2
1 Nebuhkadneza hkaw dung ai lahkawng ning hta, shi yup mang mu wu ai. Dai gaw shi hpe grai wa myit sharu shatsang ya nga ai majaw shi n lu yup nga ai,
2 dai rai nna shi gaw shi a yup mang sa htai ya na matu, gumhpan hpan ai ni, mandan sara ni, lakle sara ni hte hpyi lamum sara ni hpe shaga dat wu ai. Shanhte gaw hkawhkam wa a man e sa tsap shajang nga ma yang,
3 shi gaw shanhte hpe, ?Ngai mu ai yup mang a majaw myit ru myit tsang nga nngai. De a lachyum hpa rai nga ai hpe ngai chye mayu nngai,? ngu nna tsun dan wu ai.
4 Shanhte gaw hkawhkam wa hpe, ?Madu hkawhkam gaw htani htana hkrung nga u ga law! Anhte hpe na a yup mang tsun dan mi, anhte nang hpe htai dan na ga ai,? ngu nna Aramik ga hte tsun ma ai.
5 Hkawhkam wa gaw shanhte hpe, ?Nanhte gaw yup mang dai hpe mung, de a lachyum hpa rai nga ai mung ngai hpe tsun dan lu na rai myit dai, ngu ngai myit da ni ai. Nanhte n lu tsun dan ai rai yang, nanhte hpe kahtum kadaw di kau nna, nanhte a dum nta ni hpe run sumpum kau ya na made ai.
6 Rai ti mung, nanhte mahtang yup mang hte de a lachyum lahkawng yan hpe lu tsun dan myit dai rai yang, nanhte hpe kumhpaw kumhpa ni hte arawng aya kaba jaw shagrau na made ai. Ya chyawm me gaw, yup mang hte de a lachyum hpa rai nga ai lam ngai hpe tsun dan mi,? ngu nna tsun wu ai.
7 Shanhte gaw hkawhkam wa hpe, ?Madu hkawhkam dai yup mang hpa rai nga ai hpe tsun dan lu ai rai yang, anhte dai hpe htai na ga ai,? ngu nna bai htan ma ai.
8-9 Dai aten, hkawhkam wa gaw, ?Nanhte dai yup mang ngai hpe n tsun dan lu myit dai rai yang, nanhte yawng hpe ari maren sha jaw na hku ngai myit tawn da se ai hpe nanhte chye myit dai majaw ngai myit nawn made ai zawn nanhte aten sharen shakut nga myit hka! Tsun dan na ngu ai aten laman, lam lama mi hku galai shai wa na hpe nanhte myit mada nga myit dai majaw ngai hpe masu na matu nanhte myit hkrum da nga myit dai. Yup mang hpa rai nga ai gaw ngai hpe tsun dan mi, shaloi de a lachyum hpa rai nga ai hpe nanhte ngai hpe lu tsun dan lu na myit dai gaw ngai chye lu na ring ngai,? ngu nna tsun wu ai.
10 Hpaji jaw ai ni chyawm gaw, ?Madu hkawhkam wa nang chye mayu ai lam hpe tsun dan lu na masha ndai ga ntsa e, kadai mung n nga nga ai. Kaning san ai galu kaba htum ai hte daru magam n-gun ja htum ai hkawhkam wa pyi, gumhpan hpan ai ni, mandan sara ni hte hpyi lamum sara ni hpe ndai zawn nga nna n hpyi yu ma ai.
11 Madu hkawhkam san ai lam gaw grai yak nga ai majaw shinggyim masha ni hte rau n rai nga ai karai ni hta kaga, kadai mung na a matu n dang galaw ya lu nga ai,? ngu nna tsun htang ma ai.
12 Dai lam a majaw, hkawhkam wa grai n-yun bu ai hte Babelon mung na hkawhkam wa a hpaji jaw masha ni yawng hpe sat shamyit kau na matu hkang dat wu ai.
13 Dai rai nna shanhte yawng sha n-ga, Daniela hte shi a manang ni lawm hkra sat kau na aming pru nga ai.
14 Dai hpang Daniela gaw sat sharu kau na matu aming jaw hkrum ai hkawhkam wa a sin langa ni hpe up hkang ai Ariok hpang de sa wa wu ai. Shi a ga ni hpe sadi sahka hte lata la let,
15 shi gaw Ariok hpe hkawhkam wa ndai zawn re ai laja lana re ai aming hpa majaw shapraw dat ai hpe san yu wu ai. Dai rai nna Ariok gaw Daniela hpe byin lai wa sai lam tsun dan wu ai.
16 Daniela mung lang lata sa nhtawm aten naw jaw ya na matu hkawhkam wa kaw ahkang hpyi wu ai, shaloi shi gaw yup mang a lachyum hpa rai nga ai lam hkawhkam wa hpe tsun dan lu na wu ai.
17 Dai hpang Daniela gaw nta de wa nna shi a manang ni rai nga ai Hanania, Mishaela hte Azaria ni hpe byin mabyin tsun dan wu ai.
