3
(Bhk 21:31-35)
1 ?Dai hpang, anhte mung dingdung maga Bashan ginwang de shanang lung wa ga ai rai nna, Hkawhkam Oga mung shi a masha ni yawng hte anhte hpe hkap gasat na matu, Edri mare makau de pru sa wa ma ai.
2 Rai ti mung, dai Madu gaw ngai hpe, ?Shi hpe hkum hkrit et; shi hpe mung shi a masha ni hte shi a lamu ga yawng mung, na a lata hta ap ya nga nngai. Heshbon mare e hkaw dung ai Amori Hkawhkam Sihon hpe nang dang kau ai zawn shi hpe mung dang kau na rai ndai,? ngu nna tsun wu ai.
3 Dai rai nna dai Madu mung Hkawhkam Oga hte shi a masha ni hpe anhte a lata hta ap ya mi ai rai nna shanhte yawng hpe anhte sat kau saga ai.
4 Dai aten hta shanhte a mare ni yawng hpe anhte hpya kau ga ai rai nna anhte n dang la lu ai mare langai mi mung n ngam nga sai. Bashan hkawhkam up hkang ai Argoba ginwang na mare ni yawng kru shi tup hpe anhte madu kau lu saga ai.
5 Dai mare ni yawng gaw tsaw ai bunghku ni, chyinghka ni, htinggrang ni hte shangang da nna bunghku n kum ai kahtawng law law mung nga nga ai.
6 Heshbon Hkawhkam Sihon madu tawn ai mare ni hpe anhte dang la kau ga ai zawn, ndai mare ni yawng hpe mung anhte hpya jahten kau nhtawm lasha, numsha ni hte ma kaji ni yawng hpe sat kau ga ai.
7 Anhte gaw yam nga hpung hte mare ni hta hpya da ai lanep ni hpe sha la wa ga ai.
8 ?Dai shaloi, Arnon hka kaw nna Hermon Bum du hkra dam ai Yawdan hka a sinpraw hkran na Amori hkawhkam lahkawng yan a lamu ga hpe anhte madu la lu ga ai.
9 (Hermon Bum hpe Sidon masha ni gaw Sirion, Amori masha ni gaw Senira ngu nna shamying ma ai.)
10 Anhte gaw Bashan Hkawhkam Oga a lamu ga yawng ngu na kawng ntsa na mare ni, Gilead hte Bashan mung hte seng ai ginwang ni, sinpraw maga Saleka hte Edri mare hkan du hkra, anhte madu la lu saga ai.?
11 (Hkawhkam Oga gaw Rehpim amyu a jahtum ngam nga ai hkawhkam rai nga ai. Shi a da-u b 3:11: Da-u: Ndai da-u ngu ai ga hpe Chyum Laika nkau mi hta ku ngu nna tsun da ai. Dai hpe nlung shing n rai hpri hte galaw da ai ngu ai. gaw nlung hte galaw da wu ai rai nna shadawn shadang hte maren nga yang, galu de pe 14 daram, nda de pe 6 daram rai nga ai. Dai hpe Amon masha ni a mare Raba e dai ni du hkra naw mu lu nga ai.)
(Bhk 32:1-42)
12 Anhte dai lamu ga hpe madu la lu ai shaloi, Arnon hka makau na Aroera mare a dingdung maga na lamu ga hte Gilead bum ga chyen mi hta lawm ai mare ni gaw Rubin hte Gad amyu bawsang ni hpe ngai ap ya mase ai.
13 Naw ngam ai Gilead mung daw mi hte Oga up hkang lai wa sai Bashan mung ting hta na Argoba ginwang mahkra gaw Manashe amyu bawsang kau chyen mi hpe ngai ap ya kau se ai.?
(Bashan gaw Rehpim masha ni a lamu ga rai nga ai ngu chye lu nga ai.
14 Manashe amyu bawsang na Yaira gaw Bashan mung ngu ai Argoba ginwang ting hpe Geshuri hte Mahka masha ni a lamu ga jarit du hkra madu la wu ai. Shi up hkang ai shaloi dai kahtawng ni hpe shi a mying shamying ya wu ai majaw dai ni du hkra dai shara ni hpe Yaira kahtawng ni ngu ma ai hpe chye lu nga ai.)
15 ?Gilead mung hpe gaw Manashe a amyu bawsang hta na Mahkira a lakung lama ni hpe ngai jaw ya se ai.
