HOSEA LAIKA
(HOSEA)
Ga Nhpaw
Myihtoi Hosea gaw 721 B.C. ngu na Samari mare garai n hkrat sum ai a shawng daw ru yak tsin-yam tsindam hkrum sha ai laman, myihtoi Amo a hpang, dingdung maga Israela mungdan hta tara hkaw nga ai. Shi gaw amyu masha ni hpara sumla nawku ai lai hte Karai Kasang hpe n kam n sham ai lam ni hte seng nna alak mi myit tsang ai wa rai nga ai. Hosea gaw ndai n kam n sham ai hpe sadi n dung ai numsha a majaw shi hkrum sha ai dinghku tsin-yam tsindam hku nna nden ja ja hte htawng madun wu ai. Shi a madu jan Gome gaw shi hta sadi n dung mat ai zawn Karai Kasang a amyu masha ni mung dai Madu kaw na hprawng yen mat wa ma ai. Ndai lam a majaw, tara jeyang ai gaw Israela a ntsa e hkrat wa nga ai. Ti mung, hpang jahtum e, shi a amyu masha ni a matu ngu ai Karai Kasang a dinggrin tsaw ra myit hte ka-up kau nna amyu sha ni shi hpang de nhtang wa ai hte kanawn mazum lam bai lu la shangun nga ai. Dai tsaw ra myit gaw myit hkra shangun ai ga ni hte shaleng da nga ai: ?Israela e, ngai nang hpe kaning rai kau da lu na rai ta? Ngai nang hpe kaning rai kabai kau lu na rai ta?... Nye a myit masin mung dai hpe galaw shangun nga ai n rai! Nye a tsaw ra myit gaw nanhte a matu nau wa n-gun ja nga li ai? (11:8).
1
1 Ndai gaw Yuda hkawhkam ni rai nga ai Uzia, Yohtam, Ahaza hte Hezekia ni up hkang ai laman hte Yehoasha a kasha Yeroboam Israela hkawhkam tai nga ai aten hta Beri a kasha Hosea hpe jaw ai dai Madu a mungga rai nga ai. Ref 1:1: 2Hk 15:1-7; 2Hl 26:1-23.
2 Dai Madu gaw Hosea hku nna Israela hpe shawng nnan ga tsun ai shaloi, shi gaw Hosea hpe, ?Nang sa hkungran la su; na a madu jan gaw sadi n dung na ra ai, na a kashu kasha ni mung shi zawn tai na mara ai. Dai hte maren nye a amyu masha ni mung ngai kaw na pru mat wa nna sadi n dung mat nga masai,? ngu nna tsun wu ai.
3 Dai rai nna Hosea gaw Dibla a shayi sha Gome mying ai numsha hpe hkungran la wu ai. Shan a shawng na shadang sha alat shangai ai hpang,
4 dai Madu gaw Hosea hpe, ?Shi hpe ?Yezrela? ngu nna shamying u, hpa majaw nga yang, kade n na yang, shi a kaji kawa Yehu Yezrela e shut kau ai masha sai jahkaw ai ru hka amu ni a matu Israela hkawhkam hpe ngai ari jaw na nngai. Ngai gaw Yehu wa a hkawhkam magam matu ni hpe jahtum kau na we ai. Ref 1:4: 2Hk 10:11.
5 Ngai gaw Yezrela Kadit e, dai aten hta Israela a hpyen dap a daru magam n-gun hpe shamyit kau ya na we ai.
6 Gome gaw lahkawng ngu na ma lu nga ai. Ndai lang na ma gaw shayi sha langai rai nga ai. Dai Madu gaw Hosea hpe, ?Dai numsha hpe, ?N tsaw ra nu ai? ngu nna shamying u; hpa majaw nga yang, ngai gaw Israela amyu masha ni hpe galoi mung tsaw ra myit madun na nngai n rai; shanhte hpe mara raw dat ya na nngai n rai.
7 Rai ti mung, Yuda amyu masha ni hpe chyawm gaw tsaw ra myit madun dan na nngai. Dai Madu shanhte a Karai Kasang Ngai nan shanhte hpe hkye la na nngai, rai ti mung ngai gaw majan hta nhtu, ndan, pala, gumra hte gumra jawn masha ni hpe lang na n rai.
8 Gome gaw shi a shayi sha hpe chyu jahka kau ngut ai hpang, shi hta na-um nasin bai byin wa nhtawm shadang sha langai bai lu wu ai.
9 Dai Madu gaw Hosea hpe, ?Shi hpe, ?Nye a amyu n rai,? ngu nna shamying u; hpa majaw nga yang, Israela amyu masha ni gaw nye a amyu masha ni n rai; ngai mung shanhte a Karai Kasang n rai nngai,? ngu nna tsun wu ai.
10 Israela amyu masha ni mung n dang hti, n dang shadawn lu hkra re ai panglai zaibru zawn tai wa na mara ai. Ya chyawm gaw Karai Kasang shanhte hpe, ?Nanhte gaw nye a amyu masha ni n rai nga myit dai,? ngu nna tsun ai. Rai ti mung, dai nhtoi du du wa ai shaloi shi gaw shanhte hpe, ?Nanhte gaw ahkrung nga ai Karai Kasang a kashu kasha ni rai nga myit dai!,? ngu nna tsun na ra ai. Ref 1:10: Rom 9:26.
11 Yuda amyu masha ni hte Israela amyu masha ni rau bai zup hpawng wa na mara ai. Shanhte gaw shanhte a matu ningbaw langai sha lata san da nna, shanhte a mungdan hta rawt kaba wa nhtawm ngamu ngamai wa na mara ai. Rai sa, Yezrela a shani gaw galu kaba ai shani tai na ra ai!