10
(Pru 34:1-10)
1 Shaloi dai Madu gaw ngai hpe, ?Shawng na lungpa yan zawn lungpa lahkawng naw ga la nhtawm dai hpe bang na hpun sumpu langai mi hpe mung galaw u. Shing rai Bum ntsa ngai hpang de lung wa rit;
2 nang agrawp kau sai lungpa yan hta ngai ka ai zawn ndai lungpa yan hta mung ka na we ai; dai hpang dai yan hpe sumpu hta nang bang da na rai ndai,? ngu nna tsun wu ai.
3 ?Dai rai nna ngai mung shaji hpun hte sumpu galaw nhtawm shawng na zawn lungpa lahkawng hpe ga lang nna bum de lung wa nngai.
4 Dai hpang dai Madu gaw nanhte bum e wa hpawng nga myit dai shani e, wan hta nna shi tsun nhtawm nanhte hpe jaw ya manit dai dai Tara Kanu Shi hpe shawng na lang ka ai ga hkum ni hte maren ndai lungpa yan hta ka shakap wu ai.
5 Shing rai dai Madu mung ngai hpe jaw dat ni ai; ngai mung kayin let bum kaw nna yu wa nngai. Dai hpang dai Madu hkang da sai hte maren ngai galaw da ai sumpu hta bang da we ai. Dai lungpa yan dai hta ya du hkra rawng nga ai.?
6 (Israela amyu masha ni mung Yakan masha ni madu da ai hka htung kaw nna Mosera mare de htawt sa wa ma ai. Arun gaw dai yang e si mat nna shi hpe lup makoi da ma ai. Shi a kasha Eleaza gaw kawa a hkringhtawng dagraw la nna hkinjawng amu galaw wu ai. Ref 10:6: Bhk 20:28; 33:38.
7 Dai kaw nna Gudgoda de sa wa ma ai; bai dai kaw nna matut sa mat wa yang hka law law lwi ai Yobahta de du ma ai.
8 Dai Madu gaw dai bum hta Lewi amyu bawsang hta na lasha ni hpe Ga Shaka Sumpu hpai ai hta woi hpareng na matu mung, hkinjawng hku nna shi hpe daw jau amu gun hpai na matu mung, shi a mying ningsang gang nna shaman ya na matu mung lata san da wu ai. Ndai amu ni yawng gaw shanhte a magam lit ni hkrai rai nga malu ai. Ref 10:8: Bhk 3:5-8.
9 Dai re ai majaw Lewi amyu bawsang ni gaw kaga amyu bawsang ni zawn lamu ga sali lu la nga ma ai n rai; dai Madu nanhte a Karai Kasang ga sadi tawn da nu ai hte maren, dai Madu a hkinjawng ni tai nga na ahkang sha shanhte lu nga ma ai.)
10 ?Ngai mung shawng na lang hte maren bum e nhtoi mali shi ya mali shi na tup nga nga nngai. Dai shaloi na lang hta mung dai Madu gaw nye a ga madat ya wu ai majaw nanhte hpe n shamyit kau na shi myit hkrum nga ai. Ref 10:10: Pru 34:28.
11 Dai rai nna nanhte a nji nwa ni hpe jaw na ngu nna ga sadi jaw da sai mungdan hpe nanhte madu la lu myit ga nga, nanhte hpe woi awn pru sa wa na matu shi ngai hpe tsun ni ai.
12 ?Ya, Israela amyu masha ni e, dai Madu nanhte a Karai Kasang nanhte hpe hpa hpyi ai ga madat la mu; dai Madu hpe nawku nna shi hkang da mada yawng hte hpe hkan galaw mu; shi hpe tsaw ra nga mu, nanhte a myit masin mahkra hte shi hpe daw jau nga nna,
13 shi a tara ni yawng hpe madat mara nga mu. Ngai gaw nanhte hkam la na akyu chyeju a matu dai ni, nanhte hpe jaw ya nga nngai.
14 Dai Madu gaw tsaw htum ai sumsing lamu ni hpe mung, ginding aga hte de a ntsa na nga manga hte hpe mung madu da nga ai.
15 Rai ti mung nanhte a nji nwa ni a matu dai Madu a tsaw ra myit gaw grai n-gun ja nga ai majaw kaga masha amyu ni hta nanhte hpe lata la manit dai; nanhte gaw shi lata la sai amyu masha ni naw rai nga myit dai.
16 Dai re ai majaw ya kaw nna dai Madu a ga hpe madat mara nga mu; du hkum shaja da nga myit.
17 Dai Madu nanhte a Karai Kasang gaw Karai ni yawng hta daru magam n-gun tsaw htum ai wa rai nga ai. Shi gaw galu kaba nna chyalai n-gun hte hpring nga ai majaw hkrit kang mai nga ai. Shi gaw masha a myi man hpe tau ai n rai, mayun kumhpa hkap la ai n rai. Ref 10:17: 1Tm 6:15; Kas 10:34; Rom 2:11; Gal 2:6; Ehp 6:9.
18 Shi gaw jahkrai nmai, gaida gaina ni hpe rap ra ai hku daw dan ya nna, anhte a amyu masha ni kaw hkan nga ai maigan masha ni hpe tsaw ra ai majaw lusha hte hpun palawng ni hpe jaw ya wu ai.
19 Dai rai nna nanhte nan mung Egutu mung e maigan masha ni zawn sa tai yu manit dai majaw ndai maigan masha ni hpe tsaw ra mu.
20 Dai Madu nanhte a Karai Kasang hpe hkrit hkungga nna shi hpe chyu sha nawku lu na rai myit dai. Shi hta sadi dung let shi a mying ningsang hta chyu sha ga sadi ni hpe shagrin da lu na rai myit dai.
21 Shi gaw nanhte a Karai Kasang rai nga ai rai nna nanhte a matu shi galaw dan nu ai dai galu kaba ai mauhpa amu ni hpe nanhte nan myi hte chyaw mu manit dai majaw shi hpe shakawn mu.
22 Nanhte a nji nwa ni Egutu mung de yu sa wa ma yang, marai sanit shi sha rai ma ai. Rai ti mung ya chyawm gaw dai Madu nanhte a Karai Kasang she nanhte hpe sumsing lamu na shagan ni zawn shalaw jahtam ya manit dai. Ref 10:22: Nin 15:5; 22:17.