42
1 Dai Madu gaw,
?Ndai gaw ngai n-gun shaja ya ai nye a shangun ma-
ngai lata la ai wa, ngai sharawng awng ai wa rai nga ai.
Ngai gaw shi hpe nye a Wenyi hte jahpring ya ni ai,
shi gaw masha amyu baw shagu hpang de teng man rap ra ai tara la sa ya na ra ai. Ref 42:1: Mat 3:17; 17:5; Mrk 1:11; Luk 3:22; 9:35. Ref 42:1-4: Mat 12:18-21.
2 Shi jahtau na n rai, shi a nsen sharawt na n rai,
nmaw lam ni hkan nsen ja ai hte tsun na n rai.
3 Shi gaw magaw ai mai-aw hpe shadaw na n rai,
kachyi mi sha tu ai wan kawk hpe gawut sat na n rai.
Shi gaw agrin nga ai teng man rap ra ai tara hpe yawng mayawng a man e shapraw dan na ra ai.
4 Shi gaw myit mada shara, nden marai shamat kau na ra ai n rai;
shi gaw ginding aga ntsa e teng man rap ra ai tara shagrin da na ra ai.
Sumtsan mung na ni gaw shi a sharin shaga ga hpe sharawng awng ai myit hte ala nga ma ai,? ngu nna tsun ai.
5 Karai Kasang gaw sumsing lamu ni hpe hpan da nna dai ni hpe kahpyan da nga ai;
shi gaw ginding aga hte dai hta nga ai yawng mayawng hpe sumli da nu ai;
shi gaw asak jaw ya nna dai hta nga ai amyu masha ni yawng hpe nsoi nsa bang ya nga ai.
Ya chyawm gaw Madu Karai Kasang gaw shi a shangun ma hpe, Ref 42:5: Kas 17:24-25.
6 ?Ginding aga ntsa e teng man rap ra ai tara amu galaw nga ai hpe mu lu na matu,
dai Madu ngai nan nang hpe shaga la nna daru magam n-gun jaw ni ai.
Ngai gaw amyu masha ni yawng hte nang hku nna sha ga shaka tawn da na nngai;
ngai gaw masha amyu baw ni hpang de nang hku nna sha nhtoi shapraw dan na we ai.
7 Nang gaw myi n mu ai ni hpe myi hpaw ya nna
nsin htawng hta sharen da hkrum ai ni hpe shalawt dat na rin dai.
8 ?Ngai chyu sha dai Madu na a Karai Kasang rai nga nngai.
Kaga karai gaw nye a hpung shingkang hpe garan la mai nga ai n rai;
Ngai gaw kaga hpara sumla ni hpe nye a shakawn kungdawn ga garan hkam la shangun na n rai.
9 Ngai tau tsun da ai amu ni gaw ya teng nga sai.
Ya chyawm gaw dai lam ni garai n byin hpang ai rai tim,
ngai nang hpe amu nnan lam ni tsun dan na nngai.?
10 Mahkawn mangoi nnan hte dai Madu hpe mahkawn mu;
Mungkan ga ting, shi hpe shakawn kungdawn ga hte mahkawn mu!
Panglai rap ai ni e, shi hpe shakawn kungdawn mu;
panglai hkrung kanu ni yawng hte e, shi hpe shakawn kungdawn mu!
Sumtsan mung ni hte dai hkan nga ai ni yawng hte e, mahkawn mangoi mu!
11 Nam mali hte de a mare ni Karai Kasang hpe shakawn kungdawn mu ga;
Kedara masha ni shi hpe shakawn kungdawn mu ga!
Sela mare hta nga ai ni gaw bum pungding ni kaw nna kabu gara ai hte jahtau nga mu ga!
12 Sumtsan mung ni hta nga ai ni gaw dai Madu hpe
shakawn kungdawn ai hte shi a hpung shingkang hpe shagrau nga mu ga!
13 Dai Madu gaw share ninghkrin wa zawn gasat na pru sa nga ai;
shi gaw majan gasat na matu jin jin rai nna myit katu nga ai.
