24
1 Dai Madu gaw ngai hpe anhte bawng dung ai jahku ning e shata shi, nhtoi shi ya shani e, ga shaga wu ai.
2 Shi gaw, ?Si chye ai masha wa e, dai ni na nhtoi hpe ka matsing da u, hpa majaw nga yang, Babelon hkawhkam gaw dai shani hta nan Yerusalem hpe wang hpang tawn ai shani rai nga ai. Ref 24:2: 2Hk 25:1; Yer 52:4.
3 Ngai hpe gumlau ai amyu masha ni hpe Tsaw Htum ai dai Madu ngai nan shanhte a matu ning nga ai ngu nna ndai ga shadawn hpe htawn tsun u:
Wan mang ntsa e di dun u
dai hpe hka hte jahpring u.
4 Kaja htum ai shan tau, shan pawm
lahpa shan ni hte lagaw magyi ni bang u,
Laswi rawng ai nra ni hte hpawn jahpring u.
5 Kaja htum ai sagu shan lang u;
di dun ai npu e hpun sumpum bang u.
Hka prut u ga;
nra ni hte ashan pyaw mat u ga.?
6 Ndai gaw Tsaw Htum ai dai Madu tsun ai mungga rai nga ai: ?Masha sat ai ni shanu ai mare gaw dingnye hkrum nga sai! Dai gaw nhkan kap ai di zawn rai nga nna galoi mung n tsai hkraw nga ai. Shan tau langai mi pyi n ngam hkra, langai hte langai hpe shaw shapraw kau u.
7 Mare kata e masha sat hkat ai lam nga nga ai, rai ti mung, asai hpe ga nhpu hte magap da lu ai shara hta ru hkaw kau ai n rai. Dai hpe krin ai lunghkrung ntsa e ru jahkaw da ma ai.
8 Ngai gaw masin pawt ai matai dawp la lu hkra, makoi magap n lu ai dai shara hta asai tawn da ni ai.?
9 Ndai gaw dai Tsaw Htum ai Madu tsun ai mungga rai nga ai: ?Masha sat ai ni shanu ai mare gaw dingnye hkrum nga sai! Ngai nan ju hpun ni hpe sumpum da na nngai.
10 Hpun jat bang u! Wan wut shagrung u! Shan shadu u! Shan jahku hpe shage u! Nra ni hpe nat kau u!
11 Ya chyawm gaw, Magri mang di kaman hpe wan n-ga ntsa e dun nna kahtet hkyeng shangun u. Dai hpang kap nga ai nhkan hkru mat ai hpang, nhkan kap ai yawng n hkru mat ti mung,
12 dai di gaw htung hte maren bai san wa na ra ai.
13 Yerusalem mare e, na a nse nsa ai arawn alai ni gaw nang hpe awu asin di kau nit dai. Nang hpe ngai jasan shapra na shakut ti mung, nang awu asin naw hkrum nga ndai. Nye a n-gun tup sindawng kahtet ai hpe nang n hkam sha dingsa, jasan jaseng hkrum na ndai n rai.
14 Dai Madu ngai nan dai ga hpe tsun ni ai. Dai amu galaw shadik na matu, nye a aten gaw du nga sai. Ngai gaw na a yubak mara ni hpe malap kau ya na n rai, n-gaw n wai ai myit madun dan na n rai, matsan dum la na n rai. Nang galaw dan sai arawn alai hte maren ari jaw hkrum na rai ndai.? Tsaw Htum ai dai Madu nan tsun nu ai.
15 Dai Madu gaw ngai hpe ga shaga wu ai.
16 Shi gaw, ?Si chye ai masha wa e, nang tsaw ra htum ai wa hpe ngai kalang dat woi la na nngai. Shi gaw akajawng sha si mat na ra ai. Nang gaw aput angun ai mung, hkrap shabam ai mung, myi prwi hkrat ai mung galaw lu na n rai.
17 Na a hkrap sharung ai nsen hpe hkum na shangun nga et. Sharung shayawt ai kumla zawn bunghkaw n hkaw ai hte lagaw kaman hte hkum hkawm et. Na a myi man hkum magap et; sharung shayawt ai ni sha ai lusha hkum sha et,? ngu nna tsun wu ai.
18 Ngai gaw jahpawt manap jau jau e mung, amyu masha ni hte ga shaga nngai. Dai shana de jang, nye a madu jan si mat sai hte ngai hpe hkang da ai hte maren, hpang shani e ngai galaw nngai.
19 Dai amyu masha ni gaw ngai hpe, ?Nang hpa majaw ndai zawn galaw nga n ni?,? ngu nna san ma ai.
20 Dai rai nna, ngai gaw shanhte hpe, ?Dai Madu gaw ngai hpe ga shaga ai hte
21 Israela masha ni hpe ndai mungga jaw ya na matu ngai hpe tsun wu ai: Nang gaw Nawku Htingnu a n-gun atsam hta gumrawng gumtawng nga ndai. Nang gaw dai hpe yu sharawng nna dai de sa chyai nga ndai, rai ti mung, dai Madu gaw dai shara hpe awu asin di kau na ra ai. Yerusalem hta jahti da ai na a dinghku ni hta na shayi shadang sha ni gaw hpyen majan hta sat kau ai hkrum na mara ai.
22 Dai hpang, ngai galaw ni ai zawn nanhte galaw na marin dai. Nanhte gaw myi man magap lu na myit dai n rai, sharung shayawt ai ni a lusha hpe mung sha lu na myit dai n rai.
23 Nanhte gaw bunghkaw n hkaw ai hte, lagaw kaman hte hkawm na myit dai n rai; hkrap ngu hkrap ngoi ai hte sharung shayawt na myit dai n rai. Nanhte gaw tinang a yubak mara ni a majaw agyawm mat nna langai hte langai madai sharung na myit dai.
24 Dai hpang, ngai gaw nanhte a matu kumla tai na nngai; ngai galaw sai amu magup hpe nanhte galaw lu na marin dai. Ndai amu byin wa ai shaloi, shi gaw Tsaw Htum ai dai Madu rai nga ai hpe nanhte chye lu na marin dai, ngu nna dai Madu tsun ai.?
25 Dai Madu gaw, ?Yu u, si chye ai masha wa e, ngai gaw shanhte yu sharawng nna sa chyai nga ai dai shanhte a gumrawng gumtawng shara hte kabu gara shara ngu ai Nawku Htingnu hpe shanhte a man kaw na la kau na we ai. Shanhte a shayi shadang sha ni hpe mung la kau na we ai.
26 Dai shani e, ndai amu ngai galaw nngai, jahten shabyak ai kaw nna lawt wa ai marai langai ngai nang hpang de sa nna dai lam nang hpe tsun dan na ra ai.
27 Dai shani hta nan, nang hta htum mat sai ga tsun n-gun bai awai la lu nna shi hte rau ga tsun na ndai. Ndai lam hku nna nang gaw amyu masha ni a matu kumla tai nna ngai gaw dai Madu nan rai nga nngai hpe shanhte chye lu na mara ai,? ngu nna tsun ai.