40
DU NA RA AI ATEN NA NAWKU HTINGNU A SHINGRAN
1 Yerusalem hten run mat ai shi mali ning na mat ai hte anhte bawng dung hkrum ai hkun manga ning a shaning nnan shata a shi ya shani hta, dai Madu a hpung shingkang nye a ntsa e du nna ngai hpe woi wa ai.
2 Karai Kasang gaw ngai hpe shingran hta Israela mung de woi wa nna, grai tsaw ai bum ntsa e ngai hpe tawn da nga ai. Dai bum a man de dum nta ni hte gaw de da ai mare zawn san ai hpe ngai mu nngai. Ref 40:2: Shr 21:10.
3 Shi gaw ngai hpe grau ni htep hkra woi wa ai rai nna, dai yang e magri mang zawn htoi gala ai masha langai mi hpe ngai mu nngai. Dai wa gaw lachyit sumri hte shadawn ningren lang nna, chyinghka lam makau e tsap nga ai. Ref 40:3: Shr 11:1; 21:15.
4 Shi gaw ngai hpe, ?Si chye ai wa e, yu yu u. Nang hpe ndai shara de woi wa ni ai majaw, ngai nang hpe madun dan na lam shagu hpe atsawm sha na la nna matsing da u. Israela amyu masha ni hpe nang mu ai lam shagu tsun dan ra na rai ndai,? ngu nna tsun wu ai.
5 Ngai mu mada ai gaw Nawku Htingnu rai nga ai, de a grup yin hta bunghku langai nga nga ai. Shaloi masha langai mi gaw pe 10 galu ai shadawn ningren la nna bunghku shadawn nga ai. Dai bunghku gaw tsaw de pe 10 rai nna htat ai maga de pe 10 rai nga ai. Ref 40:5-42:20: 1Hk 6:1-38; 2Hl 3:1-9.
6 Dai hpang, sinpraw maga de myi man yawng ai chyinghka de shi sa du nga ai. Shi gaw ntsa de lahkam lung wa nhtawm ntsa htap na shang wa chyinghka lam hpe shadawn nga ai; dai gaw pe 10 sung nga ai.
7 De a shingdu maga de lapran lam langai mi nga ai, dai lam a kade nde de sin langa gawk masum sum mung rawng nga ai. Gawk ni langai hte langai gaw galu de pe 10, nda de pe 10 rai nna langai hte langai a lapran e pe 8 htat ai shakum ni nga nga ai. Bai sin langa ni a gawk shingdu de pe 10 galu ai lapran lam langai nga nna, dai gaw Nawku Htingnu de man sha-ang da ai chyinghka lam gawk de hkrang nga ai.
8-9 Dai gawk hpe shi shadawn yang, dai gaw pe 14 sung nga ai hpe mu wu ai. Dai gaw Nawku Htingnu hte ni htum ai chyinghka lam a jahtum hta nga nna, de a jahtum htum ai shara hta pe 4 htat ai bunghku ni nga nga ai.
10 (Dai lapran lam a lahkawng maga na sin langa gawk ni yawng maren kaba nna gawk ni a lapran madin shakum ni yawng mung maren htat nga ai.)
11 Dai hpang, dai masha wa gaw chyinghka lam kade dam ai hpe shadawn wu yang, dai yawng pe 22 rai nna, hpaw da ai chyinghka ni a lapran shara gaw pe 16 rai nga ai.
12 Sin langa gawk shagu a ntawt maga de yungnu 20 tsaw nhtawm yungnu 20 htat nna nem ai shakum gumba nga nga ai. (Gawk ni langai hte langai galu de, nda de pe 10 man bung shajang nga ma ai.)
13 Dai hpang, shi gaw gawk langai mi a shingdu shakum kaw nna lapran lam hpe lai di nhtawm kaga gawk langai mi a shakum gumba hkren shadawn yang, dai gaw pe 42 rai nga ai.
14 Jahtum htum ai gawk gaw kata wang hte matut nga ai. Dai gawk hpe shi shadawn nna, dai gaw pe 34 dam nga ai hpe mu lu nga ai.
15 Chyinghka nga ai shinggan wang shakum kaw nna kata wang htep rai nga ai jahtum htum ai gawk du hkra yawng hpawn pe 84 rai nga ai.
16 Sin langa gawk ni yawng a shinggan shakum ni hta mung, gawk lapran na kata shakum ni hta mung hkuwawt chyinghka kaji ni nga nga ai. Lapran lam de man yawng ai kata na shakum gumba ni hta namhtan hpun sumla tawk ka da nga ai.