Shi gaw majan hta jahtau nna garu nga ai;
shi gaw shi a gumlau hpyen ni hpe ninghkap na matu shi a daru magam n-gun hpe madun nga ai.
14 Karai Kasang gaw,
?Ngai gaw aten na na wa, atsin sha nga nga nngai;
nye a amyu masha ni a ga hpe n htan ya nngai.
Rai ti mung, ya chyawm gaw amu galaw na aten du nga sai;
Ngai gaw shinggyim machyi ai numsha zawn jahtau nngai.
15 Ngai gaw kawng ni hte bum ni hpe jahten kau na nngai
tsingdu tsingman hte hpun ni hpe jahkraw kau na nngai.
Ngai gaw hka nu lwi hkrat ai kadit ni hpe zaibru jang shatai kau nna,
hka la-ing ni hpe jahkraw kau na we ai.
16 ?Myi kyaw ai nye a amyu masha ni hpe shanhte galoi mung garai n hkawm yu ai
lam hku ngai woi lakawn wa na nngai.
Ngai gaw shanhte a nsin hpe nhtoi shatai kau nna
marawk marak re ai mung hpe shanhte a man e shatsawm shara da na nngai.
Ndai ni gaw nye a ga sadi ni rai nga ai,
ngai gaw dai ni hpe n hprai ai sha shatup na nngai.
17 Hpara sumla ni hpe kam hpa ai ni yawng hte
shanhte jaw tawn ai karai ni hpe shaga ai ni gaw
shagrit kau ai hkrum nna kaya kahpa hkrum na mara ai,? ngu nna tsun wu ai.
18 ?Dai Madu gaw,
?Na lahpang ai amyu masha ni e, madat mu!
Myi kyaw ai ni e, htep htep yu mu!
19 Nye a shangun ma wa hta jan nna grau myi kyaw ai wa nga nga a ni?
Ngai shangun dat ai dat kasa wa hta grau na lahpang ai wa nga nga a ni?
20 Israela e, nang gaw lam law law mu yu nit dai,
rai ti mung dai lam nang hpe hpa hku lachyum shapraw nga a ni?
Nang gaw na la na, na tu nga ndai,
rai ti mung nang teng teng na la nga n ni?
21 Dai Madu gaw hkye la na matu sharawng awng ai Karai Kasang rai nga ai,
dai rai nna, shi gaw shi a tara ni hte sharin shaga lam ni hpe shagrau da nga ai,
shi gaw shanhte hpe shagrau sha-a na matu shi a amyu masha ni hpe ra nga ai.
22 Rai ti mung, ya chyawm gaw shi a amyu masha ni hpya lu hpya sha ai hkrum nga manu ai;
shanhte gaw ga htawng hta bang da ai hkrum ma ai,
htawng ni hta makoi bang da hkrum ma ai.
Shanhte gaw kashun kashe, hpya lu hpya sha ai hkrum ma ai,
kadai mung shanhte hpe sa hkye la nga ma ai n rai.
23 Nanhte hta na kadai wa ndai ga hpe madat na myit ni?
Ya aten kaw nna nang sadi let madat na n ni?
24 Kadai wa Israela hpe hpya lu hpya sha ai ni a lata de ap ya nga a ni?
Dai gaw anhte yubak galaw shut kau ai dai Madu shi nan rai nga a hka!
Shi anhte hpe asak hkrung shangun na ra sharawng ai zawn anhte hkrung ga ai n rai,
shi anhte hpe jaw sai sharin shaga ga ni hpe madat ga ai n rai.
25 Dai rai nna, shi gaw shi a masin kahtet ai n-gun anhte hpe hkam sha shangun nna,
kashun kashe du daw sai hkaw majan a nni nkri hpe hkrum sha shangun nga ai.
Shi a masin kahtet ai gaw wan zawn Israela mung ting hta dinghkren hkru nga ai,
rai ti mung hpa byin nga ai lam hpe anhte galoi mung n chye ga ai;
anhte gaw shing re byin hkrum ai kata kaw na hpa mung n sharin la nga ga ai.