13
1 Dai Madu gaw Mawshe hpe,
2 ?Israela amyu hta na shawng shangai ai lasha alat shagu hte yam nga hta na shawng hkrat ai ala shagu hte hpe ngai madu da nga nngai majaw, dai shawng shangai ai shinggyim masha alat hte yam nga alat ni yawng, nye a matu ap nawng ya na rai myit dai,? ngu nna tsun wu ai. Ref 13:2: Bhk 3:13; Luk 2:23.
3 Mawshe gaw amyu masha ni hpe, ?Nanhte mayam yam hkrum ai shara hte Egutu mung na pru wa ai shani na dai nhtoi hpe adum nga mu. Dai nhtoi gaw dai Madu shi a galu kaba ai daru magam n-gun hte nanhte hpe woi shapraw wa ai shani rai nga ai. Nanhte gaw matsi n rawng ai muk sha lu na myit dai.
4 Nanhte gaw Abi shata ngu ai shawng na shata, ndai shani hta nan Egutu mung kaw nna pru wa nga myit dai.
5 Dai Hkanan, Hiti, Amori, Hiwi hte Yebusi masha ni nga ai lamu ga, dai Madu gaw nanhte hpe jaw na matu nga, nanhte a kaji kawa ni hta dagam let ga sadi shagrin da nu ai dai sut su ngamu ngamai nna ga sau hte hpring ai mung de nanhte hpe woi shang wa ai shaloi, nanhte gaw shawng na shata shagu hta ndai poi hpe galaw na rai myit dai.
6 Nanhte gaw matsi n rawng ai muk hpe sanit ya tup sha lu na rai myit dai; sanit ya shani gaw dai Madu hpe shagrau sha-a ai poi galaw ai shani rai nga ai.
7 Nanhte gaw matsi hte galaw ai muk hpe sanit ya tup sha lu na myit dai n rai; matsi mung, matsi hte galaw ai muk mung nanhte a mungdan kata gara shara hta mung n tawn da lu na myit dai.
8 Nanhte Egutu mung na pru wa myit dai shaloi, nanhte a matu dai Madu galaw dan nu ai amu a majaw ndai lam yawng hpe nanhte galaw nga myit dai hpe lusha poi hpang wa ai shaloi nanhte a shadang sha ni hpe tsun shaleng dan nga mu.
9 Na a lata hta shing n rai na a kahtan hta masat arai lama mi shakap da ai zawn dai htung masa hpe adum nga na rai myit dai. Dai Madu gaw shi a daru magam n-gun kaba hte nanhte hpe Egutu mung kaw na woi shapraw wa manit dai majaw dai Madu a Tara hpe matut manoi hti shakrai na matu shadum jahprang ya na rai myit dai.
10 Ndai poi hpe shaning shagu ndat da ai aten shagu hta a galaw nga mu.
11 ?Dai Madu gaw nanhte hpe mung, nanhte a kaji kawa ni hpe mung, dagam let ga sadi jaw da sai dai Hkanan masha ni nga ai mung de nanhte hpe woi shang wa na ra ai.
12 Shi gaw dai mung hpe jaw ya ai shaloi, shawng shangai ai lasha alat hte shawng hkrat ai yam nga alat shagu gaw dai Madu a matu nanhte nawng jau ya lu na rai myit dai; nanhte kaw na shawng hkrat ai yam nga ala shagu gaw dai Madu a matu rai nga ai, Ref 13:12: Pru 34: 19-20; Luk 2:23.
13 rai ti mung, shawng hkrat ai lawze ala shagu hpe chyawm gaw de a malai sagu kasha langai mi nawng jau nna nanhte bai mari hkrang la lu na myit dai. Dai lawze hpe mari hkrang la na matu nanhte n ra sharawng myit dai rai yang, de a du gang daw kau ya lu na rai myit dai. Shinggyim masha hta na lasha alat shagu hpe chyawm gaw mari hkrang la ra na rai myit dai.
14 Du na ra ai aten hta, na a shadang sha mahtang, ndai htung tara gaw hpa baw lachyum rai ta?, ngu nna san yang, nang gaw shi hpe, ?Dai Madu gaw galu kaba ai daru magam n-gun lang nna anhte mayam sa tai nga ai Egutu mung kaw na woi shapraw wa mi ai.
15 Egutu hkawhkam wa myit ja nna anhte hpe dat dat na n hkraw ai shaloi, Egutu mung hta nga ai lasha alat hte shawng hkrat ai yam nga ala ni yawng hpe dai Madu sat kau ya wu ai. Shing re ai majaw, shawng hkrat ai yam nga ala shagu hpe dai Madu a matu anhte hkungga jaw ga ai, rai ti mung, anhte a lasha alat ni hpe chyawm gaw mari hkrang la lu nga ai.
16 Ndai htung tara gaw anhte a lata shing n rai kahtan ni hta masat arai lama mi hpe shakap da ai zawn, adum nga na rai myit dai. Dai gaw dai Madu shi a galu kaba ai daru magam n-gun hte anhte hpe Egutu mung kaw nna woi shapraw wa ai hpe adum shangun nga na ra ai,? ngu nna tsun wu ai.
17 Egutu hkawhkam gaw amyu masha ni hpe dat dat ai shaloi panglai hkin-gau lam hkan nna Hpilisti mung de hkrang ai dingtawk lam nga ti mung, Karai Kasang shanhte hpe dai lam hku n woi wa nga ai. Karai Kasang gaw, ?Shanhte hpyen gasat ra na hpe mu ai shaloi, amyu masha ni shanhte a myit ni galai mat nna Egutu mung de nhtang mat wa na hpe ngai n ra sharawng nngai,? ngu nna myit da wu ai.
18 Shing rai na malai, shi gaw shanhte hpe Nawng Hkyeng de hkrang ai dai gawai ai nam mali lam hku woi wa wu ai. Israela amyu masha ni mung majan a matu laknak ni lang da nga ma ai.
19 Yosep gaw, ?Karai Kasang nanhte hpe hkye mawai la myit dai shaloi nanhte gaw nanhte hte rau nye a hkum tsawp hpe ndai shara kaw nna hpai lung wa lu na rai myit dai,? ngu nna ndai amu galaw na matu Yosep gaw Israela masha ni hte dagam ga sadi galaw da sai hte maren, Mawshe gaw shi hte rau Yosep a hkum tsawp hpe la lung mat wa wu ai. Ref 13:19: Nin 50:25; Ysh 24:32.
20 Israela masha ni gaw Sohkut kaw na pru mat wa nhtawm nam mali a jahtum na Ehtam shara e but nga ma ai.
21 Dai Madu gaw shani aten e, shanhte hpe lam madun na matu sumwi shadaw, shana e nhtoi jaw ya na matu wan shadaw hte shanhte a shawng e sa wa wu ai; dai rai nna shani e mung, shana e mung shanhte bu hkawm lu ma ai.
22 Shani na sumwi shadaw hte shana na wan shadaw gaw amyu masha ni a shawng e tut nawng a nga nga ai.