17 Dai masha wa gaw ngai hpe chyinghka lam hku nna shinggan wang kata de woi jashawn la nga ai. Dai yang e, shinggan shakum hte man hkrum rai gap da ai gawk sumshi nga nga ai;
18 dai gawk ni a ndaw yang hku mung wang kata grup yin du hkra nlung ni hte nep da nga ai. Ndai shinggan wang kata gaw kata wang kata madang hta shanem da nga ai.
19 Kata wang kata de hkrang ai chyinghka lam langai mi mung tsaw ai madang hta nga nga ai. Chyinghka lam lahkawng a lapran hpe dai masha wa shadawn yang, dai gaw pe 168 gang nga ai.
20 Dai hpang, dai masha wa gaw shinggan wang kata de hkrang ai dingdung maga de na chyinghka lam hpe shadawn wu ai.
21 Kade nde masum sum rawng ai sin langa ni a gawk ni langai hte langai a lapran na madin shakum ni hte shawng du ai gawk ni yawng a shadawn shadang gaw sinpraw chyinghka lam hte maren rai nga ai. Dai chyinghka lam gaw gale de pe 84 rai nna nda de pe 42 rai nga ai.
22 Shawng du ai gawk, hkuwawt ni hte tawk ka da ai namhtan hpun sumla ni gaw sinpraw chyinghka hkrang kasi hte maren bung nga ai. Lakang n-gam sanit gaw chyinghka de di rai nna, shawng du ai gawk mung wang kata de myi man yawng nga ai.
23 Dingdung chyinghka lam kaw nna kata wang hpe dinghkren lai di wa yang, sinpraw maga de na zawn kata wang de di du lu ai kaga chyinghka lam mung nga nga ai. Dai masha wa chyinghka lam lahkawng a gang ai hpe shadawn yang, dai gaw pe 168 galu nga ai.
24 Dai hpang, dai masha wa gaw dingda maga de ngai hpe woi wa ai hte dai shara hta kaga chyinghka lam langai mi hpe mu ga ai. Dai maga na kata shakum ni hte shawng du ai gawk ni hpe shi shadawn wu yang, dai ni mung kaga chyinghka lam ni hte maren rai nga ai.
25 Ndai chyinghka lam a gawk hkuwawt ni mung kaga ni hte maren rai nna yawng hpawn galu de pe 84, nda de pe 42 rai nga ai.
26 Lakang n-gam sanit gaw chyinghka lam de di rai lung nna shawng du ai gawk mung wang kata de myi man yawng nga ai. Makau lam de myi man yawng nga ai kata shakum gumba ntsa ni hta namhtan hpun sumla ni hpe tawk shakap da nga ai.
27 Ndai shara hta mung, kata wang kata de hkrang ai chyinghka lam langai mi nga nga ai. Dai masha wa gaw ndai lahkawng ngu na chyinghka lam du hkra shadawn wu yang, dai gaw pe 168 galaw nga ai.
28 Dai masha wa gaw dingda chyinghka lam hku nna kata wang kata de ngai hpe woi sa wa wu ai. Shi gaw dai chyinghka lam hpe shadawn yu yang, dai gaw shinggan wang shakum gumba na chyinghka lam ni hte maren kaba nga ai.
29-30 Sin langa gawk ni, shawng du ai gawk hte kata shakum ni yawng mung kaga chyinghka lam ni hte hkrang kasi bung nga ai. Dai chyinghka lam maga de na gawk ni hta hkuwawt ni mung rawng nga ai. Dai ni yawng hpe gumhpawn shadawn yang, galu maga de pe 84 rai nna nda maga de pe 42 rai nga ai.
31 De a shawng du ai gawk mung kaga shinggan wang kata de myi man yawng nna lapran lam dingyang na shakum ni hta namhtan hpun sumla ni hpe tawk ka da nga ai. Dai dingda chyinghka de hkrang na matu lakang n-gam matsat mung htawn da ya nga ai.
32 Dai masha wa gaw sinpraw chyinghka lam hku nna kata wang kata de ngai hpe woi sa wa wu ai. Shi gaw chyinghka lam hpe shadawn yu yang, kaga ni hte maren hkrang kasi bung nga ai.
33 Sin langa gawk ni, shawng du ai gawk hte kata shakum ni hpe shadawn wu yang, dai ni gaw kaga chyinghka lam ni a hkrang kasi hte maren rai nga ai. Dai grup yin yawng hta hkuwawt hku ni rawng nna, shawng du ai gawk hta mung rawng nga ai. Dai ni yawng hpe gumhpawn shadawn yang, galu maga de pe 84, nda maga de pe 42 rai nga ai.
