23
Yoba
1-2 Ngai chyawm gaw Karai Kasang hpe naw gumlau nna aput angun nga nngai;
nye a machyi madai ai nsen hpe ngai shangap lu nngai n rai.
3 Shi hpe tam la na shara ngai chye ai rai yang mung, shi nga ai shara de
gara hku sa na lam hpe chye ai rai yang mung, ngai kade sha ra sharawng na rai nga n hka!
4 Ngai gaw nye a amu shi a man e tsun dan nna;
nye a man na ndang kalang ga ni yawng hpe tawn da ya na we ai.
5 Shi kaning nga tsun na lam hte gara hku ngai
hpe htan na wu ai lam hpe ngai chye mayu nngai.
6 Karai Kasang gaw ngai hpe ninghkap ai hta shi a n-gun atsam mahkra hte hpe lang na rai wu ni?
N rai law, ngai tsun ai hte maren sha, shi madat ya na wu ai.
7 Ngai gaw myit ding man nga nngai majaw Karai Kasang hte tsun hkat lu nga nngai;
shi chyawm gaw ngai hpe mara n kap ai wa ngu nna, lang mi sha tsun na wu ai.
8 Ngai chyawm gaw sinpraw maga de tam sawk yu ni ai, rai ti mung Karai Kasang gaw dai yang e nga nga ai n rai;
Sinna maga de tam sawk yu yang, ngai shi hpe n mu nngai.
9 Karai Kasang gaw dingdung maga hte dingda maga de amu galaw nga ai;
rai ti mung, ngai shi hpe garai n mu lu nngai.
10 Rai tim, ngai hkawm ai lagaw lahkam shagu hpe Karai Kasang chye nga ai;
shi ngai hpe chyam dinglik yu ai rai yang, ngai san seng nga nngai hpe shi mu lu na ra ai.
11 Ngai gaw shi lata la ai lam hta sadi sahka hte hkan nang nngai;
ngai gaw galoi mung yit mat ai n rai.
12 Karai Kasang hkang da ai lam hpe ngai tut nawng galaw nngai;
nye a myit ra ai hku n rai, shi a myit ra ai hku ngai hkan nang nngai.
13 Shi galoi mung galai shai ai n rai. Kadai mung shi hpe ninghkap lu ai n rai.
Shi galaw mayu ai amu galaw nga ai kaw na shi hpe jahkring kau lu ai n rai.
14 Shi gaw nye a matu maw mawn ai amu hpe shatup na ra ai;
dai maw mawn ai amu gaw shi galaw dan nu ai law law hta na langai sha naw rai nga ai majaw,
15 shi a man e ngai hkrit gari nga nngai.
16-17 Chyahtum Chyalai N-gun Rawng Ai Karai Kasang gaw nye a nden marai hpe jahten kau ya ni ai.
Nsin gaw ngai hpe myi n mu shangun ai hte, ngai hpe hkrit shangun ti mung,
dai gaw nsin a majaw n rai, dai gaw Karai Kasang nan rai nga ai.