1 Dai Madu gaw ngai hpe ga shaga wu ai. 2 Shi gaw, ?Si chye ai masha wa e, Tsaw Htum ai dai Madu ngai nan Turu hkawhkam hpe tsun nga ai ga hpe htawn tsun u: Gumrawng ai hte shakawng shakat nga ndai, karai langai tai na ngu, nang tsun ndai. Nang gaw panglai hka ni shinggrup da ai tingnyang ntsa e karai langai zawn dung na nngai ngu, tsun ndai. Nang gaw karai langai tai lu na zawn nawn nga ndai, rai ti mung, n rai law, nang gaw karai n rai, si chye ai masha sha rai nga ndai. 3 Nang gaw Danela (Daniela) hta grau nna hpaji chye nga ai, na a man e hpa mung makoi magap da lu ai n rai, nga nna nang myit nawn la nga ndai. 4 Na a hpaji byeng-ya hte kung kyang ai hpaji gaw nang hpe ja gumhpraw sut gan ni hte sut su shangun nga nit dai. 5 Nang gaw hpaga amu ni hta myit sam ai hte galaw nna hpaga amyat law law galaw shapraw nit dai. Na a sut gan a majaw, nang kade wa myit kaba gumrawng nga n hka!

6 ?Dai rai nna, ndai gaw Tsaw Htum ai dai Madu ngai nan tsun nga ai mungga rai nga ai: Nang gaw karai langai zawn hpaji chye nga ndai ngu, nang myit nawn la nga ndai majaw, 7 nang hpe gasat na matu, gumshem ai gumlau hpyen ni hpe ngai woi sa wa na nngai. Shanhte gaw na a kung kyang ai hpaji hte hpaji byeng-ya hte lu tawn ai tsawm htap ai arung arai ni yawng hpe jahten sharun kau ya na mara ai. 8 Shanhte gaw nang hpe sat kau nna hka nsung hku de nang hpe shayu kau dat na mara ai. 9 Shanhte nang hpe sa sat kau na matu du sa ai shaloi, nang gaw karai langai rai nga nngai ngu naw tsun na n ni? Masha sat ai ni hte nang hkrum ai shaloi, nang gaw karai nan n rai, si chye ai masha rai na rai nga ndai. 10 Nang gaw karai kata ai tsasam masha ni a lata hta gwi zawn si na rai ndai. Tsaw Htum ai dai Madu ngai nan hkang da ni ai.?

11 Dai Madu gaw ngai hpe bai ga shaga wu ai. 12 Shi gaw, ?Si chye ai masha wa e, Turu hkawhkam a matu ala nga ai hpang jahtum na maka a majaw sharung shayawt nga u. Tsaw Htum ai dai Madu ngai nan tsun nga ai ga shi hpe tsun u: Nang gaw lang mi na aten hta hkum tsup ai a kasi tai lai wa yu nit dai. Nang gaw kade sha hpaji rawng nna tsawm htap nga nit hka! 13 Nang gaw Karai Kasang a sun ngu ai Eden hta nga nga ndai; lung seng amyu shagu ngu ai lung seng hkyeng ni, sein lung seng ni, utahpaya, myek-yoi, chyawng, nagahtoi, nila, mya hte patamya ni hpe ja hta hkrep nna mawn sumli da nga ndai. Nang gaw aja shakya rai ni lu nga ndai. Dai ni hpe nang hpan da hkrum ai shani hta nan, na a matu lajang da nga sai. 14 Ngai gaw dai shara hta e nang hpe sin na matu sharim ai lamu kasa langai san da ya ni ai. Nang gaw nye a chyoi pra ai bum ntsa e nga lu nna, htoi kabrim ai lung seng ni a lapran e hkawm chyai nga ndai. 15 Nang hpan da hkrum ai shani kaw nna n hkru ai amu hpe nang galaw hpang wa ai shani du hkra na a arawn alai hkum tsup nga lit dai. 16 Nang gaw gun rai dut mari ai hpaga amu ni hte law la nga ndai, dai amu gaw nang hpe kashun kashe du daw sai hkaw amu hte yubak lam ni de woi sa nga ai. Dai rai nna, ngai gaw nang hpe nye a chyoi pra ai bum kaw na pru mat wa na matu shaden kau dat ni ai, nang hpe sin ai lamu kasa mung nang hpe dai htoi kabrim ai lung seng ni a ka-ang kaw na yeng seng kau nu ai. 17 Nang tsawm htap nga ndai majaw gumrawng gumtawng nga ndai, na a gumhkawng ai gaw nang hpe mana bu kau shangun nga sai. Ndai amu a majaw, ngai gaw nang hpe ga de du hkra kabai kau ai hte kaga hkawhkam ni hpe sadi jaw ai zawn nang hpe kau da ni ai. 18 Nang gaw gun rai mari dut ai amu hta n tara ai hpaga amu ni hpe galaw nit dai; na a nawku ai shara ni mung hten run mat nga sai. Dai re ai majaw, ngai gaw dai mare hpe wan nat kau nna, dai gaw ga de du hkra hkru mat nga ai. Nang hpe mada yu ai ni yawng nang hpe wan dap shatai kau sai hpe ya mu mada nga ma ai. 19 Nang gaw htum mat sai, htani htana htum mat sai, nga nna masha amyu baw ni hta nang hpe chye ai ni yawng hkrit kajawng nga sai hte na a hpang jahtum na lam karan ya na hpe hkrit nga ma ai.?

