28
1 Israela mungdan gaw dingnye hkrum nga sai! Dai mung a arawng sadang gaw chyaru ya ningbaw ni a abaw ntsa na nampan janmau ni zawn nyui mat nga sai. Shanhte a gumrawng gumtawng ai abaw ni gaw manam pyaw bat hawm nga ai, rai ti mung shanhte gaw n dum ndam rai lu nang gumpye taw nga ma ai.
2 Dai Madu gaw shanhte hpe gasat na matu n-gun rawng nna daru magam rawng ai masha langai lu nga ai, dai wa gaw sin nbung laru, marang hka hpungtun hte hka hpungla kaba agre mat wa ai zawn mungdan hpe ka-up kau na ra ai.
3 Chyaru ya ningbaw ni a gumrawng gumtawng lam gaw lagaw lahpan hte kabye anut kau ai hkrum na mara ai.
4 Gumrawng gumtawng ai ningbaw ni a nyui mat ai arawng sadang gaw mangai aten myin wa ai hte rau di sha kau ai shawng na maihpang si zawn shanhte hkoi mat wa na mara ai.
5 Chyahtum Chyalai N-gun rawng ai dai Madu gaw ngam nga ai shi a amyu masha ni a matu arawng sadang hte hpring ai nampan janmau zawn tai ai nhtoi langai du wa ra ai.
6 Shi gaw tara agyi amu galaw ai ni hpe teng man ai nyan hte, mare chyinghka lam e hpyen hkap manga kau lu ai ni hpe n-gun atsam jaw na ra ai.
7 Myihtoi ni hte hkinjawng ni pyi chyaru grai nang nna ndi nda rai hkawm nga ma ai. Shanhte gaw sabyi hte chyaru nau law lu nang nga ma ai majaw, maru marang rai, ahtu gumpye hkawm nga ma ai. Myihtoi ni grai nang nga ma ai majaw Karai Kasang jaw ai shingran hpe n dum n chye nga ma ai. Hkinjawng ni mung grai sawng hkra lu nang nga ma ai majaw shanhte hpang de la sa wa ai amu ni hpe n chye hparan daw dan ya nga ma ai.
8 Shanhte dung ai shat ku mahkra hta madawn nhpat hkrai hpring nga nna san seng ai shara n nga sai.
9 Shanhte gaw ngai hte seng ai lam hta aput angun rai ma ai. Shanhte gaw, ?Shi kadai hpe sharin achyin ya nga ai gaw kadai hpe rai nga a ta? Shi a mungga hpe kadai wa ra marit nga ma ta? Dai gaw ya sha chyu jahka kau sai ma ni a matu chyu sha mai kaja nga ai!
10 Shi gaw anhte hpe ga hkum mi hte ga hkum mi, ga yan mi hte ga yan mi, ginlam mi hte ginlam mi, laika daw mi hte daw mi sharin ya na matu shakut nga ai,? nga nna tsun ma ai.
11 Nanhte ngai tsun ai ga n madat myit yang, nanhte hpe laika sharin ya na matu laklai ga shaga ai maigan masha ni hpe Karai Kasang lang wa na ra ai. Ref 28:11-12: 1Ko 14:21.
12 Shi gaw nanhte yawng hpe ban sa lam hte shalan shabran ai lam jaw ya nu ai, rai ti mung nanhte gaw shi a ga madat na matu ningdang kau myit dai.
13 Dai re ai majaw, dai Madu gaw nanhte hpe ga hkum mi hte ga hkum mi, ga yan mi hte ga yan mi, ginlam mi hte ginlam mi, sharin ya na ra ai. Dai hpang nanhte hkawm sa wa ai lagaw lahkam shagu ahtu kataw wa na marin dai. Nanhte gaw hkala nba hkrum ai hte mahkam hkam hkrum nhtawm bawng masha tai mat na marin dai.
14 Ya chyawm gaw Yerusalem hta nga ai ndai amyu masha ni hpe up ai myit tsaw myit dap ai ningbaw ni e, dai Madu tsun nga ai ga hpe madat mu.
15 Nanhte gaw si hkrung si htan hte ga shaka tawn da nna katsan ga hte myit hkrum da ai hta shakawng nga myit dai. Nanhte gaw shim ai shara hta shingbyi lu na matu masu matsa ga hte hkalem hkalau ga ni hta machyu nga ndai majaw, dai lam du wa ai shaloi, nanhte hpe ru yak tsin-yam tsindam kaw na teng teng shangam da na re ngu kam nga myit dai.
