alawan shaga la nna, ?Anum e sha me ngai hpe sat kau ni ai, ngu kau na ngai n ra nngai majaw na a nhtu shaw nna ngai hpe sat kau e,? ngu nna hkang da wu ai. Dai majaw dai shabrang wa shi hpe galun htinggrang dat wu ai hte shi si mat nga sai.
55 Abimelek si mat sai hpe Israela masha ni mu ma ai shaloi, shanhte yawng nta de nhtang mat wa ma ai.
56 Ndai hku nna shi a kahpu kanau sanit shi hpe sat nna shi a kawa hpe shut kau ai a ru hka amu a matu Karai Kasang gaw Abimelek hpe yubak matai htang jaw wu ai.
57 Gidon a kasha Yohtam gaw shanhte hpe matsa ai hte maren Shehkem masha ni shanhte nan galaw ai n hkru n shawp ai a matu Karai Kasang gaw shanhte hpe nni nkri jahkrum mu ai.