1 ?Dai ni ngai nanhte hpe jaw ya sai tara ni yawng hpe sadi sahka let hkan sa madat mara nga mu; shaloi nanhte hkrung nga nna law htam wa nhtawm dai Madu nanhte a nji nwa ni hpe ga sadi jaw da sai mungdan hpe madu la lu na myit dai. 2 Nanhte hpe chyam yu na nga, yak hkak jam jau lam ni hpe dat dat nna shi a hkang da ai ga ni hpe hkan sa madat mara let hkan galaw mayu ai myit rawng n rawng chye lu hkra nga, lai mat wa sai mali shi ning tup dai Madu nanhte a Karai Kasang kaning rai woi hkawm ai nam mali lam galu hpe myit dum nga mu. 3 Shi gaw nanhte hpe kawsi jahkrum nhtawm nanhte hte nanhte a nji nwa ni galoi mung garai n lu sha yu ai Manna nanhte hpe jaw nu ai. Masha gaw muk hte sha asak hkrung nga lu ai n rai; lam magup hta dai Madu tsun ai mungga hte sha asak hkrung lu nga ai hpe sharin la lu myit ga nga, ndai lam shi galaw nu ai. Ref 8:3: Mat 4:4; Luk 4:4. 4 Lai sai mali shi ning laman nanhte hpun ai hpun palawng ni je htum mat ai n rai; nanhte a lagaw ni mung bum lapau mat, manit dai n rai. 5 Kawa gaw shi a kasha ni hpe tara hte sharin shaga ai zawn, dai Madu nanhte a Karai Kasang mung nanhte hpe ari jaw nna shading sharai la manit dai hpe adum nga mu. 6 Dai rai nna dai Madu nanhte hpe hkang da manit dai hte maren galaw mu; shi hkang da ai tara ni hte maren asak hkrung nna shi a ga hpe hkan sa madat mara nga mu. 7 Dai Madu nanhte a Karai Kasang gaw ga sau hte hpring nna ningru ningja ai mungdan, hkaraw nhkap bum shagawng ntsa hkan nna lwi hkrat wa ai hka nu, hka shi, hka hpawk ni hte kadit hte kawng ni de kahpawk pru nga ai ga a lawu tsang na hka ni hte hpring ai ga; 8 hkaulan mam, muk-yaw mam, sabyi si, maihpang si, hkainu si, tsanlun si hte lagat ntsin ni hpe shapraw ya ai ga de nanhte hpe woi wa nga ai. 9 Nanhte gaw dai mung e ra kadawn ai lam n nga hkra, galoi mung hkru hkru kat kat sha lu na rai myit dai. Dai mung na lunghkrung ni hta hpri hkrai chyat rai nna bum kata na magri hkyeng htu shaw la lu na rai myit dai. 10 Nanhte sha mayu ai lusha yawng lu la na rai nna, dai Madu nanhte a Karai Kasang nanhte hpe jaw ya nu ai dai ga sau hte hpring nna ningru ningja ai lamu ga a majaw shi hpe chyeju dum na rai myit dai.

11 ?Dai ni ngai nanhte hpe jaw ya ai shi a hkang da ai tara hpa hpe mung n hkan kau nna, dai Madu nanhte a Karai Kasang hpe malap kau ai kaw n du myit ga, sadi nga mu. 12 Nanhte sha mayu ai mahkra hkam la lu nna nta kaja ni hpe shachyaw rawng let nga nga myit dai shaloi mung, 13 nanhte a sagu dumsu, aja gumhpraw hte kaga sut rai ni yawng law htam wa jang, 14 nanhte mayam sa tai nga ai Egutu mung kaw na nanhte hpe hkye hkrang la ai wa, nanhte a Madu Karai Kasang hpe malap kau nna gumrawng ai myit n rawng nga myit ga, sadi nga mu. 15 Shi gaw nanhte hpe atuk rawng ai lapu hte n-gaw gawk ni sawng ai dai hkrit hpa htat ai nam mali hku woi wa nhtawm, hkun hkraw nna lu na hka n nga ai shara hta nanhte a matu nhpai lungkring hta na hka shapraw jaw wu ai. 16 Nanhte a nji nwa ni pyi galoi mung garai n sha yu ai Manna lusha hpe nam mali e jaw ya wu ai. Nanhte hpe chyam yu na nga, yak hkak jam jau jahkrum nhtawm jahtum e nanhte hpe mai kaja ai sut rai ni hte shaman ya wu ai. 17 Dai rai nna nanhte a n-gun hte marai a jaw e, ndai sut gan lu la ga ai, nga nna nanhte galoi mung myit nawn la lu na myit dai n rai. 18 Dai Madu nanhte a Karai Kasang gaw sut gan lu su chye ai atsam nanhte hpe jaw ya nu ai hpe adum nga mu. Nanhte a nji nwa ni hte tawn da ai ga shaka hpe dai ni du hkra shi naw sadi dung nga ai majaw ndai amu hpe shi galaw wu ai. 19 Dai Madu nanhte a Karai Kasang hpe galoi mung hkum malap kau myit; kaga karai ni hpe nawku daw jau na dai de galoi mung hkum kayin mat myit. Nanhte rai nna hkan nang myit yang chyawm gaw teng teng shamyit kau ai hkrum na rai myit dai ngu nna, dai ni ngai nanhte hpe sadi jaw nga nngai. 20 Nanhte mahtang dai Madu a ga hpe n madat myit dai rai yang, nanhte rawt lung wa myit dai shaloi amyu baw ni hpe shi shamyit kau ai zawn nanhte mung shamyit kau ai hkrum na rai myit dai.