28
1 Gumhpraw htu la ai maw nhkun ni nga nga ai;
Aja jen la ai shara ni mung nga nga ai.
2 Anhte gaw ga kata na hpri htu shaw la ga ai
Nlung ni kaw na magri hkyeng shabyawng la nga ai.
3 Maw htu ai ni gaw sung htum ai nsin hpe tam ma ai.
Shanhte gaw ginding aga a sung ai shara hpe sawk yu nhtawm.
Htat ai nsin hta rawng ai lunghkrung ni hpe htu nga ai.
4 Masha lagaw hkawm sharat nna
Kadai mung nga ai shara hte tsan ai shara e
Maw nhkun galu ni hpe htu ma ai.
Dai yang e, shanhte hkrai amu galaw nna
Nhkun ni hta sumri ni hpe noi goiwat da nga ma ai.
5 Ginding aga kaw na nsi naisi lusha tu ya nga ai;
Rai ti mung, dai ga a npu tsang chyawm gaw
Ashep ashin rai nna agrawp ayai kau hkrum nga ai.
6 Ginding aga na nlung ni hta seng mut ni rawng nna;
De a ga nhpu hta aja rawng nga ai.
7 Langji gaw maw de hkrang ai lam ni hpe mu ai n rai;
Langda mung dai ntsa hku pyen lai mat wa ai n rai.
8 Hkanghkyi hte kaga matse labye ni gaw
Dai katsi katsang re ai lam hku galoi mung n kabye lai lu ma ai.
9 Maw nhkun htu ai ni gaw ja dik lunghkrung ni hpe htu nna;
Bum ni hpe de a bum lagaw du hkra htu kau mu ai.
10 Shanhte gaw lunghkrung hku hka hkawng htu waw ma yang,
Manu dan ai nlung ni hpe mu tam la ma ai.
11 Shanhte gaw hka nu ni a hka npun ni hpe htu pat kau nna,
Makoi up da ai shara hta nhtoi du shangun nga ai.
12 Rai ti mung hpaji byeng-ya hpe kanang e mu lu a ta?
Chye na hkawn hkrang wa hkra anhte kanang e sharin la lu na rai ta?
13 Hpaji byeng-ya hpe masha hta mu tam la lu ai n rai;
Kadai mung de a teng man ai manu hpe chye lu ai n rai.
14 Hpaji byeng-ya hpe nammukdara hte panglai hka ni a
Sung ai shara ni hta mu tam la lu ai n rai, nga nna tsun ai.
15 Dai hpe aja gumhpraw hte mari la lu ai n rai.
16 Jet htum ai aja hte reng htum ai lung seng ni hte,
De a manu hpe shabung lu ai n rai.
17 Dai gaw aja hta mung, aja di bu langai hta mung,
Shing n rai kaja htum ai apat hta mung grau nna manu dan nga ai.
18 Hpaji byeng-ya a manu gaw chyahkat lung, lung san nlung hte
Patamya lung seng ni hta grau manu dan nga ai.
19 Reng htum ai utahpaya lung seng hte jet htum ai ja gaw
Hpaji byeng-ya a manu hte shadawn lu nga ai n rai.
20 Dai rai yang, hpaji byeng-ya a npawt kanang e nga nga a ta?
Chye na hkawn hkrang wa hkra anhte kanang e sharin la lu na rai ta?
21 Dai hpe hkrung mahkrung ni mu lu ai n rai.
Pyen nga ai ntsa malen u pyi mu lu ai n rai.
22 Si hkrung si htan hte hten byak yan pyi,
Dai ma da ga hpe chyu sha na saga ai nga nna yin la ma ai.
23 Karai Kasang chyu sha de a lam chye nga ai;
Hpaji Byeng-Ya hpe mu tam la ai shara chye nga ai;
24 Hpa majaw nga yang, shi gaw ginding aga a jahtum hpe mu nna,
Sumsing lamu a npu na nga manga hte hpe shi mu nga ai.
25 Karai Kasang gaw nbung hte de a n-gun bang ya nna,
Panglai a hkrang kade kaba nga ai hpe shadawn sharam yu na myit jahkut da ai shaloi mung,
26 Karai Kasang gaw marang jahtu na shara daw dan nna
Mu ngoi ai lam tawn da ai shaloi mung,
27 Shi gaw hpaji byeng-ya hpe mu nna
De a manu hpe chyam yu nhtawm, shi dai hpe shagrin da nga ai.
28 Karai Kasang gaw dai masha ni hpe,
?Nanhte gaw hpaji rawng na matu dai Madu hpe hkrit hkungga lu na rai myit dai.
Nanhte gaw chye na hkawn hkrang na matu n hkru ai kaw na kayin mat wa lu na rai myit dai,? ngu nna tsun wu ai. Ref 28:28: Shk 110:10; Gsh 1:7; 9:10.