6
1 Hkawhkam Uzia si mat ai shaning hta, ngai gaw Madu hpe mu nngai. Shi gaw tsaw ai shi a tingnyang hta dung nga ai hte shagrau shatsaw hkrum nga ai, shi a palawng galu gaw Nawku Htingnu ting hpring nga ai. Ref 6:1: 2Hk 15:7; 2Hl 26:23.
2 Shi grup grup hta wan shinglet pru ai hkrung kanu ni tsap nga ma ai, dai ni langai hte langai hta singkaw kru kru tu nga ai; hkrung kanu shagu a myi man hpe singkaw lahkawng hte magap da nga ai, de a hkum hpe singkaw lahkawng hte kaga singkaw lahkawng gaw pyen na matu rai nga ai.
3 Shanhte langai hte langai gaw ning ngu nna tsun jahtau ma ai:
?Chyoi pra, chyoi pra, chyoi pra!
Chyahtum Chyalai N-gun rawng ai dai Madu gaw chyoi pra nga ai!
Shi a hpung shingkang gaw mungkan ga hta hpring nga ai.? Ref 6:3: Shr 4:8.
4 Shanhte a jahtau ai nsen gaw Nawku Htingnu a npawt nhpang hpe ashun awam shangun nga ai, dai Nawku Htingnu nan wan hkut hte hpring nga ai.
5 Ngai gaw, ?Nye a matu myit mada shara n nga sahka! Nye a nten kaw nna pru ai ga hkum shagu gaw yubak ga ni rai nna, ga hkum shagu yubak ga tsun shaga ai amyu masha ni a lapran e ngai nga nga nngai majaw, ngai gaw dingnye hkrum nga nngai. Ti mung, nye myi hte chyaw, Chyahtum Chyalai N-gun rawng ai dai Madu Hkawhkam wa hpe ngai mu se ai.
6 Dai hpang hkrung kanu langai mi gaw lakap hte tawn hkungri ntsa na grung nga ai wan n-ga hpe matep lang let ngai hpang de pyen sa wa ai.
7 Shi gaw dai grung nga ai wan n-ga hte nye a nten hpe ahtawk ya let, ?Ndai hte na a nten hpe hkra ya sai, ya gaw na a mara mung n nga mat nit dai, na a yubak ni hpe raw dat kau ya sai,? ngu nna tsun ai.
8 Dai hpang Madu gaw, ?Ngai kadai hpe shangun dat na i? Kadai wa anhte a shiga htawn ai wa tai na kun?,? ngu nna tsun ai ga hpe ngai na nngai.
Ngai mahtang, ?Ngai sa na nngai! Ngai hpe shangun dat e!,? ngu nna htan we ai.
9 Dai rai nna shi gaw ngai hpe amyu masha ni hpang de sa nna ndai mungga jaw na matu tsun wu ai: ?Nanhte gaw kade mi madat ti mung, nanhte chye na na myit dai n rai. Nanhte kade mi yu ti mung, hpa byin nga ai lam hpe nanhte chye na myit dai n rai.? Ref 6:9-10: Mat 13:14-15; Mrk 4:12; Luk 8:10; Yhn 12:40; Kas 28:26-27.
10 Dai hpang shi gaw ngai hpe, ?Ndai amyu masha ni a myit masin ni hpe shamak kau ya u, shanhte a na ni lahpang kau ya u, shanhte a myi ni hpe amam kau ya u, shaloi shanhte n mu lu, n na lu ai hte n chye na lu na ma ai. Shanhte dai hku byin mat ai rai yang, shanhte gaw ngai kaw kayin wa nhtawm shamai shatsai ai hkrum na rai ma ai,? ngu nna tsun ai.
11 Ngai gaw, ?Madu e, dai zawn re ai gaw kade daram na wa na rai ta?,? ngu nna san nngai.
Shi gaw, ?Mare ni hten run mat nna, kaman byin mat ai aten du hkra, dum nta ni katsi katsang tai mat nna lamu ga shi nan akrin akraw rai nna lamu ga hpe lahpawt lama di shakram da ai aten du hkra rai na rai nga ai,? ngu nna htan wu ai.
12 Ngai gaw amyu masha ni hpe sumtsan de sa kau dat nna lamu ga ting hpe katsi katsang shara shatai kau na nngai.
13 Dai mungdan hta marai shi kaw na langai mi naw ngam nga tim pyi, dai wa mung shaza kau ai hkrum na wu ai; shi gaw kran kadawng kau sai wamyi hpun a hpundu zawn tai na ra ai,? ngu nna htan wu ai.
(Hpundu gaw Karai Kasang a amyu masha ni a matu nnan hpang la ai ngu ai hpe shaleng dan ai.)