31
1 Laban a shadang sha ni gaw, ?Anhte a kawa madu da ai sut gan nga manga hpe Yaku e la kau ya nu ai; shi a sut gan lu malu yawng mung wa a marang e, lu su wa salu ai,? ngu nna tsun shajang nga ma ai hpe Yaku na wu ai.
2 Laban gaw shawng de na zawn hku lahkun n rai mat sai hpe mung shi mu wu ai.
3 Dai hpang dai Madu gaw shi hpe, ?Na a nwa ni hte na a bawsang ni nga ai mung de bai wa nu; ngai nang hte rau anga nga na nngai,? ngu nna tsun wu ai.
4 Dai re ai majaw, Yaku gaw Rahkela hte Lea hpe shi a sagu bainam hpung ni nga ai pa ga de shi hpe sa hkrum na matu shiga shana dat wu ai.
5 Shi gaw shan hpe, ?Nan a nwa gaw ngai hpe shawoi na zawn hku lahkun n rai nga ai hpe ngai mu mada ni ai; rai ti mung, nye wa a Karai Kasang chyawm gaw ngai hte rau nga nga li ai.
6 Nye a n-gun atsam yawng hte nan a nwa hpe ngai galaw jaw se ai gaw, nan lahkawng mung chye nga myit dai.
7 Ti mung, shi mahtang ngai hpe maw sha nna nye a shabrai hpe shi lang galai kau ya ni ai. Rai ti mung ngai hpe jasum machyi shangun na Karai Kasang n hkraw nga ai.
8 Laban mahtang, ?Dai aprup aprap re ai bainam hpung ni yawng gaw na a shabrai ni rai nga lit dai,? ngu wu yang, bainam hpung ni yawng aprup aprap re ai bainam kasha ni hkrat shajang ma ai. Shi gaw, ?Ka ka shit shit re ai bainam kasha ni gaw na a shabrai ni rai u ga,? ngu wu yang, dai bainam hpung ni yawng ka ka shit shit re ai bainam kasha ni hkrat shajang ma ai.
9 Karai Kasang gaw nan a nwa a sagu bainam ni hpe shaw la nna ngai hpe jaw ni ai.
10 Uli lung ai aten hta ngai mada yu we yang, uli lung ai bainam la ni gaw ka ka shit shit, aprup aprap, ateng apang re ai ni rai nga ma ai hpe ngai yup mang mu we ai.
11 Karai Kasang a lamu kasa gaw ngai hpe yup mang hta, ?Yaku e! ngu nngai; ngai mung, ?Rai sa, nang nga nga nngai,?? ngu nna htan we ai.
12 Shi gaw, ?Mada yu u, uli lung ai bainam la ni yawng ka ka shit shit re ai hte aprup aprap ateng apang re ai ni hkrai rai ma ai. Nang hpe Laban e galaw ai lam yawng mayawng hpe ngai mu se ai majaw ndai lam hpe ngai shabyin ai re.
13 Nang gaw masat dingsat nlung hta tsanlun sau ru bun nna, ngai hpe ga shaka hte dagam da ai dai Behtela e nang hpe shadan dan ai Karai Kasang rai nga nngai. Ya chyawm gaw na a daidaw ga de nhtang wa na matu jin jin di da sanu,?? ngu nna matut tsun wu ai. Ref 31:13: Nin 28:18-22.
14 Rahkela hte Lea mung Yaku hpe, ?An a matu, wa kaw na hkam la na sali wunli hpa mung n nga sai.
15 Shi an hpe maigan masha ni hpe zawn di mani ai. An hpe mung shi dut kau nu ai. An hpe jaw ra ai gumhpraw yawng mung shi jai kau nu ai.
16 An a kawa kaw na Karai Kasang shaw ya ai ndai sut gan yawng gaw an a matu hte an a kasha ni a matu rai nga mali ai. Dai majaw Karai Kasang nang hpe tsun matsun ai hte maren she galaw nu,? ngu nna htan mu ai.
17-18 Dai rai nna Yaku gaw shi a kawa nga ai Hkanan mung de nhtang wa na matu shajin da nu ai. Shi a kasha ni hpe mung, madu jan ni hpe mung gawla-uk ni hta shajawn nna Mesopotamia mung e shi lu la sai sut gan yawng hte hpawn shi a shawng e yam nga hpung ni yawng hpe gau let woi pru wa wu ai.
19 Ya Laban gaw sagu mun rep na nga, hkawm mat wa ai laman e, Rahkela gaw nta na gumgun gumhpai hpara sumla ni hpe lagu mat wa ya wu ai.
20 Yaku mung shi pru mat wa na lam n chye shangun ai sha, Laban hpe zai hte hkalem kau da wu ai.
21 Shi gaw shi lu da ai sut gan yawng hpe la nna tin tin pru mat wa wu ai. Shing rai Uhprat hka nu rap kawt kau nhtawm Gilead bum ga de yawng let pru sa wa nga ma ai.
