11
1 Shi gaw ngai hpe karum la na hte makawp maga la na lit lu ai wa rai nga ai.
2 Ya nang hpe ngai tsun dan na lam gaw teng man nga ai,? ngu nna tsun wu ai.
Lamu kasa gaw, ?Persi mung hta e hkawhkam masum naw up na mara ai; mali ngu na gaw kaga ni yawng hta grau nna sut su na ra ai. Shi a daru magam n-gun hte sut gan tsaw lung wa ai aten hta, shi gaw Grik mungdan hpe dakat na ra ai.
3 ?Dai hpang share shagan ai hkawhkam langai gaw pru wa na ra ai. Shi gaw kaba la ai hkawseng mungdan hpe up hkang nna shi ra ai hku galaw na ra ai.
4 Rai ti mung, shi a daru magam n-gun wa tsaw ai aten hta, shi a hkawseng mungdan gaw agrawp mat nna mali brang garan mat na ra ai. Shi kaw nna n hkrat yu wa ai hkawhkam ni shi a shara hta up hkang wa na mara ai, rai ti mung shi lu ai daru magam n-gun daram shanhte lu ma ai n rai.
5 ?Dai Egutu hkawhkam wa gaw n-gun ja wa na ra ai. Rai tim, shi a hpyendu kaba langai mi gaw n-gun grau ja nna, grau kaba ai mungdan langai up hkang na ra ai.
6 Shaning tsawmra mi na ai hpang, Egutu hkawhkam wa gaw Suri hkawhkam wa hte jinghku galaw nhtawm shi hpe shi a shayi sha jaw sha wu ai. Rai ti mung jinghku hku ai masa gaw na hkra grin na n rai; shi mung, shi a madu wa mung, shi a ma hte shi kaw hkan nang nga ai shangun ma ni yawng mayawng sat kau ai hkrum na mara ai.
7 Dai hpang kade n na yang, dai num a makyin jinghku ni hta na langai mi gaw hkawhkam tai wa na ra ai. Shi gaw Suri hkawhkam wa a hpyen luksuk hpe htim gasat nna shanhte a dap de shang nhtawm dang kau na ra ai.
8 Shi gaw shanhte jaw da ai karai sumla ni hte dai karai ni hpe ap nawng ya ai aja gumhpraw arai ni hpe Egutu mung de htaw mat wa na mara ai. Ngwi pyaw sim sa ai lam nga ai shaning ram ram na ai hpang,
9 Suri hkawhkam wa gaw Egutu mung hpe shang gasat na ra ai, rai ti mung shi mahtang htingnut mat wa ai hkrum na ra ai.
10 ?Suri hkawhkam a shadang sha ni majan a matu hkyen lajang na nga luksuk kaba jahpawng tawn da na mara ai. Shanhte hta na langai mi gaw mawru hka zawn agre ye mat wa nna gumlau hpyen dap hpe htim gasat na mara ai.
11 Egutu hkawhkam wa gaw shi a masin kahtet ai a majaw Suri hkawhkam wa hpe majan gasat ai hte shi a luksuk kaba hpe gasat dang kau na ra ai.
12 Shi gaw shi a awng padang hte shi sat kau lu ai hpyenla law law a majaw gumrawng gumtawng wa na ra ai, rai ti mung shi gaw matut nna awng dang lu na ra ai n rai.
13 ?Suri hkawhkam wa gaw bai nhtang wa nna shawng na hta grau law ai hpyen luksuk kaba hpe jahpawng la na ra ai. Majan gasat aten bai du jang, shi gaw hpyen laknak hpai ai luksuk kaba hte rau nhtang sa wa na ra ai.
14 Dai hpang masha law law hte gaw Egutu hkawhkam wa hpe gumlau na mara ai. Daniela e, na a amyu masha ni hta na kabring kabrawng du daw sai hkaw amu galaw ai masha nkau mi gaw shanhte mu ai shingran a majaw gumlau na mara ai; rai ti mung shanhte sum mat na mara ai.
15 Dai re ai majaw, Suri hkawhkam gaw bunghku kum ai mare langai mi hpe kaduk htu nna dai mare hpe gasat dang la na ra ai. Egutu hpyenla ni matut gasat na mara ai n rai; shanhte hta na kaja htum ai ni du hkra pyi n-gun atsam law ram hkra rawng na ma ai n rai.
16 Dai gasat shang wa ai Suri masha wa gaw shi myit ra ai hte maren, hkap daw ai lam n hkrum ai sha htim bang wa na ra ai. Shi gaw Ga Sadi Mungdan hta tsap lu nna shi a daru magam n-gun hta dai hpe tsep kawp up lu na ra ai.
