1 Dai Madu Mawshe hpe hkang da ai hte maren, dai chyoi pra ai shara e, shanhte daw jau yang, hkinjawng bu hpun palawng ni bu hpun na matu reng ai hpun palawng hpe mung, Arun a matu hkinjawng hpun palawng hpe mung, sawm tsit ai, shaba pu nsam rawng ai hte hkyeng ai sagu ri ni hte galaw ma ai.

2 Shanhte gaw mani tsawm ai lachyit hpa hkai lawng hpe sawm tsit ai, shaba pu nsam rawng ai hte hkyeng ai sagu ri hte ja ri ni hte galaw ma ai. 3 Shanhte gaw ja hpe pa ai hku dup shapraw la nna dai ni hpe mani tsawm ai lachyit hte sawm tsit ai, shaba pu nsam rawng ai hte hkyeng ai sagu ri ni hte maka ka bang na matu hpa ai sumri hku zen di da ma ai. 4 Shanhte gaw hpa hkai lawng a matu lahpa mahkai lahkawng hpe galaw nhtawm de a kade nde na matu shakung ni hpe matut da nga ma ai shaloi dai gaw gyit shangang da lu nga ai. 5 Dai Madu Mawshe hpe hkang da nu ai hte maren, reng ai hku da da ai shingkyit hpe mung hpa hkai lawng hte langai sha di nna shakap da na matu shawng na arung arai ni hte galaw da nga ma ai. 6 Shanhte gaw unuk lung seng ni hpe arut shatsawm nhtawm dai ni hpe ja hkalawk hta hkrep bang da ma ai; dai ni hta Yaku a shadang sha ni shi lahkawng hte a amying ni hpe lata maka tsawm tsawm hte tawk ka da nga ma ai. 7 Dai Madu Mawshe hpe hkang da sai hte maren, shanhte gaw Israela amyu lakung shi lahkawng a matu masat dingsat tai nga na rai nna hpa hkai lawng a lahpa mahkai ntsa hta dai ni hpe shakap bang da nga ma ai.

8 Shanhte gaw hpa hkai lawng hte maka ka yang lang ai arung arai ni hte sinda magap galaw ma ai. 9 Dai gaw man hkrum bung ai pa rai nna lahkawng hpam mai gumba nga ai, dai gaw galu de yungnu 9, nda de yungnu 9 rai nga ai. 10 De a ntsa hta manu dan ai nlung lam mali hpe shanhte hkrep da ma ai; langai ngu na lam hta patamya, utahpaya hte lung hkyeng; 11 lahkawng ngu na lam hta mya, nila hte sein; 12 masum ngu na lam hta wakintu, mahoya hte htitun nila; 13 hte mali ngu na lam hta myek-yoi, unuk hte nagahtoi ni rai nga ai. Ndai ni hpe ja hkalawk ni hta hkrep da nga ma ai. 14 Israela amyu lakung shi lahkawng a matu masat dingsat tai na, dai lung seng shagu hta Yaku a shadang sha ni a mying langai hte langai hpe tawk ka da nga ma ai. 15 Sinda magap a matu sumri hpe rit da ai zawn, ja jet hte saidawng hpe galaw da nga ma ai. 16 Shanhte gaw ja hkalawk lahkawng hte ja shanghkawng lahkawng galaw nna dai shanghkawng yan hpe sinda magap a ntsa jut lahkawng hta shatut da nga ma ai. 17 Shanhte gaw dai ja saidawng lahkawng hpe sinda magap ntsa na 18 shanghkawng lahkawng hta noi da let, saidawng matu yan hpe hpa hkai lawng a hpa hkai ntsa na hkalawk yan hta noi da nga ma ai. 19 Shanhte gaw ja shanghkawng lahkawng hpe galaw nhtawm, dai sinda magap htap lahkawng hta na hpa hkai lawng de jahtum ai htap a htumpa jut lahkawng hta shatut da nga ma ai. 20 Shanhte gaw ja shanghkawng lahkawng hpe galaw nna hpa hkai lawng a man maga nshang matu ang, dai reng ai shingkyit a ntsa hkawt hta kade nde na matut ai makau e dai yan hpe shatut da ma ai. 21 Dai Madu Mawshe hpe hkang da sai hte maren, sinda magap a shanghkawng hte hpa hkai lawng a shanghkawng ni hta sawm tsit ai sumri hte gyit da nga ma ai. Sinda magap mahtang shingkyit a ntsa e rai nga ai majaw dai gaw n shamu lu nga ai.