16 Gilead mung kaw nna Arnon hka du hkra chyawm gaw Rubin hte Gad amyu bawsang ni hpe ngai ap ya se ai. Dai hka ka-ang hkren gaw dingda maga de na shanhte a lamu ga jarit rai nna dingdung maga de na jarit gaw Amon masha ni a lamu ga jarit rai nga ai Yabok hka htep rai nga ai.
17 Sinna maga de na shanhte a lamu ga jarit gaw Yawdan hka htep maden nga ai hte dingdung maga Galile Nawng kaw nna dingda de Jum Nawng, bai sinpraw hkran Pisga bum lagaw du hkra chyawm gaw Rubin hte Gad amyu bawsang ni hpe ngai jaw ya se ai.
18 ?Dai aten hta ngai shanhte hpe hkan sa na ga matsun ni hpe jaw ya ni ai: ?Dai Madu anhte a Karai Kasang gaw nanhte hpe dai Yawdan Hka sinpraw maga na lamu ga hpe madu la na matu jaw ya manit dai. Ya chyawm gaw hpyen rai lang nna gasat gala ai masha ni hpe kaga Israela amyu bawsang ni a shawng e Yawdan hka rap di shangun nhtawm lamu ga madu la lu hkra shanhte hpe karum na rai myit dai.
19 Ngai nanhte hpe jaw ya sai mare ni hta nanhte a madu jan ni, ma kaji ni hte yam nga hpung ni hpe sha nga shangun lu na rai myit dai. Nanhte hta yam nga law nga myit dai gaw ngai chye nga nngai.
20 Dai Madu gaw nanhte a matu ndai yang e shajin shatsup ya manit dai zawn nanhte a kahpu kanau Israela masha ni hpe ngai jaw da ai Yawdan hka a sinna hkran na lamu ga hpe shanhte madu la lu nna, dai yang e ngwi pyaw sim sa ai hte dai Madu shanhte hpe nga shangun ai aten du hkra shanhte hpe karum la lu na rai myit dai. Dai hpang mahtang, ngai nanhte a matu masat da ya sai ndai mung de nhtang wa mai na rai myit dai. Ref 3:18-20: Ysh 1:12-15.
21 ?Dai hpang Yawshu hpe ngai matsun ni ai: ?Dai Madu na a Karai Kasang gaw ndai Sihon hte Oga hkawhkam lahkawng yan hta galaw dan sai lam yawng mayawng hpe nang mu nit dai; nang shang gasat na lamu ga na masha shagu hte hpe mung dai hte maren shi galaw na ra ai.
22 Shanhte hpe hkum hkrit et, dai Madu na a Karai Kasang gaw na a matu gasat ya na ra ai.?
23 ?Dai aten hta ngai gaw, ?Tsaw Htum ai Madu e,
24 nang galaw nga ai galu kaba ai hte mauhpa amu ni, ngai hpe chyu sha nang madun hpang nit dai hpe gaw ngai chye nngai. Nang galaw shapraw dan sai daru magam n-gun hte hpring ai amu ni hpe galaw lu ai karai gaw sumsing lamu e mung, ginding aga ntsa e mung kadai n nga nga sai!
25 Madu e, Yawdan hka wora hkran de nga ai dai namhpun rawng nna kaja tsawm ai bum ga hte Lebanon Bum ni hpe mu lu n-ga, ngai hpe Yawdan hka rap shangun e law,? ngu nna akroi anoi hpyi nem wu ai.
26 ?Rai ti mung, nanhte amyu masha ni a majaw dai Madu ngai hpe pawt nga ai rai nna nye a ga madat ya na wu ai n rai. Shing rai madat ya na malai shi chyawm gaw, ?Dai hte ram nu ga! Dai hte seng nna bai hkum tsun sa!
27 Pisga bum pungding de lung wa nhtawm sinpraw, sinna, dingdung dingda maga de yu la u. Nang gaw Yawdan hka galoi mung rap lu na n rai nit dai majaw nang mu mamu hpe atsawm sha mada la u.
28 Yawshu mahtang nang mu mada ai mung hpe madu la na matu amyu masha ni hpe woi rap na rai wu ai majaw shi hpe ga matsun ni jaw nna myit n-gun jaw u,? ngu nna tsun wu ai.
29 ?Shing rai anhte gaw Betpeora mare hte tawtap na Kadit e but nga ga ai.