32
Elihu Tsun Ai Ga Ni
1 Yoba gaw shi nan mara n kap dum nga ai hpe dum chye nga ai majaw, masha marai masum shi a ga hpe n htan ai sha nga mat ma ai.
2 Yoba gaw shi hkum nan teng man nga ai Karai Kasang hpe mara shagun nga wu ai majaw makau e tsap nga ai Elihu mying ai wa gaw shi a pawt sindawng ai hpe kachyi mi mung n hkang da lu wu ai. (Elihu gaw Rama amyu lakung Buzi amyu matu Barahkela a kasha rai nga ai.)
3 Shi gaw Yoba a manang masum hte mung masin pawt hkat nga ai. Shanhte chyawm gaw Yoba hpe htan na lam n mu ma ai majaw dai gaw Karai Kasang hpe shut hpyit shangun ai zawn tai nga ai.
4 Elihu gaw shanhte hta asak kaji htum ai wa rai nga ai majaw, masha shagu ga tsun ngut ai aten du hkra shi ala nga wu ai.
5 Ya dai masha masum hte gaw Yoba hpe n htan lu ai hpe shi mu ai shaloi shi masin pawt nna,
6 ning ngu tsun hpang wu ai.
Elihu
Ngai gaw kaji ai wa rai nga nngai, nanhte gaw kaba nga manit dai,
dai re ai majaw, ngai myit ai lam nanhte hpe tsun dan na matu ngai n gwi nngai.
7 Ngai gaw nye a kraw hta, nanhte tsun shaga ang myit dai,
nanhte asak kaba sai ni gaw hpaji byeng-ya garan jaw ang myit dai ngu ngai myit nawn nngai.
8 Rai ti mung Chyahtum Chyalai N-gun Rawng Ai Karai Kasang a wenyi gaw
shanhte kaw du nna hpaji byeng-ya jaw ya wu ai.
9 Aprat kaba sai ni anhte hpe hpaji rawng shangun nga ma ai n rai;
jaw ai lam hpa rai nga ai hpe chye lu na matu mung anhte hpe karum lu ai n rai.
10 Dai rai nna, ya chyawm gaw nye a ga madat ya na matu ngai ra sharawng nngai;
ngai hpa baw myit ai mung nanhte hpe tsun dan lu n-ga.
11 Nanhte ga shaga myit yang, ngai myit galu kaba hte madat nngai;
nanhte hpaji ga sawk tam myit yang, ngai ala nngai.
12 Ngai na lasha nga yang, nanhte hkrat sum myit dai hpe ngai na se ai;
nanhte gaw Yoba tsun ai ga hpe n ra sharawng nga myit dai.
13 Nanhte gaw hpaji byeng-ya mu tam la lu myit dai, ngu nna kaning rai tsun lu na rai myit ni?
Nanhte sum manit dai majaw, Karai Kasang Yoba hpe htan ya lu nga ai.
14 Yoba gaw ngai hpe n rai, nanhte hpe she tsun nga ai;
rai ti mung, nanhte galaw manit dai zawn ngai galoi mung htan nngai n rai.
15 Yoba e, aga gaw shanhte hpe sum shangun nga sai;
shanhte nang hpe hpa mung htan lu ma ai n rai.
16 Shanhte atsin sha nga nna dai yang e hpa mung n shaga ai sha
tsap nga ma ai hpe ngai matut ala nga mai na kun?
17 N rai law, ya chyawm gaw nye a mahtai nan jaw na mawe ai;
ngai myit ai lam nanhte hpe tsun dan na we ai.
18 Ngai gaw ga tsun lu na matu ndawt nga nngai;
ngai tsun na ga ni hpe n lu ma-um da lu ni ai.
19 Ngai hta ga tsun na ahkang n lu ai rai yang,
sabyi ntsin nnan hpring hkra rawng ai shanhpyi nhpye zawn ngai kapaw ga mat na nngai.
20 Ngai dai hpe sharang da lu nngai n rai; ngai ga shaga na nngai.
21 Ngai gaw ndai ga tsun dangrang ai hta myi man tau na n rai;
ngai gaw kadai hpe mung shapyaw ai ga tsun na n rai.
22 Ngai gaw kaning rai shapyaw tsun na chye ai n rai,
dai zawn ngai galaw kau ai rai yang, Karai Kasang ngai hpe tin tin ari jaw u ga law.