26
Yoba
1-2 Ngai zawn matsan mayan re ai hte n-gun kya ai wa hpe nang
kaning rai karum lu na rai nga a hka!
3 Nang gaw dai zawn mai kaja ai hpaji daw nna, ngai zawn angawk ai wa hpe
na a machye machyang hpaji garan ya n hka!
4 Na a ga ni yawng hpe kadai na ya na hpe nang myit nawn da wu ni?
Dai zawn shaga na wenyi nang hpe kadai shadut ya a ta?
[Bildad]
5 Dai wenyi minla ni gaw ginding aga a npu na
hka hpungtun hta hkrit gari nga ai.
6 Katsan ga gaw Karai Kasang a man e branglang rai nga ai;
shi a man kaw nna magap shinggang da lu ai n rai.
7 Karai Kasang gaw dingdung maga de na lamu hpe kahpyan da nna,
ginding aga hpe hpa mung n nga ai hpatwat e noi da wu ai.
8 Sumwi ni hta hka hpe majaw da nna,
de a li ai namnak kapaw ga mat na hpe makawp da ya ai gaw Karai Kasang rai nga ai.
9 Shi gaw sumwi a shingdu e shata shagawng hpe makoi da nga ai.
10 Shi gaw nsin kaw nna nhtoi hpe garan jahka da nna;
panglai hka man ntsa e lamu htumpa tawn da wu ai.
11 Sumsing lamu hpe madi da ai shadaw ni hpe shi daru dat yang,
dai ni hkrit gari ai hte ashun awam rai nga ai.
12 Shi a n-gun atsam hte panglai hpe kabrawng shangun nna,
shi a kungkyang ai atsam hte Rahab numraw hpe shamyit kau nga ai.
13 Shi a nsa hte sumsing lamu hpe jasan nna,
shi a lata hte hprawng lawt ai numraw hpe sat kau nga ai.
14 Rai ti mung dai ni gaw shi a daru magam n-gun a ga machyan ni sha naw rai nga ai;
anhte na yu ai gaw kahte tsun ai ga ni sha naw rai nga ai.
Karai Kasang gaw teng teng kade wa galu kaba nga ai hpe kadai chye lu a ta?