31
(Bhk 27:12-23)
1 Mawshe gaw matut nna Israela amyu masha ni hpe,
2 ?Ngai gaw ya asak latsa e hkun ning du ni ai; nanhte a ningbaw tai nga na matu ngai loi mi mung n dang lu ni ai. Dai sha n-ga, ngai mung Yawdan hka rap lu na n rai, nga nna dai Madu gaw ngai hpe tsun ni ai.
3 Dai Madu nanhte a Karai Kasang gaw shi nan nanhte a shawng e sa wa nhtawm dai mung e nga nga ai masha amyu baw ni hpe shamyit kau na rai wu ai. Shing rai shanhte a mung hpe nanhte madu la na rai myit dai. Dai Madu tsun da nu ai hte maren, Yawshu gaw nanhte a ningbaw tai na ra ai.
4 Dai Madu gaw Amori hkawhkam ni rai nga ai Sihon yan Oga hpe dang kau nhtawm shan a mungdan hpe jahten kau ya wu ai zawn dai masha ni a mung hpe shamyit kau na rai wu ai. Ref 31:4: Bhk 21:21-35.
5 Dai Madu gaw shanhte hpe dang kau na awng padang nanhte hpe jaw ya na rai nna, ngai nanhte hpe tsun da ni ai hte maren, shanhte hpe ten tup gasat dang kau na marin dai.
6 Myit jahkut daw dan ai hte kam hpa nga mu. Shanhte hpe hkum hkrit myit. Dai Madu nanhte a Karai Kasang gaw nanhte hte rau anga nga ai; shi nanhte hpe kabai kau na n rai; nanhte hpe kau da na n rai,? ngu nna tsun wu ai.
7 ?Shaloi Mawshe gaw Yawshu hpe shaga la nhtawm Israela amyu masha ni yawng a man e shi hpe, ?Myit jahkut daw dan nna kam hpa nga u; dai Madu shanhte a kaji kawa ni hpe ga sadi jaw da ai mungdan hpe madu la na matu, dai amyu masha ni hpe woi awn na gaw nang rai nga ndai.
8 Dai Madu shi nan nang hte rau rai nga nna nang hpe woi awn na rai wu ai. Shi nang hpe kabai kau na n rai; nang hpe kau da na n rai; dai rai nna myit nden shaja u, hkum hkrit et,? ngu nna tsun wu ai. Ref 31:8: Ysh 1:5; Heb 13:5.
9 Shaloi Mawshe gaw Karai Kasang a Tara hpe ka nhtawm dai Madu a Ga Shaka Sumpu woi hpareng ai Lewi hkinjawng ni hpe mung, Israela ningbaw ni hpe mung jaw ya wu ai.
10 Shi gaw shanhte hpe, ?Sanit ning ladu hkrum nna hka shaprai kau ya ai ladaw shagu hta galaw ai Sum Poi hta dai tara laika hpe ja ja hti na rai myit dai. Ref 31:10: Trj 15:1, 16:13-15.
11 Israela amyu masha ni san da ai nawku shara hta dai Madu nanhte a Karai Kasang hpe sa nawku myit dai shaloi, dai tara laika shanhte hpe hti dan na rai myit dai.
12 Lasha numsha, ma kaji ni hte nanhte a mare ni hkan nga ai maigan masha ni yawng hpe shaga jahpawng tawn myit. Shaloi dai tara ga hpe masha shagu na lu hkra dai Madu nanhte a Karai Kasang hpe shagrau sha-a let shi a sharin achyin ai ga matsun ni hpe sadi sahka hte madat mara hkan sa na matu sharin la lu na rai myit dai.
13 Dai hku rai yang, dai Madu nanhte a Karai Kasang a tara hpe galoi mung garai n na yu ai nanhte a amyu matu mara ni na lu na mara ai. Shing rai nanhte madu la hkyen nga ai Yawdan hka wora hkran na mungdan hta nanhte nga nga dingsa shi a ga madat mara hkan sa na matu shanhte sharin la lu na mara ai,? ngu nna tsun wu ai.
14 Dai hpang dai Madu gaw Mawshe hpe, ?Nang gaw aten na na wa naw hkrung nga lu na ndai n rai. Yawshu hpe shaga la nhtawm Sum de woi sa wa rit, ngai shi hpe ga matsun ni tsun we ga,? ngu nna tsun wu ai. Mawshe yan Yawshu mung dai Sum de sa wa ma ai;
15 dai Madu mung dai yang e sumwi shadaw hta shan kaw dan pru nhtawm dai sumwi shadaw mung Sum chyinghka lam e jung nga ai.
