40
1-2 Yoba e, nang gaw Chyahtum Chyalai N-gun Rawng Ai Karai Kasang hpe
dakat nga ndai; ya chyawm gaw nang asum jaw nna htan na n rai ni?
Yoba
3-4 Madu e, ngai gaw angawk ai hte tsun kau ni ai. Ngai hpa htan lu na rai ta?
Ngai gaw hpa hpe mung shakut tsun na n rai.
5 Ngai gaw tsun ang ai hta jan nna tsun kau se ai.
6 Dai hpang Madu gaw nbung laru kaw nna Yoba hpe lang mi bai ga shaga wu ai.
Dai Madu
7 Ya, jan rai rawt tsap nna
nye a ga san ni hpe htai u.
8 Ngai gaw shut hpyit ai hte n tara nga nngai;
nang nan chyawm gaw ding man nga ai ngu, nang mara shagun mayu nga n ni?
9 Nang gaw ngai zawn n-gun atsam rawng nga n ni?
Na a nsen gaw mu ngoi ai nye a nsen zawn ja nga a ni?
10 Dai hku rai yang, na a shagrau sha-a hte gumrawng gumtawng ai hta rawt tsap u;
nang hkum nan daru magam hte hpung shingkang bu hpun da u.
11 Gumrawng gumtawng ai ni hpe mada yu u;
na a pawt sindawng ai hpe ru shapraw nna, dai ni hpe shagrit kau u.
12 Rai sa, dai ni hpe mada yu nna shagrit kau u;
n hkru ai ni hpe shanhte tsap nga ai shara hkan kabye agrawp kau u.
13 Shanhte yawng hpe ga kata de lup makoi kau u;
katsan ga e shanhte hpe gyit hkang da u.
14 Dai hpang, ngai gaw nang hpe shawng shakawn kungdawn ai wa tai nna;
nang nan awng padang hkam la lu nga nit dai hpe ngai yin la na nngai.
15 Hka numraw Behemot d 40:15: Behemot: Nkau mi hta hka gumra (Hippopotamus) ngu nna tsun ma ai. Kaga ni gaw moi prat na hkrung kanu re nga ma ai. hpe mada yu u;
shi hpe ngai hpan da nngai; nang hpe mung ngai hpan da nngai.
Shi gaw dumsu kanu langai zawn tsingdu sha nga ai,
16 rai ti mung, n-gun gaw shi a hkum kata hta rawng nga ai;
atsam marai gaw shi a lasa ni hta rawng nga a hka!
17 Shi a ningmai gaw marau hpun zawn jan rai tu nna;
shi a lagaw lasa ni n-gun ja nga ai.
18 Shi a nrut nra ni gaw magri mang zawn ja nna;
shi a lagaw ni mung hpri htinggrang hte bung nga ai.
19 Ngai hpan da ai hkrung kanu ni yawng hta mauhpa kaba htum n rai nga a hka!
Shi a Hpan Madu chyu sha shi hpe dang lu nga ai.
20 Zai ai matse labye ni ginsup chyai ai kawng ni hta
shi hpe jaw sha na tsingdu tsingman ni tu nga ai.
21 Shi gaw ju singwum npu hkan hpum nna,
mai-aw tu ai hpung-ya lapran hkan makoi gyem nga ai.
22 Ju singwum ni hte hka shi makau tu ai ubyap hpun ni a shingnip ka-up nga ai rai nna;
shi hpe shingnip shara jaw ya nga ai.
23 Shi gaw hka nu ni adawt wa ti mung hkrit ai n rai;
Yawdan hka gaw shi a myi man hpe adawt hkra yang pyi, shi asim sha nga nga ai.
24 Shi a myi ni hpe kadai wa shamak kau ya nna kadai wa lu rim na rai ta?
Shing n rai, shi a ladi hpe mahkam kata hta kadai magra jum lu na rai ta?