20 Dai Madu gaw ngai hpe, Ref 28:20-26: Yoe 3:4-8; Zeh 9: 1-2; Mat 11:21-22; Luk 10: 13-14. 21 ?Si chye ai masha wa e, Sidon mare hpe jahpoi u. 22 Tsaw Htum ai dai Madu ngai nan dai mare na masha ni hpe shanhte hte seng nna tsun ai ga hpe htawn tsun u: Sidon mare e, ngai gaw na hpyen rai nga nngai; ngai nang hpe galaw na amu a majaw amyu masha ni ngai hpe shakawn shagrau na mara ai. Nang kaw nga ai ni hpe ari jaw nna ngai kade wa chyoi pra nga nngai hpe madun dan ai shaloi, ngai nan dai Madu rai nga nngai hpe shanhte chye na mara ai. 23 Ngai gaw nang hpang de ana zinli dat dat nna na a nmaw lam ni hkan sai hka lwi shangun na nngai. Nang gaw man maga shagu de na gasat gala ai hkrum nna na a masha ni mung sat kau hkrum na mara ai. Dai hpang, ngai nan dai Madu rai nga nngai hpe shanhte chye lu na mara ai.?

24 Dai Madu gaw, ?Israela hpe machyi shangun ai ju shingna ni zawn, grup yin e nga ai masha amyu baw ni kadai mung Israela hpe n kaw n law re ai lam galoi mung bai nga na ra ai n rai. Ngai nan Tsaw Htum ai dai Madu rai nga nngai hpe shanhte chye wa na mara ai.?

25 Tsaw Htum ai dai Madu gaw, ?Israela amyu masha ni hpe ngai shabra kau dat ai masha amyu baw ni a lata kaw na bai woi nhtang wa na nngai. Ngai gaw chyoi pra nga nngai hpe masha amyu baw ni yawng chye wa na mara ai. Israela amyu masha ni gaw nye a shangun ma Yaku hpe jaw da sai mungdan ngu ai shanhte a lamu ga hta shanu nga na mara ai. 26 Shanhte gaw dai shara hta shim lum ai hte shanu nga lu na mara ai; Shanhte gaw nta ni galaw nna sabyi sun ni hkai na mara ai. Ngai gaw shanhte hpe n kaw n law di kau ai shanhte a htingbu mungdan ni yawng hpe ari jaw na nngai; shaloi Israela gaw shim nga na ra ai. Ngai nan shanhte a Madu Karai Kasang rai nga ai hpe shanhte chye lu na mara ai,? ngu nna tsun wu ai.