16 Dai Madu gaw Mawshe hpe, ?Nang gaw kade n na yang si wa na sha rai nit dai. Nang si mat ai hpang amyu masha ni nye a ntsa e sadi sahka myit n rawng mat nna shanhte hte tawn da ai nye a ga shaka hpe jahten kau na mara ai. Shaloi shanhte ngai hpe kau da nhtawm shanhte shang sha na mungdan hta nawku ai maigan hpara ni hpe nawku wa na mara ai.
17 Dai zawn byin wa ai shaloi, ngai gaw masin pawt wa nna shanhte hpe kabai kau na mawe ai. Shaloi shanhte hten byak ai hkrum na mara ai. Hkrit hpa ru yak tsin-yam tsindam law law gaw shanhte a ntsa e du pru wa nna shanhte a Karai Kasang ngai nan shanhte hte rau n nga ai a majaw dai tsin-yam tsindam ni pru wa nga ai hpe shanhte myit dum wa na mara ai.
18 Shanhte gaw n hkru n shawp ai amu galaw nna hpara shaje ni hpe nawku ma ai majaw shanhte hpe karum la na matu ningdang kau na we ai.
19 ?Ya chyawm gaw ndai mahkawn mangoi ga hpe ka tawn nna Israela amyu masha ni hpe sharin ya mu, shaloi dai gaw shanhte a matu sakse tai na mara ai.
20 Ngai gaw shanhte a kaji kawa ni hpe ga sadi jaw da sai hte maren, dai ngamu ngamai ai sut hte hpring nna ningru ningja ai mungdan de shanhte hpe woi wa ai shaloi, dai mung e shanhte sha mayu, lu mayu ai lusha hkum dingnum sha lu nna, ngwi pyaw sim sa ai hte nga lu na mara ai. Rai ti mung, shanhte mahtang lam dam mat nhtawm hpara shaje ni hpe nawku daw jau mat na mara ai; ngai hpe ningdang kau ma ai majaw nye a ga shaka hpe jahten kau na mara ai;
21 shaloi hkrit hpa ru yak tsin-yam tsindam law law shanhte hkrum kadup na mara ai. Rai ti mung ndai mahkawn mangoi ga hpe naw mahkawn na ra ai rai nna dai gaw shanhte a matu sakse tai nga na ra ai. Shanhte hpe jaw na ngu nna ga sadi jaw da sai mungdan de garai n woi shang ai kaw nna pyi, shanhte kaning rai myit mang nga ma ai hpe ngai chye nga nngai,? ngu nna tsun wu ai.
22 Mawshe mung dai shani e nan mahkawn mangoi ga hpe ka nhtawm Israela amyu masha ni hpe sharin ya wu ai.
23 Dai hpang Nun a kasha Yawshu hpe, ?Kam hpa ai hte myit jahkut daw dan u. Nang gaw ngai ga sadi jaw da ai mungdan de dai Israela amyu masha ni hpe woi shawn na rai ndai; ngai mung nang hte rau anga nga na nngai,? ngu nna dai Madu shi hpe hkang da wu ai. Ref 31:23: Bhk 27:23; Ysh 1:6.
24 Mawshe gaw Karai Kasang a Tara hpa mung n jahkrat kau ai sha, azin ayang ka tawn da wu ai.
25 Shi ka ngut jang dai Ga Shaka Sumpu hpe woi hpareng ai Lewi hkinjawng ni hpe, ?Ndai Karai Kasang a Tara laika la nna,
26 dai Madu nanhte a Karai Kasang a Ga Shaka Sumpu makau e tawn da mu; dai gaw shi a amyu masha ni a matu sakse tai nga na ra ai.
27 Shanhte kade wa mi myit ja nna gumlau ai myit rawng nga ma ai hpe ngai chye nga nngai. Ngai naw hkrung nga ai hte yang pyi, dai Madu hpe shanhte gumlau ma ai rai nna, ngai si mat wa ai hpang dai hta grau nna pyi shanhte gumlau na mara ai.
28 Nanhte a amyu bawsang ni yawng hte seng ai ningbaw ni hte du salang ni yawng hpe nye a man e jahpawng tawn mu; shaloi ndai ga ni shanhte hpe tsun dan lu n-ga, shanhte a matu nye a sakse tai na, sumsing lamu hte ginding aga hpe ngai shatai na we ai.
29 Ngai si mat ai hpang, amyu masha ni n hkru n shawp wa nhtawm ngai shanhte hpe sharin ya sai lam ni hpe shanhte ningdang kau na ma ai. Dai Madu hkum pat da ai amu galaw let shanhte shi hpe masin pawt shangun nga ma ai majaw htawm hpang prat e ru yak tsin-yam tsindam hte hkrum kadup na rai ma ai,? ngu nna tsun dan wu ai.
30 Dai hpang Mawshe gaw Israela amyu masha ni yawng madat nga ma yang, ndai mahkawn mangoi ga mahkra hti shakrai dan wu ai.