HTESALONI NI KAW SHAGUN DAT AI LAIKA LAHKAWNG
(2 THESSALONIANS)
Ga Nhpaw
Madu Yesu bai du sa na lam hpe myit mada ai hte seng nna chye na ai lam amyu myu a majaw Htesaloni Hpung hta kashuk kashak re ai lam matut nna naw byin taw nga ai. Madu a bai du sa na nhtoi ngu ai gaw, du boi ngut chyalu rai sai ngu ai makam masham shut ai lam hpe tang madun na matu, Htesaloni ni kaw shagun dat ai laika lahkawng hpe Kasa Pawlu ka nu ai. Hkristu garai n du sa ai shawng e, Hkristu hpe ninghkap ai, ?N hkru N Kaja Ai Wa,? ngu ai mauhpa gawng shingyan rawng ai wa woi awn ai n hkru n kaja ai lam gaw chyahtum chyalai madang de du na ra ai lam hpe madi madun sharin achyin ya nga ai.
Ndai laika hti ai ni gaw, ru yak jam jau amyu myu hkrum sha nga ti mung, Hkristu hpe kam sham ai lam hta ngang kang nga na matu mung, Pawlu shi hte mu gun manang ni zawn kan bau bungli tam galaw sha na matu mung, mai kaja ai amu bungli galaw ai hta hkam sharang let marai atsam dingyang dat na matu mung, ra ahkyak nga ai lam hpe madung dat nna aja awa shadut jahkat dat wu ai.
1
1 Pawlu, Sila hte Timohti, anhte gaw anhte a Wa Karai Kasang hte Madu Yesu Hkristu a masha ni rai nga ai Htesaloni Hpung masha ni hpang de laika ka dat ga ai. Ref 1:1: 2Ko 1:19; 1Ht 1:1.
2 Anhte a Kawa Karai Kasang hte Madu Yesu Hkristu gaw nanhte hpe chyeju hte ngwi pyaw ai lam jaw ya u ga law.
3 Tsaw ra ai hpu nau ni e, nanhte a lam hte lakap nna Karai Kasang a chyeju hpe anhte tut nawng e shakawn kungdawn ra ga ai. Shing rai shakawn kungdawn ai lam anhte galaw na gaw anhte a matu jaw ang ai amu rai nga ai; hpa majaw nga yang, nanhte a makam masham gaw grai galu kaba wa ai hte nanhte hta rawng ai, masha hpe tsaw ra ai myit mung grau grau nna kunghpan kaba wa sai.
4 Dai re ai majaw, anhte ni nan nanhte a lam hpe Karai Kasang a hpung ni hkan e kabu gumrawng let tsun dan hkawm nga ga ai. Anhte gaw nanhte matut nna hkrum sha taw nga ai zingri zingrat hte nni nkri hpe hkam jan let kam sham nga myit dai lam ni hpe tsun kabu gumrawng hkawm nga ga ai.
5 Ndai lam ni mahkra gaw, Karai Kasang a tara daw dan ai lam teng nga ai hpe sakse madun ya nga ai. De a akyu a majaw, nanhte gaw shi a mungdan hte ging dan ai ni tai wa na marin dai, de a matu she nanhte nni nkri hkrum nga myit dai.
6 Karai Kasang gaw tara ding ai lam galaw na ra ai rai nna, nanhte hpe nni nkri hkrum shangun ai ni a ntsa e nni nkri bai htang jaw na ra ai.
7-8 Madu Yesu gaw Karai Kasang hpe n dang kau ai ni hte anhte a Madu Yesu a Kabu Gara shiga hpe n madat n mara ai ni hpe ari jaw na matu shi a n-gun atsam rawng ai lamu kasa ni hte rau wan shinglet hte hpawn sumsing lamu de nna dan pru ai shaloi Karai Kasang gaw nni nkri hkrum hkra nga ai nanhte ni hte rau, anhte hpe mung htingtsi hkyamsa lam lu la shangun na ra ai.
9 Shanhte gaw Madu a myi man kaw na jahka kau ai hte shi a atsam a hpung shingkang hte daw hka mat wa ai ngu ai htani htana jahten shabyak kau ai ari hkrum na mara ai.Ref 1:9: 2Ht 2:8; Hpl 3:19; 2Pe 3:7.
10 Madu gaw bai du sa ai shani e, shi a amyu masha ni yawng mayawng a man e hpung shingkang hpe mung, kam sham ai ni yawng e shagrau hkungga ai lam hpe mung, hkam la na ra ai. Anhte hkaw tsun dan ai mungga hpe nanhte kam sham nga manit dai majaw, Madu hpe shagrau sha-a ai ni hta nanhte mung lawm na marin dai.
11 Ndai lam a majaw nanhte a matu anhte tut nawng e akyu hpyi ya nga ga ai. Nanhte gaw Karai Kasang e shaga la hkrum ai ni a asak hkrung lam hte ging dan ai hku asak hkrung lu myit ga, anhte Karai Kasang kaw akyu hpyi ya nga ga ai. Shi gaw shi a hpung shingkang atsam hte nanhte a mai kaja ai hpe shabyin mayu ai myit nga manga hpe jahpring shatsup ya nna, nanhte a makam masham a magam bungli hpe shangut shakre ya u ga.
12 Ndai hku nna anhte a Madu Yesu a mying nsang gaw nanhte a jaw e hpung shingkang dan hkung na ra ai, nanhte hta mung, shi a majaw hpung shingkang dan hkung na ra ai. Anhte a Karai Kasang hte Madu Yesu Hkristu a chyeju hte ndai lam byin wa u ga.