20
1 Abraham gaw Mamre mare kaw nna dingda maga Hkanan mungdaw mi de htawt sa wa nhtawm, Kadesha hte Shura lapran e shanu nga ai. Dai hpang kade n na yang, Gerara mare hta nga nga wu ai.
2 Shi a madu jan Sara hpe shi a kajan re nga nna tsun wu ai majaw Gerara Hkawhkam Abimelek mung Sara hpe shi hpang de woi la kau wu ai. Ref 20:2: Nin 12:13, 26:7.
3 Karai Kasang chyawm gaw lana mi na aten hta, yup mang hte shi kaw dan pru nna, ?Masha e la da sai ndai num hpe nang woi la nit dai majaw, nang si na rin dai,? ngu nna tsun wu ai.
4 Rai ti mung, Abimelek mahtang shi kaw garai n kahtep ai rai nna shi gaw, ?Madu e, ngai hpa mara mung n lu dum nga nngai! Nang gaw ngai hpe mung nye a masha ni hpe mung jahten kau na wu ni?
5 Sara gaw shi a kajan re ngu nna Abraham shi nan tsun mi ai hte maren Sara mung dai zawn sha tsun mi ai. Ngai gaw ndai amu hpe san seng ai myit hte galaw nngai, ngai gaw shut hpyit ai amu hpa mung n galaw kau nga nngai,? ngu nna tsun wu ai.
6 Dai yup mang hta Karai Kasang gaw, ?Rai sa, san seng ai myit hte ndai lam nang galaw ndai hpe ngai chye nngai; dai rai nna ngai hpe nang yubak galaw na kaw nna nang hpe ban shadang ai hte shi hpe n hkra shangun nngai.
7 Rai ti mung, ya chyawm gaw dai num hpe shi a madu wa a lata de bai ap ya u. Shi myihtoi rai nga ai hte maren, na a matu shi akyu hpyi ya na ra ai; shaloi nang si lu na ndai n rai. Rai ti mung, nang shi hpe n ap ya ai rai yang chyawm gaw nang hte na a masha ni yawng si htum mat na myit dai hpe ngai sadi jaw nga nngai,? ngu nna htan wu ai.
8 Hpang jahpawt manap jau jau aten hta, Abimelek gaw shi a du salang ni yawng hpe shaga la nhtawm byin sai lam shanhte hpe tsun dan wu ai rai nna shanhte hkrit kahpra nga ma ai.
9 Dai hpang Abimelek gaw Abraham hpe shaga la nna, ?Nang anhte hpe hpa di nit ta? Nang hpe ngai hpa shut ai a majaw ngai hte nye a mungdan hta ndai tsin-yam tsindam hpe du shangun nga n ni? Kadai mung n galaw ging ai amu nang ngai hpe galaw kau nit dai.
10 Nang hpa majaw dai zawn re ai amu hpe galaw n ta?? ngu nna san wu ai.
11 Abraham gaw, ?Ndai yang e Karai Kasang hpe hkrit ai masha kadai mung n nga ai; nye madu jan hpe woi la lu na matu, ngai hpe sat kau na mu ai, ngu ngai myit nawn kau nngai.
12 Shi gaw nye a kajan majing mung rai nga ai. Shi gaw nye nu a shayi sha n rai ti mung nye wa a shayi sha rai nga ai rai nna shi hpe ngai la nngai.
13 Dai rai nna Karai Kasang gaw ngai hpe nye wa a nta kaw nna maigan mung ni de shangun dat ai shaloi ngai shi hpe, ?Nang ngai hta kade wa sadi dung nga ai hpe, ngai gaw na a kayung wa rai nga ai ngu nna masha shagu hpe tsun dan ai hku nna nang shadan dan lu nga ndai,?? ngu nna tsun we ai.
14 Dai hpang Abimelek gaw Abraham a lata hta Sara hpe bai ap ya wu ai; dai hte maren, sagu, dumsu hte mayam ni hpe mung jaw dat wu ai.
15 Shi gaw Abraham hpe, ?Ndai shara gaw nye a lamu ga hkrai rai nga li ai; dai rai nna nang yu sharawng ai shara kanang kaw rai tim nga u,? ngu nna tsun wu ai.
16 Shi gaw Sara hpe mung, ?Na a kayung wa hpe gumhpraw hkying mi ngai jaw nga nngai; dai gaw nang nan mara n kap nga ai hpe nang hte rau nga ai ni yawng a man e sakse madun ai ja rai nna, masha shagu mung nang nan shut hpyit ai amu hpa mung n galaw shut kau nga ndai hpe chye lu na mara ai,? ngu nna tsun wu ai.
17-18 Abraham a madu jan Sara hta byin lai wa sai lam a majaw dai Madu gaw Abimelek a hkaw wang na numsha kadai hpe mung kashu kasha n kap hkra dim da nu ai. Dai rai nna Abraham gaw Abimelek a matu akyu hpyi ya wu yang, shi hpe mung, shi a madu jan hte mayam num ni hpe mung Karai Kasang shamai ya nu ai rai nna shanhte gaw kashu kasha ni shaprat mu ai.