18 Shi gaw shanhte hpe Babelon mung na kaga hpaji jaw ai masha ni hte rau sat kau ai n hkrum mat hkra nga, matsan dum la na hte makoi magap da ai amu sanglang dan na matu sumsing lamu a Karai Kasang kaw akyu hpyi na matu tsun wu ai.
19 Dai hpang dai shana jang, makoi magap ai yup mang gaw Daniela a shingran hta shapraw shadan dan nga ai; shi gaw sumsing lamu a Karai Kasang hpe shakawn kungdawn wu ai:
20 ?Karai Kasang gaw hpaji rawng ai hte daru magam n-gun rawng nga a hka!
Shi hpe htani htana shakawn kungdawn mu.
21 Shi gaw aten ahkying hte ladaw ni hpe hkang nga ai;
shi gaw hkawhkam ni hpe hkaw dung shangun nna bai shayu kau nga ai;
shi gaw hpaji byeng-ya hte chye na hkawn hkrang ai nyan jaw ya nga ai.
22 Shi gaw sung ai hte makoi magap da ai arai ni hpe shapraw dan nga ai;
shi gaw nsin kata hta makoi magap da ai arai ni hpe chye nga ai,
shi hkum nan hpe chyawm gaw nhtoi hte gawan shinggrup da nga ai.
23 Nye a kaji kawa ni a Karai Kasang e, ngai nang hpe shakawn kungdawn ai hte shagrau sha-a nngai.
Nang gaw ngai hpe hpaji byeng-ya hte n-gun jaw ya nga nit dai;
nang gaw nye a akyu hpyi ga hpe htan ya nga nit dai
hte hkawhkam wa hpe kaning ngu tsun na mung anhte hpe madun dan nga nit dai.?
24 Dai rai nna Daniela gaw hkawhkam wa a hpaji jaw masha ni hpe sat kau na matu hkawhkam wa hkang dat hkrum ai Ariok hpang de sa mat wa wu ai. Shi gaw dai wa hpe, ?Shanhte hpe hkum sat kau et. Shi a yup mang a lachyum hpa rai nga ai lam ngai tsun dan lu n-ga, hkawhkam wa kaw woi shang rit,? ngu nna tsun wu ai.
25 Ariok mung Daniela hpe Nebuhkadneza a man de kalang lata woi shang wa nhtawm hkawhkam wa hpe, ?Madu hkawhkam mu ai yup mang a lachyum hpe htai dan lu ai Yuda bawng dung masha langai mi hpe ngai mu se ai,? ngu nna tsun wu ai.
26 Hkawhkam wa gaw Daniela (Belteshaza mying ai) hpe, ?Ngai mu ai yup mang hte de a lachyum hpe nang tsun dan lu na n ni?,? ngu nna tsun wu ai.
27 Daniela chyawm gaw, ?Madu hkawhkam wa e, dai lam nang hpe tsun dan lu na hpyi lamum sara, mandan sara, gumhpan hpan ai hte lakle sara kadai mung nga ai n rai.
28 Rai ti mung makoi magap da ai ni hpe shapraw shadan dan lu ai Karai Kasang gaw sumsing lamu e nga nga ai. Shi gaw du na ra ai aten hta hpa byin wa na lam, madu hkawhkam hpe madun dan nu ai. Ya chyawm gaw nang yup nga yang mu ai yup mang shingran ngai nang hpe tsun dan na we ai.
29 ?Madu hkawhkam yup nga yang, du na ra ai aten hte seng ai lam nang yup mang mu nit dai; makoi magap da ai ni hpe madun dan ai Karai Kasang gaw hpa byin wa na lam nang hpe madun dan nu ai.
30 Ya chyawm gaw, ndai makoi magap ai lam ngai hpe madun dan nga sai, ngai gaw kaga masha hta grau hpaji chye ai majaw n rai, rai ti mung madu hkawhkam na a yup mang a lachyum ni hpe chye la lu nna nang kaw rawng ai myit mang lam ni hpe chye na lu na rai ndai.
31 ?Madu hkawhkam e, na a shingran hta, na a man e hkrang sumla kaba tsap nga ai hpe nang mu ndai, dai gaw htoi kabrim tu ala nna yu hkrit hpa nsam pru nga ai.
32 Dai hkrang sumla a baw hpe jet htum ai ja hte galaw da nga ai; de a sinda hte lata lahpum ni hpe gumhpraw hte galaw da nga ai; de a nshang hte magyi pawt daw gaw magri mang,
33 de a shinglang gaw hpri rai nna, de a lagaw daw chyen mi gaw hpri, daw chyen mi gaw kagam ga rai nga ai.
34 Nang dai hpe mada yu nga yang, kadai mung n sa hkra ai nlung kaba gaw ninggam kaw nna daw hkrat wa nhtawm dai hkrang sumla a hpri hte kagam ga lagaw hpe adep hkra nna agrawp mani kau nga ai.