22 Ya masum ya na ai hpang, Yaku hprawng mat wa sai lam Laban hpe tsun dan mu ai.
23 Shi gaw shi a masha ni hpe woi nhtawm sanit ya tup hkan shachyut yang, Yaku hpe Gilead bum ga e hkan dep wu ai.
24 Karai Kasang mung dai shana e yup mang hta Laban kaw dan pru nhtawm, ?Yaku hpe hpa lam hku mung n jahkrit shama ai sha, sadi nga u,? ngu nna tsun wu ai.
25 Yaku gaw shi a sum dabang hpe bum langai a ntsa e gap da nu ai; Laban mung shi a jinghku ni hte Gilead bum ga hta but nga ma ai.
26 Laban gaw Yaku hpe, ?Nang gaw ngai hpe zai hte hkalem kau da nna majan hta rim la ai num ni hpe zawn nye a shayi sha ni hpe hpa majaw woi mat wa n ni?
27 Nang gaw ngai hpe zai hte hkalem kau da nna, hpa mung n tsun ai sha, hpa majaw lagyim pru mat wa n ni? Nang ngai hpe tsun dan taw gaw, nang hkawm sa wa na hkrun lam ting hta tingse sumpyi ni hte mahkawn mangoi let kabu gara ai hte nang hpe shabawn dat lu na rai nngai.
28 Ya gaw ngai shu ni hte ngai sha ni hpe pyi n lu pup, n lu shakram dat lu hkra, nang galaw nit hka! Dai gaw angawk ai amu rai nga sai!
29 Nang hta machyi hkrum mat hkra galaw lu na n-gun atsam ngai lu nngai, rai ti mung, mana e, na nwa a Karai Kasang gaw hpa lam hku nna mung nang hpe n jahkrit shama na lam ngai hpe sadi jaw da ni ai.
30 Nang na a dum nta de nhtang wa na grai myit katu ai a majaw, wa ai gaw ngai chye na nngai; rai ti mung nye nta na gumgun gumhpai hpara sumla ni hpe nang hpa majaw lagu la nit ni?,? ngu nna tsun wu ai.
31 Yaku gaw, ?Na a shayi sha yan hpe nye a lata kaw na nang woi la kau ya na ndai ngu ngai myit nawn ai hte hkrit ai majaw rai sai.
32 Rai ti mung, ndai yang, na a gumgun gumhpai hpara sumla ni hpe kadai wa kaw nang mu hkrup ai rai yang, dai wa gaw si lu na rai wu ai. Ndai yang e nga ai anhte a masha ni hpe sakse shatai nhtawm nang hte seng ai arai hpa hpe mung tam nna dai ni hpe la u,? ngu nna htan wu ai. Yaku mahtang Laban a hpara sumla ni hpe Rahkela e lagu da ai hpe n chye da wu ai.
33 Laban gaw Yaku a sum, dai hpang Lea a sum, dai hpang mayam num lahkawng a sum de sa tam wu ai rai ti mung, shi a hpara sumla ni hpe n mu tam wu ai.
34 Rahkela a sum de mung shang wu ai. Rahkela gaw dai hpara sumla ni hpe la nhtawm gawla-uk hking tingsan kata e bang da nna, de a ntsa e shi dung nga wu ai. Laban chyawm gaw sum ting hkan tam sawk yu wu ti mung, dai ni hpe n mu wu ai.
35 Rahkela mung kawa hpe, ?Wa e, na a man e ngai n lu rawt tsap lu ti mung, ngai hpe masin hkum pawt et; ngai numsha hking lang nga nngai,? ngu nna tsun wu ai. Dai hpang Laban tam sawk yu wu ti mung, shi a hpara sumla ni hpe n mu tam wu ai.
36 Dai hpang Yaku masin pawt nhtawm, ?Ngai hpa baw ru hka amu shut kau a ni? Ngai hpe hkan tam shachyut na ahkang nang jaw lu hkra ngai kaning re ai tara hpe jahten kau nga a ni?
37 Ya nang nye a arai mahkra hpe nang tam sawk yu nit dai; dai rai yang, nang hte seng ai na nta na arai hpe mu tam la nu ni? Nang hte nye a masha ni dai hpe mu lu mu ga, ndai yang e, dai hpe shaw shapraw da gaw; shing rai shanhte mahtang an hta na kadai wa ding man nga ai hpe daw dan ya mi ga.
38 Lai wa sai hkun ning tup ngai nang hte rau nga wa ni ai; shaloi na a sagu bainam yi ni nbya bya ai n rai, na a yam nga hpung ni hta na sagu la langai mi hpe mung ngai sha kau ya ni ai n rai.