17 ?Dai Suri hkawhkam wa gaw shi a hpyen luksuk ting hpe lang nna gasat na lawan myit daw dan maw mawn na ra ai. Shaloi shi a gumlau hpyen mungdan hpe jahten kau na nga, shi hte jinghku galaw let shi a shayi sha hpe ya sha na ra ai; rai ti mung, shi a maw mawn ai lam awng dang na ra ai n rai.
18 Dai hpang shi gaw panglai hka masawn hku nga ai masha amyu ni hpe gasat nna ka-up la na ra ai. Rai ti mung maigan na ningbaw langai mi shi hpe dang kau nhtawm, myit tsaw myit dap ai hpe jahtum kau ya na ra ai. Shi gaw Suri hkawhkam wa a myit tsaw myit dap ai hpe shi a ntsa de teng teng nhtang kau dat ya na ra ai.
19 Dai hkawhkam wa gaw shi a mung na hpyen dap de nhtang mat wa na ra ai; rai ti mung shi chyawm gaw hkrat sum mat na ra ai, dai gaw shi a matu jahtum aten rai na ra ai.
20 ?Shi a mungdan sut gan ring chying rawt jat wa na matu amyu masha ni kaw ahkun hkanse ni hte dip gamyet da na, du langai mi hpe shangun dat ai kaga hkawhkam langai shi a hpang e paw pru wa na ra ai. Dai hkawhkam wa gaw aten kadun mi hta shawa man e mung n rai, majan pa e mung n re ai sha, sat kau hkrum na ra ai.?
21 Dai lamu kasa gaw matut nna ning ngu sanglang dan wu ai: ?Hkawhkam tai na ahkang n lu ai dai n hkru ai masha langai mi gaw hpang e galai ai Suri hkawhkam tai na ra ai; rai ti mung shi gaw n dum n mi re ai aten hta du sa wa nna, hkalem hkalau ai ga hte daru magam n-gun hpe magra jum da na ra ai.
22 Shi hte nhtan shai ai ni kadai mung Karai Kasang a Hkinjawng Kaba wa du hkra pyi magawn kau ai yeng seng kau hkrum na ra ai.
23 Shi gaw kaga masha amyu ni hte ga shaka tawn let masu hkalem na ra ai. Shi gaw amyu kaji ni hpe sha up hkang nga tim pyi, n-gun grau grau nna ja wa na ra ai.
24 Sut ngai ai mungdaw langai hpe sadi jaw ai lam n nga ai sha, shi shang gasat la nhtawm shi a kaji kawa ni kadai mung n galaw yu ai lam galaw na ra ai. Dai hpang shi gaw shi a hpang hkan nang ai ni hpe majan e rim la lu ai sut rai ni hte sut gan ni hpe karan ya na ra ai. Shi gaw hpyen dap ni hpe htim gasat na maw mawn na ra ai, rai ti mung shi a aten kade n na yang htum mat na ra ai.
25 ?Shi gaw Egutu hkawhkam wa hpe htim gasat na matu luksuk kaba hte rawt shachyen nna nden shaja na ra ai; Egutu hkawhkam wa mung nachying kaba nna daru magam n-gun rawng ai hpyen hpung hte nhtang htim na matu hkyen da na ra ai. Rai ti mung Egutu hkawhkam wa mahtang hkalem kau ai hkrum nna awng dang na ra ai n rai.
26 Shi hte ni htum ai hpaji jaw ni gaw shi hpe jahten kau na mara ai. Shi a hpyenla law law hte mung sat kau ai hkrum nna shi a hpyen luksuk ni gasat shamyit kau hkrum na mara ai.
27 Dai hpang hkawhkam yan gaw sha ku langai hta sha dung sha na mara ai; rai ti mung shan a myit jasat gaw n hkru nga ma ai rai nna, shan mung shada da masu ga tsun hkat na mara ai. Ndat da ai aten garai n du ai majaw, shan ra ai hpa rai nga ai hpe shan lu la na mara ai n rai.
28 Suri hkawhkam gaw Karai Kasang a amyu masha ni a nawku makam masham hpe shamyit kau na matu daw dan ai hte maren, shi lu rim la sai lanep arai mahkra hte nta de nhtang mat wa na ra ai. Shi ra ai hku galaw nna shi a mung de nhtang mat wa na ra ai.
29 ?Dai hpang Egutu mung hpe shi bai shang gasat na ra ai; rai ti mung ndai aten shawng na hte shai ai hku byin wa na ra ai.
