1-3 ?Myihtoi langai ngai shing n rai yup mang htai chye ai wa langai ngai gaw shawng de nanhte garai n nawku yu ai karai ni hpe nawku daw jau wa hkra lam woi na nga, mauhpa lamik kumla amu galaw shapraw dan na ga sadi jaw wa na ra ai. Dai rai nna shi tsun ai ga sadi teng wa tim pyi, dai wa a ga hkum madat ya myit. Nanhte gaw dai Madu hpe nanhte a myit masin mahkra hte tsaw ra nga myit dai hpe chye lu hkra nga, dai Madu nanhte a Karai Kasang gaw nanhte hpe chyam yu na matu shanhte hpe lang nga ai. 4 Dai Madu a hpang hkan nang let shi hpe shagrau sha-a mu; shi a hkang da ai ga hpe madat mara hkan sa nhtawm dai ni hpe shadik shatup nga mu; shi hpe nawku ai hte shi hta sadi dung nga mu. 5 Rai ti mung, nanhte mayam tai nga ai Egutu mung kaw na hkrang shaw la ai dai Madu hpe gumlau na hku tsun ai myihtoi shing n rai yup mang hkai chye ai wa kadai mung sat kau ai hkrum na rai wu ai. Dai zawn re ai wa gaw n hkru n shawp nga ai rai nna dai Madu nanhte hpe hkang da nu ai hte maren hkrung nga ai asak hkrung lam kaw na nanhte hpe lam woi shadam shakut nga ai. Ndai n hkru n shawp ai amu kaw na seng kau na matu shanhte si lu na rai ma ai.

6 ?Na a kahpu kanau shayi shadang sha hte tsaw ra ai madu jan, nang hte ni htum ai manang wa du hkra pyi, nanhte hte nanhte a nji nwa ni galoi mung n nawku yu ai karai ni ngu ai kaga karai shaje ni hpe nawku wa lu hkra nga, nanhte hpe lagyim n-gun jaw mai nga ai. 7 Na a makau shing n rai nang hte tsan tsan e nga ai nawku ai masha langai ngai mung, masha amyu ni a karai ni hpe nawku wa lu hkra nga, nang hpe n-gun jaw mai nga ai. 8 Rai ti mung shi hpe nang gunglau shangun lu na n rai; shi tsun ai ga hpe pyi hkum madat ya nga et. Shi hpe yu matsan dum ai hte lahpawt ai myit hkum madun et; shi hpe hkum maga, hkum makawp la et. 9 Shi hpe sat kau u! Nang shawng shi hpe nlung hte kabai u; dai hpang kaga gale ni mung kabai mu ga. 10 Shi gaw nanhte mayam tai nga ai Egutu mung kaw na hkrang shaw la ai dai Madu nanhte a Karai Kasang kaw na lam woi shadam na hku shakut nga ai majaw shi hpe nlung hte kabai sat kau mu. 11 Dai hpang Israela amyu masha ni yawng dai zawn byin ai lam hpe na wa nhtawm hkrit gari ai hte dai zawn re ai n hkru ai amu, htawm hpang de kadai mung bai galaw wam na ma ai n rai.

12 ?Dai Madu nanhte a Karai Kasang gaw nanhte hpe jaw ai mare ni hta shanu nga myit dai shaloi, 13 lachyum n pru ai masha amyu nkau mi mahtang shawng de nanhte kalang mi mung n nawku yu ai karai ni hpe nawku ga nga, shanhte a mare masha ni hpe lam woi shadam kau ai shiga na lu na rai myit dai. 14 Nanhte gaw dai zawn re ai ashin na dam yang, dai hpe atsawm sha sawk sagawn mu; dai lam teng ai rai yang dai n hkru ai amu byin nga sai, 15 dai hpang dai mare hta nga ai mare masha ni yawng hpe mung, shanhte a yam nga hpung ni hpe mung sat kau na rai myit dai. Dai mare hpe tsep kawp jahten kau na rai myit dai. 16 Dai mare e nga ai masha ni a sut rai yawng mayawng hpe magawn la nhtawm mare lam ka-ang hta sumpum da na rai myit dai. Dai hpang dai Madu nanhte a Karai Kasang hpe hkungga nawng ya ai zawn mare hte hpawn sut rai nlang hte hpe nat kau na rai myit dai. Dai mare gaw prat dingsa hten run mat nna galoi mung bai de lu na n rai. 17-18 Shing rai yang jahten sharun kau na matu daw dan da sai mare na arai hpa hpe mung nanhte a matu hkum mazing la nga myit. Shaloi dai Madu gaw masin kawp nna matsan dum ai myit nanhte hpe madun dan na ra ai. Dai ni ngai nanhte hpe jaw made ai shi a hkang da ai ga ni yawng hpe madat mara hkan sa nna shi hpyi ai hte maren galaw ai rai yang, shi gaw nanhte a nji nwa ni hpe ga sadi tawn da nu ai hte maren nanhte hpe matsan dum nna law htam ai amyu masha shatai na rai wu ai.