YAWHAN A SHAGUN DAT AI LAIKA MASUM
(3 JOHN)
Ga Nhpaw
Ndai Yawhan a Shagun Dat ai Laika Masum gaw, asak kaba sai Salang wa
kaw nna Hpung a ningbaw ningla
langai mi rai nga ai Geu hpang
de ka dat ai laika re.
Laika ka ai wa gaw Geu hku nna kaga Hkristan hpu nau ni hpe karum shingtau
ai lam hpe shakawn awlaw ya wu ai
hta n-ga, Diotrihpi ngu ai masha
langai mi hpe koi kau na matu sadi
jaw htet dat wu ai.
1
1 Asak kaba sai ngai Salang wa kaw nna nja nhpra hte teng man ai hku ngai
tsaw ra nga ai Geu hpang de laika ka
dat nngai. Ref 1:1 Kas 19:29; Rom 16:23; 1Ko 1:14.
2 Nye a tsaw ra ai wa e, na a wenyi n-gun lagaw hkridun kaja nga lit dai
hpe ngai chye nga nngai rai nna, nang
lam shagu hta galu kaba gan ga nna,
nang hkam kaja nga lu n ga, ngai
akyu hpyi nngai.
3 Nang galoi mung teng man ai lam hta hkan nang nga ndai hte maren, dai
teng man ai lam hta nang gade gara
hku sadi dung nga ai lam hpe Hkristan
hpu nau ni nkau mi du sa wa nna tsun
dan ma ai shaloi ngai ja ja kabu
gara nga nngai.
4 Nye a kashu kasha ni, dai teng man ai lam hta hkan sa asak hkrung nga
ma ai lam na lu ai majaw ngai hpe
kabu gara shangun dik ai hta kaga
kabu hpa n nga mat sali ai.
5 Nye a tsaw ra ai jinghku wa e, Hkristan hpu nau ni hpe shanhte
chyasam manam naw rai nga ai ten
kaw nna nang galaw daw ai amu
nlang hte hta myit kup kangka
rai nga ndai.
6 Shanhte gaw na a tsaw ra ai lam hpe ndai kaw sa sakse hkam tsun kajai nga ma ai. Shanhte Karai Kasang a amu gun ai ni rai nga ma ai rai nna, shawng de bai matut hkawm sa wa lu na matu chyeju hte shanhte hpe naw karum dat mu, dai gaw Karai Kasang hpe sharawng awng shangun ai lam rai na re.
7 Hpa majaw nga yang, shanhte gaw n kam n sham ai tara maigan ni kaw na karum
ai lam n hkam la ai sha Hkristu a
sasana magam bungli hta hkawm sa ai
ni rai nga ma ai.
8 Dai re ai majaw, dai teng man ai magam bungli hta shanhte hte mu
gun shingdep shingtau tai lu u ga,
anhte Hkristan ni gaw ndai masha
ni hpe karum madi shadaw ra ga ai.
9 Dai Hpung de ngai laika kadun langai mi ka dat se ai; rai ti mung shanhte
a ningbaw ningla tai mayu ai Diotrihpi
gaw ngai tsun dat ai lam hpe madat
mara na ra ai n rai.
10 Ngai sa du ai shaloi she, shi galaw kau sai lam shagu hpe tsun shadan
dan na nngai. Shi gaw anhte hpe
grai n shawp ai ga hte masu ai ga
ni tsun nga ai. Dai hte sha n ga shi
a matu n ram dum nna Hkristan hpu
nau ni du sa wa ma yang, shi hkum
nan n hkap hkalum la mu ai hta n ga,
shanhte hpe hkap hkalum la mayu ai
ni hpe mung shi pat hkum kau mu ai hte
hpung kata na shaden shapraw kau mu ai!
11 Nye a tsaw ra ai jinghku wa e, n kaja ai lam hpe n re ai sha kaja ai lam hpe
len la nga u. Kaja ai amu galaw ai wa
gaw Karai Kasang hte seng nga ai;
n kaja ai amu galaw ai wa chyawm gaw
Karai Kasang hpe garai n mu n chye wu
ai.
12 Masha shagu gaw Demetri a kaja ai lam hpe sakse hkam nga ma ai. Shi a hkan
sa galaw ai lam ni mung dai teng man
ai mungga hte bung pre nga ai. Anhte
mung sakse hkam jat ga ai rai nna,
anhte a sakse hkam ai ga teng nga ai
gaw nang chye nga ndai.
13 Ngai nang hpe tsun na lam law law lu nngai: rai ti mung laika hte n
ka mayu mat ni ai.
14 Gade n na yang, nang hte hkrum lu na ngai myit mada nga nngai; shaloi
she an lahkawng n-gup aga hte tsun
chyai lu na ga ai.
15 Nang ngwi pyaw nga n ga.
Na a jinghku jingyu ni yawng nang hpe shakram dat ma ai. Nang mung
anhte a jinghku jingyu ni yawng
hpe nang nan hkan shakram ya rit law.