54
1 Yerusalem e, nang gaw maudung num zawn rai nga ndai,
rai ti mung, ya chyawm gaw nang mahkawn mangoi lu nna, kabu gara jahtau lu nga ndai.
Ya chyawm gaw, madu wa galoi mung n kau da yu ai numsha hta pyi grau nna
kashu kasha lu na rai ndai.
2 Nang shanu nga ai sum hpe kaba jat u;
de a sumri ni hpe galu dat nna mailak ni hpe shangang u!
3 Nang gaw na a lamu ga jarit ni hpe man maga shagu de maden jat lu na rai ndai;
na a amyu masha ni gaw kaga masha amyu baw ni ya madu nga ai mungdan de nhtang wa na mara ai.
Ya chyawm gaw katsi katsang re ai mare ni hta amyu masha ni hpring wa na mara ai.
4 Hkum hkrit et-nang gaw kaya kahpa bai hkrum na ra ai n rai;
nang gaw shagrit kau hkrum na n rai.
Nang gaw ram prat na madu jan zawn na a sadi n dung ai lam hpe mung,
gaida jan zawn na a myit chyum myit htum garen gari ai lam hpe mung malap kau na rai ndai.
5 Na a Hpan madu gaw na a matu madu wa zawn tai na ra ai-
Chyahtum Chyalai N-gun rawng ai dai Madu gaw shi a mying rai nga ai.
Israela a chyoi pra ai Karai Kasang gaw nang hpe hkye la na ra ai-
shi gaw mungkan ga ting a up hkang du wa rai nga ai.
6 Israela e, nang gaw madu wa kabai kau nna,
myit ru myit yak sung sung hkrum sha ai ram prat na madu jan zawn rai nga ndai.
Rai ti mung, dai Madu gaw nang hpe shaga nna shi hpang de nhtang wa ai hte ning ngu tsun nga ai:
7 ?Aten kadun mi hta, ngai nang hpe kau da nngai;
tsaw ra myit sung sung hte ngai nang hpe bai woi la nngai.
8 Ngai gaw hkring mi sha masin pawt let myi man kayin kau da nngai,
rai ti mung ngai nang hpe nye a tsaw ra myit htani htana madun nga na nngai.?
Shing rai nang hpe hkye la ai dai Madu gaw shing nga tsun ai.
9 ?Noa a aten hta, ginding aga hpe galoi mung
bai sha-u n sha-ing na matu ngai ga sadi da ni ai.
Ya chyawm gaw, ngai nang hte masin bai n pawt na matu ga sadi da nngai;
Ngai nang hpe daru mung n daru, ari mung jaw na n rai nngai. Ref 54:9: Nin 9:8-17.
10 Bum ni hte kawng ni ayai mat mai nga ai,
rai ti mung na a matu nye a tsaw ra myit gaw galoi mung htum mat na ra ai n rai;
ngai gaw nye a ngwi pyaw sim sa lam a ga sadi hpe htani htana shatup nga na nngai.?
Dai rai nna, nang hpe tsaw ra ai dai Madu gaw shing nga tsun ai.
11 Dai Madu gaw,
?Nang gaw nni nkri hte matsan mayan hkrum ai mare,
nang hpe shalan shabran na kadai n nga ai Yerusalem e,
Ngai gaw na a npawt nhpang ni hpe hpu reng ai nlung ni hte bai gaw gap da na nngai. Ref 54:11-12: Shr 21:18-21.
12 Ngai gaw na a langchyi ni hpe patamya lung hkyeng ni hte mung,
na a chyinghka ni hpe wan zawn tu gala ai nlung ni hte mung,
nang hpe shinggrup da ai bunghku hpe hpu reng ai lung seng ni hte gaw da na nngai.
13 ?Ngai hkum nan na a amyu masha ni hpe sharin achyin ya na nngai,
shanhte hpe ngamu ngamai lam hte ngwi pyaw sim sa lam jaw ya na nngai. Ref 54:13: Yhn 6:45.
14 Teng man rap ra ai tara hte ding man ai gaw nang hpe n-gun shaja ya na ra ai.
Nang gaw dip gamyet sha hkrum ai hte hkrit kajawng ai amu kaw na shim nga lu na ndai.
15 Nye a myit hkrum ai lam n lawm ai sha
nang hpe htim nna,
gasat ai wa kadai mung hkrat sum mat na ra ai.
16 ?Ngai gaw wan htung galaw nna hpyen laknak dup ai
ndup wa hpe hpan da nngai.
Ngai gaw masha sat na laknak hpai ai
hpyenla wa hpe mung hpan da nngai.
17 Rai ti mung hpyen laknak hpa mung nang hpe machyi shangun lu na n rai;
nang gaw nang hpe mara shagun ai ni yawng a matu mahtai lu na ra ai.
Ngai gaw nye a shangun ma ni hpe makawp maga nna
shanhte hpe awng padang jaw na nngai.?
Dai Madu tsun nu ai.