5
1 Dai shani e Debora hte Abinoam a kasha Barak yan gaw ning ngu nna mahkawn hkawn ma ai:
2 Dai Madu hpe shakawn mu!
Israela ni gaw gasat na matu daw dan nga masai;
amyu masha ni kabu gara ai hte tinang myit hku shang lawm nga ma ai.
3 Hkawhkam ni e, na la mu!
Up hkang du ni e, madat la mu!
Ngai gaw dai Madu Israela a Karai Kasang hpe
mahkawn let sumpyi dum shapyaw na nngai.
4 Madu e, nang gaw Seira bum ni kaw na pru nhtawm,
Edom ginwang kaw na pru sa wa ai shaloi,
ginding aga ashun nna lamu kaw na marang htu hkrat nga ai.
Rai sa, sumwi ni hta na hka ru hkrat wa nga ai.
5 Bum ni gaw Sina Bum e nga ai dai Madu a man e mung,
dai Madu Israela a Karai Kasang a man e mung gari ashun nga ai. Ref 5:5: Pru 19:18.
6 Anat a shadang sha Shamga a lak htak hte
Yaela a aprat hte hta,
hpaga nmaw lam katsi mat nna, bu hkawm ai ni
masun lam ni hpe she lang mat masai.
7 Israela a mare ni kau da hkrum ai hte tsap marawng nga sai,
Debora e, nang gaw Israela a matu kanu zawn nang du sa ai aten du hkra
dai mare ni kaman tsap nga sai.
8 Israela masha ni hpara nnan lata la ma ai shaloi,
mungdan kata majan pru nga ai;
Israela mun mali hta ninggang langai hpai lu a ni?
Nri langai hpai lu a ni?
9 Nye a myit masin gaw Israela du ni hte mung,
kabu gara myit hte tinang myit hku shang lawm nga ai ni hte mung rau rai nga ai.
Dai Madu hpe shakawn mu!
10 Lawze hpraw jawn ai ni,
gumra lahkum ni hta dung ai ni hte,
shara shagu hkan hkawm ai ni e, de a lam tsun dan mu.
11 Madat mu! Garu kachyi nga ai shawa masha ni gaw hka htung ni hpe shinggrup nhtawm,
dai Madu a awng padang lam ni hpe mung,
Israela amyu masha ni a awng padang lam ni hpe mung tsun dan nga ma ai.
Dai hpang Madu a amyu masha ni shanhte a mare ni kaw na yu sa ma ai.
12 Hprang u, Debora, hprang u!
Hprang u! Mahkawn mangoi u! Hprang u!
Abinoam a shadang sha Barak e, Shawng de rawt sa u,
Na a bawng masha ni hpe woi mat wa u!
13 Shaloi kam ging ai ni shanhte a ningbaw ni hpang de yu sa nna;
dai Madu a amyu masha ni gaw shi hpang de du sa nna htim gasat na jin jin rai ma ai.
14 Shanhte gaw Ehprim kaw nna kadit de yu sa nhtawm,
Benyamin amyu bawsang hte de a amyu masha ni a
hpang ningdim e hkan ma ai.
Mahkira kaw na hpyen du ni pru nhtawm;
Zebulun kaw na du salang ni yu wa nga ai.
15 Yisahka hta na ningbaw ni Debora hta lawm nna;
rai sa, Yisahka zawn Barak mung dan dawng nga ai,
shanhte gaw wora kadit de shi kaw hkan ma ai.
Rai ti mung Rubin amyu bawsang ni karan mat nna;
shanhte n lu daw dan hparan la nga masai.
16 Shanhte gaw hpa majaw sagu ni a shingdu e gyem nga ma ni?
Sagu hpung ni hpe shaga ai sagu rem ni a nsen madat mai ai n rai ni?
Rai sa, Rubin a amyu bawsang gaw ga karan mat nna,
shanhte n lu daw dan hparan la nga masai.
17 Gad a amyu bawsang gaw Yawdan hka a sinpraw hkran e nga nga ma ai,
Dan a amyu bawsang gaw sanghpaw li a majaw dung nan taw nga ma ai.
Ashe amyu bawsang mung panglai hkin-gau e nga nga ai;
shanhte gaw hka kau mayan hkan nga nga ma ai.
18 Rai ti mung Zebulun hte Naphtali amyu masha ni gaw
majan pa hta asak dan hkawm sa ma ai.
19 Megido hka shi makau na Tanak shara hta
hkawhkam ni sa gasat nga masai;
Hkanan hkawhkam ni gasat ma ai,
rai ti mung shanhte gaw gumhpraw lanep n hta ma ai.
20 Sumsing lamu na shagan ni mung shanhte a
lam hku hkawm lai nhtawm,
Sisera hpe gasat ma ai.
21 Kishon mawru hka ngu ai agre lwi ai Kishon hka
nu gaw shanhte hpe shayawng kau sai.
Ngai rawt lung wa na nngai, n-gun hte rawt shanang sa wa na nngai!
22 Dai hpang gumra ni gumtawng bukbak wa nhtawm,
dai ni a lagaw lahkru hkindit dukdak kadu malu ai.
23 Dai Madu a lamu kasa gaw, ?Meroza mare gaw dagam kau ai hkrum nu ga,
dai yang e nga ai ni dagam dala, hkrum mu ga,
Shanhte gaw shi a matu majan gasat na hpyenla ni hte
rau dai Madu hpe n sa karum la ma ai,? ngu nna tsun ai.
24 Keni masha Hebera a madu jan Yaela gaw
numsha danghta hta grau a htum lu nu ai;
sum ni hta nga ai numsha danghta ni hta grau a htum nu ai.
25 Sisera lu hka ntsin hpyi ti mung shi gaw chyu mahtang jaw wu ai; shi hpe tsawm ai ban hta
nga chyu sau pa sak jaw wu ai.
26 Shi gaw sum mailak hpe lata maga mi hte la
nna maga mi hta bungli galaw masha a sumdu lang da nga ai;
shi gaw Sisera a baw pungkum hpe adit grawp kau ai hte
shi a abaw hkrang hkra dit dinghkren ya wu ai.
27 Shi gaw lahput lagaw kya daw mat nna,
Yaela a galaw nhpang e kadawng taw nga sai.
Shi a lagaw nhpang e shi a lahput ni kya daw mat nna kadawng taw mat sai;
shi gaw ga e kadang mat nna si mat sai.
28 Sisera a kanu gaw hkuwawt hku mada yu let;
dai hkinchyi hku hku shingdu kaw na sa yu azi nhtawm,
?Hpa majaw shi a leng lau n du wa hkraw ai i?
?Hpa majaw shi a gumra leng ni nhtang wa maga de lanyan ma ai i?,? ngu nna san wu ai.
29 Shi a numsha manang ni shi hpe htan mu ai hte
shi gaw shi a kraw e lang hte lang ning ngu tsun wu ai:
30 ?Shanhte gaw lu la ai lanep arai ni hpe rim karan la na matu mung;
hpyenla shagu a matu mahkawn langai shing n rai lahkawng hpra hpra,
Sisera a matu jaw shatsawm da ai sumpan;
hkawhkam jan a du hta mawn ya na matu maka ka ai hpun palawng ni hpe chyu sha tam nga ma ai.?
31 O Madu e, na a gumlau hpyen ni yawng dai zawn si htum mat mu ga law,
rai ti mung na a manang ni mahtang rawt lung wa ai ajan zawn htoi tu nga mu ga law!
Dai mung hta shaning mali shi ning tup ngwi pyaw sim sa nga sai.