10
1 Ngai gaw hkrung kanu ni a baw ntsa na din ai lamu madin hte nila lung seng hte gaw da ai hkawhkam tingnyang zawn san ai shara lama mi hpe mada yu nngai. Ref 10:1: Eze 1:26; Shr 4:2.
2 Karai Kasang gaw lachyit nba lawai da ai wa hpe, ?Leng dingsen ni a lapran na hkrung kanu ni a npu de sa shang nna grung ai wan n-ga ni hpe na a lata hte magawn la nhtawm dai hpe mare ntsa de gat dat u,? ngu nna tsun wu ai.
Ngai gaw shi shang sa wa ai hpe azi yu nga nngai. Ref 10:2: Shr 8:5.
3 Dai wa shang sa mat wa yang, hkrung kanu ni gaw Nawku Htingnu a dingda maga e tsap nga ma ai; kata wang e mung sumwi ni hte hpring nga ai.
4 Dai Madu a htoi tu ai hpung shingkang gaw hkrung kanu ni kaw na rawt lung wa nhtawm, Nawku Htingnu a chyinghka lam de sit sa wa nga ai. Dai shaloi, sumwi gaw Nawku Htingnu hpe ka-up da nga ai; wang gaw htoi tu ai hpung shingkang hte dan hkung nga ai.
5 Dai hkrung kanu ni a singkaw kahprap wu ngoi ai nsen gaw shinggan wang de du hkra pyi na lu nga ai. De a wu kadu ai nsen gaw Chyahtum Chyalai N-gun Rawng ai Karai Kasang a nsen zawn rai nga ai.
6 Dai Madu gaw lachyit nba lawai nga ai wa hpe leng dingsen ni a lapran hkrung kanu ni a npu na wan sa la na matu hkang dat wu ai shaloi, dai wa gaw shang nna dingsen langai a makau e tsap nga ai.
7 Hkrung kanu langai wa mi gaw shanhte a lapran, wan nga ai shara de shi a lata ladawn nhtawm wan n-ga nkau mi hta la nna, dai ni hpe lachyit nba lawai ai wa a lata hta bang ya wu ai. Shi mung dai wan n-ga ni hpe hkap la nna pru mat wa wu ai.
8 Hkrung kanu ni a singkaw shagu a npu e masha a lata zawn san ai hkrang rawng nga ai hpe ngai mu nngai.
9-10 Ngai gaw hkrung kanu shagu a makau e yawng maren bung ai leng dingsen mali nga nna dai leng dingsen langai gaw hkrung kanu shagu a makau e nga nga ai hpe mu nngai. Dai leng dingsen ni gaw manu dan ai nlung ni zawn htoi tu ai hte, dingsen kata shagu hta kaga dingsen langai chyai nga ai. Ref 10: 9-13: Eze 1:15-21.
11 Dai hkrung kanu ni shamu hkawm wa yang, shanhte gaw myi man n kayin la ra ai sha, tinang sa mayu ai man maga de sa lu nga ma ai. Shanhte yawng gaw n kayin la ra ai sha, shanhte sa mayu ai shara de arau hkawm sa lu nga ma ai.
12 Shanhte a hkum ni, lata ni, shingma ni, singkaw ni hte dingsen ni yawng gaw myi ni hte hpring nga ai. Ref 10:12: Shr 4:8.
13 Ndai leng dingsen ni gaw, ?Chyai nga ai leng dingsen ni,? nga nna tsun ai nsen hpe ngai na nngai.
14 Dai hkrung kanu shagu hta myi man mali li tu nga ai. Shawng na gaw usu myi man, lahkawng ngu na gaw masha myi man, masum ngu na gaw hkanghkyi myi man hte mali ngu na gaw galang myi man ni rai nga ai. Ref 10:14: Eze 1:10; Shr 4:7.
15 (Shanhte gaw Hkebara hka nu e ngai mu yu sai hkrung kanu ni hte maren rai ma ai.) Dai hkrung kanu ni nbung hta rawt lung wa nna
16 shamu hkawm wa ai shaloi, leng dingsen ni mung shanhte hte rau hkawm nang nga ma ai.Shanhte a singkaw ni hpe pyen na matu hpyan dat ai aten shagu, leng dingsen ni mung shanhte hte rau hkan nang nga ma ai.
17 Dai hkrung kanu ni hkring ai shaloi, leng dingsen ni mung hkring nga ma ai; shanhte pyen lung wa ai shaloi leng dingsen ni mung shanhte hte rau hkan lung nga ma ai, hpa majaw nga yang, hkrung kanu ni gaw shanhte hpe up hkang da nga ai.
18 Dai hpang, dai Madu a htoi tu ai hpung shingkang gaw Nawku Htingnu chyinghka lam kaw nna pru mat wa nhtawm hkrung kanu ni a ntsa e sit sa wa nga ai.
19 Ngai shanhte hpe azi yu nga yang, shanhte gaw shanhte a singkaw ni hpyan nhtawm ginding aga kaw nna pyen lung mat wa ai hte shanhte hte rau leng dingsen ni hkan nang nga ai. Shanhte gaw Nawku Htingnu a sinpraw maga na chyinghka e hkring nga ai hte dai htoi kabrim ai hpung shingkang gaw shanhte a ntsa e dan hkung nga ai.
20 Dai ni gaw Hkebara hka kau na Israela a Karai Kasang a npu e ngai mu yu sai hkrung kanu ni hte maren sha rai nga ai hpe matsing lu nngai.
21 Shanhte langai hte langai gaw myi man mali li, singkaw mali li hte singkaw shagu a npu hta masha a lata zawn re ai mung tu nga ai.
22 Shanhte a myi man ni gaw Hkebara hka kau e ngai mu yu sai myi man ni zawn raw sha bung nga ai. Dai dusat shagu gaw shanhte a man ang ai de hkawm sa nga ma ai.