22 Hpa hkai lawng a kata e hpun ai ntsa palawng hpe sawm tsit ai ri hte galaw ma ai. 23 Dai hta baw shawn na matu lawngdu langai tawn da nna, dai n je mat hkra, shakung grup hpe da la ai sumpan hte du hkawp na rai nga ai. 24-26 Dai Madu Mawshe hpe hkang da sai hte maren, dai ntsa palawng a matu grup grup hta sawm tsit ai, shaba pu nsam rawng ai hte hkyeng ai sagu ri ni hte hkainu si ngu ai si ni hte de a langai din din hta ja dingsi ni hpe gali galai rai noi da nga ma ai.

27 Shanhte gaw Arun hte shi a shadang sha ni a matu palawng ni hte hpawn, 28 htanbam, bunghkaw, lachyit labu kadun, 29 mani tsawm ai dai sawm tsit ai, shaba pu nsam rawng ai, hkyeng ai sagu ri ni hte maka ka da ai shingkyit ni hpe dai Madu Mawshe hpe hkang da sai hte maren galaw ma ai. 30 Shanhte gaw mawn sumli arai, chyoi pra ai ap nawng kumla hpe ja jet hte galaw nna de a ntsa e ?Dai Madu a matu ap nawng ai,? ngu nna tawk ka da ma ai. 31 Shanhte gaw dai Madu Mawshe hpe hkang da sai hte maren dai hpe htanbam a man maga hta shakap nna sawm tsit ai sumri hte gyit da ma ai.

32 Dai Madu a hpung shingkang shanu nga ai Sum hte seng ai magam amu yawng hte hpe hpang jahtum galaw shangut lu ma ai. Dai amu bungli shagu hte hpe dai Madu Mawshe hpe hkang da sai hte maren, Israela amyu masha ni galaw ma ai. 33 Shanhte gaw dai Sum hte dai hte seng ai arung arai ni yawng hpe mung, chyinghkyi, hpunpyen, htinggrang, shadaw, machyaw ni; 34 jaw jahkyeng ai sagu la hpyi magap, mani tsawm ai shanhpyi magap, nba grang; 35 Ga Shaka Sumpu hte dai hta rawng ai lungpa ni, de a kandang ni, de a magap ni; 36 Karai Kasang a matu nawng jau ai muk, muk ku hte dai hte seng ai arung arai ni yawng; 37 pyengdin shadun hte de a pyengdin ni, dai hte seng ai arung arai ni yawng, pyengdin wan sau, 38 ja tawn hkungri; chya na namman sau; manam pyaw ai baw; Sum chyinghka grang; 39 magri mang tawn hkungri hte de a magri mang magrang; de a kandang ni hte dai ni hte seng ai arung arai ni yawng; shin na ntsin htung hte de a shadun ku; 40 wang chyinghka grang a matu chyinghka grang hte de a sumri ni, mailak ni, Sum hta lang na arung arai ni yawng; 41 hkinjawng ni Chyoi Pra ai Shara hta hpun na reng ai hpun palawng ni; hkinjawng Arun hte shi a shadang sha ni hpun na chyoi pra ai hpun palawng ni hpe Mawshe hpang de la sa ma ai. 42 Israela amyu masha ni mung dai Madu Mawshe hpe hkang da sai hte maren magam amu yawng mayawng hte hpe shangut da ma ai. 43 Mawshe gaw dai amu shagu hpe jep yu nna dai Madu hkang da sai hte maren, amu yawng mayawng hpe shanhte galaw shangut da masai hpe mu wu ai shaloi, Mawshe gaw shanhte hpe shaman ya wu ai.