12
Yoba
1-2 Rai sa, nang gaw masha a nsen rai nga ndai.
Nang si ai shaloi, hpaji byeng-ya gaw nang hte rau si mat na ra ai.
3 Rai ti mung, ngai mung nang zawn myit nyan hpaji law law lu ai rai nna;
nanhte a lawu grit rai nga nngai n rai;
nanhte tsun manit dai lam yawng mayawng hpe masha shagu chye ma ai.
4 Ya chyawm gaw nye a manang ni pyi ngai hpe mani ma ai;
ngai gaw ding man ai hta mara n kap nga tim pyi, shanhte mani ma ai;
rai ti mung Karai Kasang gaw nye a akyu hpyi ga ni hpe htan ya ai aten nga nga yu sai.
5 Nanhte gaw ru yak tsin-yam tsindam n hkrum nga myit tim, ngai hpe mani asawng nga myit dai;
nanhte gaw kataw hkyen nga ai wa hpe adup nga myit dai.
6 Rai ti mung lagu lagut ni hte karai kata masha ni ngwi pyaw sim sa ai hte nga lu ma ai;
shanhte kam sham ai karai gaw shanhte hta rawng ai n-gun atsam rai nga malu ai.
7 Ntsa malen u ni hte dusat yam nga ni nanhte hpe pyi sharin ya lu nga ma ai;
8 ginding aga hte panglai hka na hkrung kanu ni hpe shanhte a hpaji byeng-ya san yu mu.
9 Dai ni yawng gaw dai Madu a lata hte hpan da nga nu ai lam chye nga ai.
10 Karai Kasang gaw hkrung mahkrung ni a asak hkrun lam hpe lam madun nga ai;
masha shagu a asak mung shi a lata hta rai nga ai.
11 Rai ti mung, na a shinglet gaw lusha chyim ai hta kabu gara nna,
na a na mung na la lu ai aga ni hta kabu gara nga ai.
12-13 Asak kaba sai masha ni gaw hpaji byeng-ya lu ma ai;
rai ti mung, Karai Kasang gaw hpaji byeng-ya hte daru magam n-gun rawng nga ai.
Asak kaba sai ni gaw myit kraw hpaji lu ma ai;
Karai Kasang chyawm gaw myit kraw hpaji hte n-gun atsam rawng nga ai.
14 Karai Kasang run hpya kau ai shaloi, kadai wa bai de da lu nga a ta?
Karai Kasang sharen da ai wa hpe kadai shalawt dat lu a ta?
15 Karai Kasang gaw marang n jahtu ya ai shaloi, hkun hkraw mat nga ai;
hka bai hpaw dat ai shaloi, hka mawru du nga ai.
16 Karai Kasang gaw n-gun hte tut nawng awng dang ai wa rai nga ai;
masu hkalem hkrum ai wa hte hkalem ai wa gaw shi a lata hta rai nga ai.
17 Shi gaw up hkang du ni a hpaji byeng-ya la kau ya nna;
ningbaw ni hpe angawk ai masha ni zawn shatai kau nga ai.
18 Shi gaw hkawhkam ni hpe tingnyang shayu nna, shanhte hpe bawng masha shatai nga ai;
19 shi gaw hkinjawng ni hte n-gun ja ai masha ni hpe shagrit kau nga ai.
20 Shi gaw kam hpa ging sai masha ni hpe shazim kau nna
asak kaba sai ni a hpaji byeng-ya hpe dawm kau ya nga ai.
21 Shi gaw daru magam n-gun rawng ai ni hpe kaya jahkrum nna,
up hkang du ni a n-gun hpe jahtum kau ya nga ai.
22 Shi gaw asin amang re ai si ai shara de nhtoi dat dat nga ai.
23 Shi gaw masha amyu baw ni hpe n-gun ja shangun ai hte galu kaba shangun nga ai;
rai ti mung shanhte hpe dang kau nna shamyit kau wu ai.
24 Shi gaw shanhte a ningbaw ni hpe angawk shangun nhtawm,
aruk arak kashuk kashak brak hkawm shangun let shadam kau wu ai;
25 shanhte gaw nsin kata hta lamawm hkawm nna chyaru nang ai ni zawn ndi nda rai hkawm ma ai.