39 Nam na matse labye dusat ni yam nga langai kawa sat shagu dai mat mat ai hpe ngai hkum nan tut nawng hpai wa nngai. Dai hpe ngai n la ai sha nang hpe wa madun dun re ai gaw nye a mara n rai nga li ai. Shani hte shana e lagu la hkrum ai yam nga hpa rai tim, de a malai nang ngai kaw na hpyi la la rai nga ndai.
40 Shani na kahtet kang ai hte shana na kashung ai nni nkri hpe law law lang ngai hkam sha kau ni ai. Yup n lu sha ai mung ngai hkrum lai wa ni ai.
41 Shaning hkun ning ting ngai nang hte rau dai zawn nga kau ni ai. Na shayi sha yan a matu shi mali ning, na a yam nga hpung ni a matu kru ning, ngai galaw jaw kau da se ai. Dai rai tim pyi, nye a shabrai ni hpe shi lang nang galai kau ya nit dai.
42 Nye kaji kawa ni a Karai Kasang ngu ai Abraham, Isak ni a Karai Kasang gaw ngai hte rau she n nga ai rai taw gaw, nang ngai hpe kaman dat dat kau chyalu rai nga ndai. Rai ti mung Karai Kasang gaw ngai hkam sha ai tsin-yam tsindam hte ngai galaw sai amu hpe mu mada ya ni ai majaw, mana e, shi tara daw dan ai lam jaw ya mi ai,? ngu nna tsun wu ai.
43 Laban gaw Yaku hpe, ?Ndai numsha ni nye a shayi sha ni hkrai; shanhte a kasha ni mung ngai hte seng ai hkrai; ndai yam nga hpung ni mung nye a hpung ni hkrai rai nga li ai. Ndai yang e nang mu mamu mahkra gaw nye a hkrai rai nga ai. Shing re ai rai tim, nye a shayi sha ni hte shanhte a kasha ni hpe hkum da na ngai hpa mung dang di lu nga ai n rai nga ai majaw,
44 nang hte myit hkrum ga shaka tawn da na ngai jin jin rai nga nngai. An a myit hkrum ga langai hpe adum nga na sakse tai nga u ga, nlung ni hpe sumpum tawn ga,? ngu nna htan wu ai.
45 Dai rai nna Yaku gaw nlung langai mi hpe la nna dai hpe masat dingsat hku jung da wu ai.
46 Shi gaw shi a masha ni hpe nlung mahkawng sumpum da na tsun wu ai. Dai hpang shanhte mung nlung sumpum makau e shat jawm sha ma ai.
47 Laban chyawm gaw dai hpe Yegara Sahaduta ngu nna shamying wu ai. Yaku mahtang dai hpe Galeda ngu nna shamying wu ai.
48 Laban gaw Yaku hpe, ?Ndai nlung sumpum gaw an lahkawng a matu myit dum sakse tai nga na ra ai,? ngu nna tsun wu ai. Dai rai nna dai shara hpe Galeda ngu nna shamying mu ai.
49 Laban mung Yaku hpe, ?Anhte shada da hka mat wa yang, dai Madu anhte hpe ayu nga u ga law,? ngu nna tsun wu ai. Dai shara hpe Mizpa ngu nna shamying mu ai.
50 Laban mung matut nna, ?Nye a shayi sha yan hpe nang n gawn n sawn di nna kaga numsha ni hpe la ai rai yang, shing re ai lam hpe ngai n chye lu tim, Karai Kasang an hpe azi yu nga ai hpe gaw, adum nga ga.
51 Ndai yang e, an a lapran hta ngai sumpum da sai nlung ni hte jung da sai masat dingsat nlung ni nga nga sai.
52 Ndai nlung sumpum hte dai masat dingsat nlung lahkawng gaw myit dum shangun ai masat ni rai nga ai. Ngai mung ndai sumpum hta lai nna nang hpe galoi mung sa gasat na n rai; nang mung ngai hpe gasat na, ndai sumpum hte masat dingsat nlung hta na galoi mung lai lu na n rai.
53 Abraham a Karai Kasang hte Nahora a Karai Kasang gaw an a lapran e jeyang ya nu ga,? ngu nna tsun wu ai. Dai hpang Yaku gaw ndai ga sadi grin nga u ga, shi kawa Isak nawku ai Karai Kasang a mying nsang hte dagam shaka da wu ai.
54 Shi gaw, yam nga langai sat nhtawm bum ntsa e hkungga nawng ya wu ai; shi a masha ni hpe mung shat sha shaga wu ai; shanhte lusha sha ngut ai hpang dai bum e lana mi nga shalai kau mu ai.
55 Ya hpang jahpawt manap jau jau aten hta, Laban gaw shi a kashu ni hte shayi sha ni hpe pup shakram dat nhtawm shi a nta de nhtang wa na nga, pru mat wa wu ai.