34 Bai de a shawng du ai gawk mung shinggan wang kata de myi man yawng nna de a lapran lam dingyang na shakum gumba ni hta namhtan hpun sumla ni hpe tawk ka da nga ai. Dai sinpraw chyinghka lam de hkrang na matu lakang n-gam matsat mung htawn da ya nga ai.
35 Dai hpang, dai masha wa gaw dingdung chyinghka lam de ngai hpe woi sa wa wu ai. Shi gaw dai chyinghka lam shadawn wu yang, dai gaw kaga ni hte maren hkrang kasi bung nga ai.
36 Dai ni hte maren, sin langa gawk ni, mawn sumli da ai kata shakum gumba ni, shawng du ai gawk hte grup yin yawng hta hkuwawt hku ni rawng nga ai. Dai ni yawng hpe gumhpawn shadawn yang, galu de pe 84 rai nna nda maga de pe 42 rai nga ai.
37 Bai de a shawng du ai gawk mung shinggan wang kata de myi man yawng nga ai. Bai lapran lam dingyang na shakum gumba ni hta namhtan hpun sumla ni hpe tawk ka da nga ai. Dai chyinghka lam de pru lung wa na matu lakang n-gam matsat mung htawn da ya nga ai.
38 Shinggan wang, dingdung maga na kata chyinghka lam hte matut nna gap jat da ai nta langai mi nga nga ai. Dai gaw wang kata de man yawng nga ai shawng du ai gawk maga de hpaw da nga ai; dai shara hta hkum ting wan nat hkungga nat nawng na matu si ai dusat hkum ni hpe kashin ma ai.
39 Ndai shawng du ai gawk hta kade nde ku lahkawng hkawng rai nga ai ku mali rawng ai gawk mung nga nga ai. Dai ku ntsa ni hta hkum ting nat nawng na shagu hkungga, mara raw hkungga hte htingrai htingrat hkungga ni a matu nawng jau na dusat ni hpe shanhte sat ma ai.
40 Dai gawk a shinggan maga ngu na dingdung chyinghka lam de lung wa ai chyinghka lam a kade nde mung bung ai ku lahkawng hkawng nga nga ai.
41 Shagu hkungga dusat ni hpe sat na matu ku yawng matsat nga nna, gawk kata de ku mali, shinggan ngu na wang kata e mali rai nga ai.
42 Hkum ting nat nawng ai hkungga hpe hkyen lajang ya ai hta lang na matu tawk da ai nlung ku mali mung, jat la ai nta daw hta nga nga ai. Dai ni gaw tsaw de yungnu 20, de a ntsa na man bung ai pa gaw yungnu 30 pa nga ai. Dai ku ni a ntsa e hkungga shan sat ai hta lang ai arai ni hpe tawn da nga ma ai.
43 Dai ku ni a matu grup grup hta yungnu 3 gang ai hku shakau shatsawm da nga ai. Shagu hkungga shan ni yawng hpe mung ku ni a ntsa e mara nga ai.
44 Dai hpang, ngai hpe kata wang de woi sa wa ai. Dai kata wang hta hpaw nga ai gawk lahkawng nga nga nna, langai mi gaw dingda maga de man yawng nhtawm dingdung maga de man yawng nhtawm dingda chyinghka makau e nga ai.
45 Dai masha wa gaw dingda de man yawng ai gawk gaw Nawku Htingnu e daw jau ai hkinjawng ni a matu rai nga ai,
46 dingdung de man yawng ai gawk gaw tawn hkungri e daw jau ai hkinjawng ni a matu rai nga ai, nga nna ngai hpe tsun ai. Dai hkinjawng ni yawng mung Zadok a matu mara ni rai nhtawm, dai Madu a man e shang nna shi hpe daw jau na matu ahkang lu ai Lewi amyu hta na masha ni rai ma ai.
47 Dai masha wa gaw kata wang hpe shadawn wu yang, dai gaw man mali maga de pe 168 hpra galu nga ai. Dai Nawku Htingnu gaw sinna maga de shanang gap nna, tawn hkungri gaw Nawku Htingnu a shang wa ai ndaw e rai nga ai.
48 Dai hpang, shi gaw ngai hpe Nawku Htingnu a npan lam gawk de woi sa wa wu ai. Shi gaw shang wa chyinghka lam hpe shadawn wu yang, dai gaw nda de pe 9 sung nna, gang de pe 24 rai nhtawm kade nde pe 5 htat ai shakum ni nga nga ai.
49 Shawng du ai gawk de lung wa ai lakang n-gam ni nga nga ai, dai gaw pe 34 dam nna gang de pe 20 rai nga ai. Shang wa na npan kade nde lahkawng maga hta shadaw langai ngai jung da nga ai.