1 Ndai amu ni galaw ngut ai hpang, Israela amyu masha ni a ningbaw nkau mi ngai kaw sa nna, amyu masha ni, hkinjawng ni hte Lewi masha ni nan htingbu mungdan ni rai nga ai Amon, Moba, hte Egutu, shing n rai Hkanani, Hiti, Perizi, Yebusi hte Amori masha ni hte shanhte nan n daw n hka ai sha nga nga ma ai rai nna, dai masha ni galaw ai matsat shabat amu ni hte maren shanhte hkan galaw nga ma ai lam tsun dan mi ai. 2 Yuda lasha ni mung maigan numsha ni hpe hkungran la ma ai majaw Karai Kasang a chyoi pra ai amyu masha ni awu asin tai mat wa masai. Ningbaw ni hte du salang ni grau nna shut hpyit nga ma ai. 3 Dai lam hpe ngai na jang, myit htum ai hte nye a hpun palawng ni gang je kau nna, nye a kara hte nhka mun ni hpe baw kau nhtawm gawng run yawn hkyen let dung nga nngai. 4 Bawng dung ai kaw nna bai nhtang wa sai ni hpe yubak hte seng nna Israela a Karai Kasang tsun nu ai ga hpe hkrit kahpra nga ma ai majaw, nye a grup grup de sa shinggyin hpawng nga ma ai rai nna shagu hkungga nat nawng na shana de du hkra, dai yang e yawn let ngai dung nga nngai.

5 Ya, shana de na shagu hkungga nawng jau na aten du jang, ngai yawn hkyen nga ai shara kaw nna rawt nhtawm, gang je kau sai hpun palawng ni hpe bu hpun ai hte lahput hput di let, dai Madu nye a Karai Kasang hpang de lata ladawn nna akyu hpyi nngai. 6 Ngai gaw, ?O Karai Kasang e, anhte a yubak gaw baw lim hkra sumpum nga nna, dai ni gaw sumsing lamu du hkra dep nga ai majaw, na a man e nye a baw sharawt lu na ngai nau wa kaya nga nngai. 7 Anhte a ji wa ni a prat kaw nna dai ni du hkra, na a amyu masha rai nga ai anhte ni yubak kaba galaw shut kau saga ai. Anhte shut kau ai yubak ni a majaw anhte mung, anhte a hkawhkam ni hte hkinjawng ni maigan hkawhkam ni a lata de hkrat mat nna, htau sat ai mung, hpya lu hpya sha ai hte bawng rim ai mung hkrum sha saga ai. Dai ni du hkra pyi, anhte mahkra myi man sum nga ga ai. 8 O Madu anhte a Karai Kasang e, nang gaw ya hkring mi sha pyi, anhte nkau mi hpe mayam kaw nna shalawt dat nhtawm ndai chyoi pra ai shara hta shim lum ai hte shanu nga na chyeju anhte hpe jaw da nit dai. Nang chyawm gaw anhte hpe mayam kaw nna shalawt la ai hte asak nnan jaw ya mani ai. 9 Anhte gaw mayam ni rai nga ga tim, nang gaw anhte hpe mayam amu hta kau da nga ndai n rai. Yuda mung hte Yerusalem mare hta shim lum ai lam mu tam la nhtawm matut nna shanu nga lu na ahkang mung, hten run mat sai na a Nawku Htingnu hpe bai gaw gap na matu mung, Persi hkawseng a jaw e nang anhte hpe myi man pa shangun nga nit dai.

10 ?Rai ti mung, ya chyawm gaw, O Karai Kasang e, dai lam yawng mayawng byin ngut sai majaw anhte hpa naw tsun lu na rai nga ga ta? 11 Anhte mahtang na a shangun ma ni, myihtoi ni hku nna jaw ai hkang da ai ga ni hpe bai lale kau saga ai. Anhte shang madu la hkyen ai mungdan gaw n san n seng nga ai hte dai mung e shanu nga ai masha amyu ni gaw jahtum shara mi kaw nna maga mi de hpring chyat rai nga ai matsat shabat re ai amu ni a majaw awu asin rai nga ai lam shanhte anhte hpe tsun dan mi ai. 12 Shanhte anhte a amyu matu ni dai mungdan hta kabu gara ai hte htani htana madu la shangun na matu rai yang, shanhte gaw dai masha amyu ni hte kayau kaya rai dinghku galoi mung n de na matu mung, shanhte a ngamu ngamai lam hte awng dang ai amu ni hta galoi mung n shang karum la na lam mung anhte hpe tsun mi ai. Ref 9:12: Pru 34:11-16; Trj 7:1-5. 13 Anhte a Karai Kasang e, Anhte hta byin hkrum hkra sai lam magup a yubak hte galaw shut kau sai amu ni a matu ari hkrum sha nga ga tim pyi, nang gaw anhte hkam la ging ai mara daram nang ari n jaw ai sha, hkrung nga na ahkang jaw ya nga ndai. 14 Dai hpang, ndai n hkru ai masha amyu ni hte kayau kaya dinghku rawn sha let, na a hkang da ai ga ni hpe anhte kaning rai bai n sawn n sang di lu na rai ga ta? Anhte bai galaw hkrup ga ai rai yang, nang masin grai pawt wa nna, kadai mung n lawt lu mat hkra, anhte hpe atsai awai shamyit kau na rai ndai. 15 Madu Israela a Karai Kasang e, nang gaw teng man ai wa rai nga ndai; rai ti mung anhte hpe naw jahkrung da shangun nga ndai. Anhte gaw na a man e anhte a mara hpe yin la ga ai; anhte gaw na a man e dawng pru na ahkang lu ga ai n rai.?