16 Ya chyawm gaw, ndai lam hte seng nna Tsaw Htum ai dai Madu gaw, ?Ngai gaw Ziun Bum ntsa e ngang kang ai hte n-gun ja ai npawt nhpang gaw da na nngai. Ngai gaw dai shara hta, ?Makam masham gaw ngang grin nga ai hte hkam sharang ai mung rai nga ai,? ngu ai laika ka shakap da ai ngang ai njut nlung langai jahkrat bang da na nngai. Ref 28:16: Shk 118:22-23; Rom 9:33; 10:11; 1Pe 2:6.
17 Teng man rap ra ai gaw npawt nhpang a matu shadawn sumri tai na ra ai, ding man ai gaw de a joi si sumri rai na ra ai,? ngu nna tsun ai.
Sin marang gaw nang manoi nga ai masu magaw ga mahkra hte hpe ye magawn mat wa nhtawm, mawru hka hpungla gaw nanhte a shim lum ai nga shara hpe agre jahten kau ya na ra ai.
18 Si hkrung si htan hte nanhte tawn da ai ga shaka gaw hten mat na ra ai; katsan ga hte myit hkrum da ai lam mung shaprai kau hkrum na ra ai. Ru yak tsin-yam tsindam ru kaput yu wa ai shaloi nanhte gaw ka-up kau ai hkrum na rai myit dai.
19 Dai gaw lang mi hte lang mi, lahpawt mi hte lahpawt mi nanhte hpe adup kayat kau na ra ai. Nanhte gaw dai hpe shani shana hkam sharang ra na myit dai. Karai Kasang kaw na lu la ai mungga nnan shagu gaw hkrit kajawng shara tai nga ai!
20 Nanhte gaw ga shagawp laika na, latsawn n mai hkra kadun ai yup ku ntsa e yup na matu shakut ai wa, hpun n ram hkra nau kaji ai nba hpe hpun ai wa zawn tai na myit dai.
21 Dai Madu gaw shi galaw na matu yaw shada ai amu galaw lu hkra nga, laklai ai shi a amu ni shangut lu hkra, Perazim Bum hte Gibeon kadit hta shi galaw nu ai zawn gasat na ra ai. Shi gaw shi a amu, mauhpa amu hpe shangut na ra ai. Ref 28:21: 2Sa 5:20; 1Hl 14:11; Ysh 10:10-12.
22 Ngai nanhte hpe jaw ya nga ai shadum jahprang ga hpe hkum mani asawng kau myit! Nanhte dai hku galaw ai rai yang, dai gaw nanhte a matu hprawng lawt lu na pyi grau nna ayak ahkak tai wa na ra ai. Mungdan ting hpe jahten kau na matu Chyahtum Chyalai N-gun rawng ai dai Madu a daw dan lam hpe ngai na ni ai.
23 Ngai tsun nga ai ga madat mu; ngai nanhte hpe tsun dan nga ai ga hta myit maju jung mu.
24 Hkauna galaw ai ni gaw shanhte a yi hkauna ni hpe tut nawng galau ai n rai; hkai lu na matu jin jin a galaw da nga ai n rai.
25 Shanhte gaw ga sau lajang da ngut ai hte pan soi hte shingtawn pan zawn re ai tsi tai ai namlaw namlap hpun hkai ma ai. Shanhte gaw hkaulan mam hte muk-yaw mam ni hpe yan hte yan hkai nna, shanhte a yi shingnawm hkan e kaga manggawng si ni hpe gat hkai da ma ai.
26 Karai Kasang gaw shanhte hpe sharin ya nu ai majaw shanhte a amu hpe gara hku galaw na lam shanhte chye ma ai.
27 Shanhte gaw pansoi tum hte shingtawn pan asi hpe li ai hkawn lang nna galoi mung adup sharun la nga ma ai n rai. Shing di galaw na malai, tsang nna lang manu ai ningrip hpe lang nga ai.
28 Shanhte gaw hkaulan mam nsi hpe nhtum nni rai kabye anut jahten kau ai n rai; nsi ni n machyi mat hkra, de a ntsa e dumsu leng hte kaning rai kabye la na gaw shanhte chye nga ma ai.
29 Ndai hpaji byeng-ya yawng gaw Chyahtum Chyalai N-gun rawng ai dai Madu kaw na rai nga ai. Karai Kasang shatawng shada ai amu gaw hpaji rawng nga ai rai nna, dai ni gaw tut nawng awng dang nga ma ai.