35 Hpri, kagam ga, magri mang, gumhpraw hte aja ni agrawp mani mat nna ginhtawng ta, chyarang pa ntsa e taw ai ga nhpu zawn tai mat nga ai. Dai gaw nbung e ahpawt kau ai n rai; ahkang ngam ai n rai. Rai ti mung dai nlung gaw bum tai wa nna lamu ga ting hpe ka-up kau nga ai.
36 ?Da ndai gaw yup mang rai nga ai. Ya chyawm gaw de a lachyum hpa rai nga ai gaw madu hkawhkam wa hpe ngai tsun dan na we ai.
37 Madu hkawhkam wa e, nang gaw hkawhkam ni yawng hta galu kaba htum ai wa rai nga ndai. Sumsing lamu a Karai Kasang gaw nang hpe hkawseng shatai nna daru magam n-gun, hpung dagu hte arawng sadang jaw nit dai.
38 Shi gaw nang hpe lamu ga ntsa na masha nga manga yawng hpe mung, dusat yam nga yawng mayawng hte ntsa malen u ni yawng a ntsa e mung up hkang shangun nga sai. Nang gaw aja baw rai nga ndai.
39 Na a hpang e nang daram n galu kaba ai hkawseng langai paw pru wa na ra ai. Dai hpang masum ngu na magri mang hkawseng mungdan pru wa nna lamu ga ting hpe up na ra ai.
40 Dai hpang mali ngu na hkawseng mungdan gaw hpri zawn ja nna arai shagu hpe agrawp shadaw kau na ra ai. Hpri gaw arai shagu hpe agrawp mani kau ai zawn, dai gaw shawng na hkawseng mungdan ni yawng hpe agrawp mani kau na ra ai.
41 Nang gaw chyen mi kagam ga hte chyen mi hpri rai nga ai lagaw hte lagaw latsang ni hpe mung mu nga ndai. Dai gaw hkawseng mungdan ga karan mat na lam rai nga ai. Dai hta hpri a n-gun lama mi lawm nga ai, hpa majaw nga yang dai hta ga hte kayau ai hpri rawng nga ai.
42 Lagaw latsang ni gaw chyen mi hpri, chyen mi kagam ga rai nga ai, de a lachyum gaw hkawseng mungdan chyen mi n-gun ja wa nna de a chyen mi n-gun kya wa na lam rai nga ai.
43 Nang gaw hpri hte kayau ai kagam ga hpe mung mu nga ndai. De a lachyum gaw hkawseng mungdan hpe up hkang ai ni gaw shanhte a dinghku ni shada da kayau kaya dinghku jawm de ai hku gahkyin gumdin shakut wa na mara ai, rai ti mung shanhte gaw hpri gaw kagam ga hte n matut lu ai zawn shanhte hta byin wa na mara ai.
44 Ndai mung du ni up hkang ai aten hta, sumsing lamu a Karai Kasang gaw galoi mung htum ngu n nga ai mungdan langai de da na ra ai. Dai gaw galoi mung ka-up la hkrum na ra ai n rai, rai ti mung dai gaw ndai hkawseng mungdan ni yawng hpe tsep kawp shamyit kau ai hpang e sha htani htana agrin nga na ra ai.
45 Nang gaw kadai mung n jum hkra ai nlung langai mi kaning rai ninggam kaw nna daw hkrat wa nhtawm hpri, magri mang, kagam ga, gumhpraw hte aja hte galaw ai hkrang sumla hpe adawt hkra ai hpe mu nga ndai. Galu kaba ai Karai Kasang gaw du na ra ai aten hta hpa byin wa na lam madu hkawhkam hpe tsun nga ai. ngai gaw nang mu nit dai yup mang hpe tup hkrak tsun dan ni ai. De a teng man ai lachyum ngai nang hpe jaw ni ai.?
46 Dai hpang Hkawhkam Nebuhkadneza gaw ga de gum dagup nhtawm Daniela a man e shagu hkungga hte wan nat hkungga ni nawng ya na matu hkang da wu ai.
47 Hkawhkam wa gaw, ?Na a Karai Kasang gaw karai ni yawng hta galu kaba htum ai wa rai nna, hkawhkam ni a madu, makoi magap da ai amu ni hpe shadan dan ai wa rai nga ai. Ndai makoi magap ai amu hpe nang tsun shaleng dan lu nit dai majaw ndai lam ngai chye ni ai,? ngu nna tsun wu ai.
48 Dai hpang shi gaw Daniela hpe shagrau shatsaw let hkik ai kumhpa law law sak jaw wu ai; shi hpe mung Babelon mungdaw hpe woi hpareng na matu mung, hkawhkam wa hpe hpaji jaw ai ni yawng a ningbaw galaw na matu mung san da wu ai.
49 Daniela hpyi shawn ai hte maren, hkawhkam wa gaw Babelon mungdaw a amu ni hpe woi hpareng na matu Shadrak, Meshak, Abednego hte hpe san da ya wu ai. Daniela chyawm gaw hkawhkam wang hta anga nga ai.