19
1 Dai Madu gaw Israela hkawhkam kasha lahkawng a matu ndai yawn hkyen mahkawn mangoi mahkawn na matu ngai hpe tsun wu ai:
2 Na a nnu gaw kaning re ai hkanghkyi kanu rai a hka!
Shi gaw shi a hkalung ni hpe grai matse ai hkanghkyi la ni a lapran e bau kaba nga ai.
3 Shi gaw hkalung langai bau maka la nna shan chye tam na hpaji sharin ya nga ai;
dai hkalung gaw masha shan kaning rai sha na sharin la nga ai.
4 Masha amyu baw ni shi a lam na nna
nhkun langai hta shi hpe hkam da ma ai.
Shanhte gaw hpri chyinghkyi hte Egutu mung de dun sa mat wa ma ai.
5 Kanu gaw myit mada shara yawng htum mat ai hpe shi mu ai aten du hkra ala nga ai.
Dai hpang shi gaw kaga shi a hkalung hpe bau maka wu ai,
dai gaw grai matse ai hkanghkyi tai wa nga sai.
6 Shi a hkum hkrang hpring kaba wa ai shaloi,
shi gaw kaga hkanghkyi ni hte rau lanyan hkawm nga ai.
Shi mung shan chye tam na hpaji sharin la ai hte masha shan sha nga ai.
7 Shi gaw hpyen dap ni hpe agrawp jahten kau nna mare ni hpe jahten sharun kau nu ai.
Shi shabam ai aten shagu,
mungdan masha ni hkrit gari nga ma ai.
8 Masha amyu baw ni shi hpe gasat na matu shinggyin nga ma ai;
shara shagu hkan na masha ni du sa ma ai.
Shanhte gaw shanhte a mahkam sumgawn ni hpe jahkrat tawn nna
shanhte a mahkam hta shi hpe rim la nga ma ai.
9 Shanhte gaw shi hpe htung hta tawn da nna
Babelon hkawhkam hpang de shi hpe woi mat wa ma ai.
Shanhte gaw shi hpe rawng da ma ai,
shaloi shi a shabam ai nsen hpe Israela a kawng ntsa hkan e,
galoi mung bai na lu na n rai.
10 Na a kanu gaw hka kau e hkai ai sabyi ru hte bung nga ai
hka shi langai a makau e hkai da nga ai.
Hpa majaw nga yang, hka alaw alam nga ai rai nna,
sabyi ru gaw alap ni hte asi ni hte ka-up da nga ai.
11 De a lakung lakying ni gaw n-gun ja ai hte
hkawhkam sumdoi ni galaw na matu tu hkrawn nga ai.
Dai sabyi ru gaw sumwi ni hpe dep lu hkra, tu galu nga ai;
masha shagu gaw kaning rai alap tsit lali nga ai hte kade daram galu tu nga ai hpe mu ma ai.
12 Rai ti mung, pawt sindawng ai lata gaw dai hpe ru hte hpawn baw kau nna
ga de kabai kau nga ai.
Sinpraw nbung gaw de a asi ni hpe jahkraw kau nu ai.
De a lakung lakying ni agrawp daw mat nna;
dai ni hkun hkraw mat ai hte hkru mat hkrum nga ai.
13 Ya chyawm gaw, dai hpe zaibru jang e hkai da nga sai,
dai shara gaw hkun hkraw ai hte hka n rawng ai ga rai nga ai.
14 Sabyi ru madung hta wan hkru nna;
wan gaw de a lakung lakying ni hte asi hpe hkru kau nga ai.
Lakung lakying ni gaw galoi mung n-gun bai rawng wa na n rai,
galoi mung hkawhkam dawhkrawng ni tai na ra ai n rai.
Ndai gaw yawn hkyen mahkawn rai nga ai; ndai hpe lang mi hte lang mi mahkawn mangoi wa sai.