30 Dai Roma masha ni sanghpaw li ni hte du shang wa nhtawm shi hpe ninghkap na mara ai. Shaloi shi hkrit kajawng mat na ra ai.
?Dai hpang shi gaw n-yun bu ai hte kayin mat wa nna Karai Kasang a amyu masha ni a nawku makam masham hpe jahten kau ya na mara ai. Shi chyawm gaw dai nawku makam masham hpe kau da sai ni a hpaji jaw ga hta hkan nang na ra ai.
31 Shi a hpyenla nkau mi mahtang Nawku Htingnu hpe awu asin di na mara ai. Shanhte gaw shani shagu na shagu hkungga hpe pat shingdang kau ya nna, dai Hkrit Si na zawn re ai wa hpe sharawt da na mara ai. Ref 11:31: Dan 9:27; 12:11; Mat 24:15; Mrk 13:14.
32 Shanhte a nawku makam masham hpe kabai kau da masai ni a karum la lam hpe hkawhkam wa hkalem la lu na ra ai, rai ti mung Karai Kasang a hpang hkan ai ni shanhte hpe nhtang gasat na mara ai.
33 Amyu masha ni hta hpaji rawng ai ningbaw ni gaw kaga masha law law hpe hpaji byeng-ya karan ya na mara ai. Rai ti mung hkring mi rai jang, shanhte hta na nkau mi majan pa hta nat sat kau hkrum na mara ai; nkau mi mahtang kashun kashe hkrum nna bawng masha tai mat na mara ai.
34 Sat hkat ai lam a byin nga yang, Karai Kasang a amyu masha ni karum la lam kachyi mi hkam la lu na mara ai; dai rai tim pyi, masha law law hte gaw tinang hkrai myit sawn yu nna shanhte hte matut mat wa na mara ai.
35 Dai hpaji rawng ai ningbaw ni hta na nkau mi sat kau hkrum na mara ai; rai ti mung dai lam byin ai a majaw amyu masha ni jasan jaseng ai hkrum na mara ai. Dai zawn re ai amu gaw Karai Kasang masat da ya ai hpang jahtum na aten du hkra a byin nga na ra ai.
36 ?Suri hkawhkam gaw shi myit ra ai hte maren galaw na ra ai. Shi gaw kaga karai kadai hta mung grau kaba nga ai: Tsaw Htum ai Karai Kasang hta pyi grau kaba nga ai nga nna shi shakawng dan na ra ai. Karai Kasang shi hpe ari jaw ai aten du hkra, shi gaw ndai amu galaw na ra ai. Karai Kasang gaw shi shatawng shada nu ai hte maren tup hkrak galaw na ra ai. Ref 11:36: 2Tm 2:3-4.
37 Dai hkawhkam wa gaw shi a kaji kawa ni daw jau ai karai hpe mung, numsha ni yu tsaw ra ai karai hpe mung, hpa zawn n nawn ya na ra ai. Shanhte hta na kadai hta mung shi grau galu kaba nga ai nga nna myit nawn la nga ai majaw dai karai shagu hpe teng teng hpa zawn n nawn na ra ai.
38 Shingdi na malai, shi gaw hpyen dap ni hpe makawp maga ya ai karai hpe shagrau sha-a na ra ai. Shi gaw shi a kaji kawa ni galoi mung n nawku yu ai karai hpe aja, gumhpraw, lung seng hte kaga kumhpa law law nawng ya na ra ai.
39 Shi gaw maigan karai nawku ai amyu masha ni hpe lang nna, shi a hpyen dap ni hpe makawp maga da na ra ai. Shi hpe up hkang du langai zawn hkap la ai ni hpe arawng aya kaba jaw ya nna tsaw ai rung ni hkan dung shangun na ra ai; lamu ga hpe kumhpa zawn shanhte hpe jaw ya na ra ai.
40 ?Ya Suri hkawhkam a hpang jahtum aten ganoi du wa jang, Egutu hkawhkam wa shi hpe htim gasat na ra ai; shaloi Suri hkawhkam wa mung shi a n-gun atsam mahkra hte hpawn hpyen leng ni, gumra ni, sanghpaw li law law hte bai nhtang htim na ra ai. Shi gaw mungdan law law hpe mawru hka zawn shang gasat hkawm wa na ra ai.
41 Shi gaw Ga Sadi Mungdan hpe pyi shang gasat nna masha sen mi sat kau na ra ai, rai ti mung Edom, Moba hte naw ngam nga ai Amon mung ni chyawm gaw shi a lata kaw na lawt lu na mara ai.
42 Shi gaw dai mungdan ni hpe shang gasat ai shaloi, Egutu mung pyi ngam nga na ra ai n rai.
43 Shi gaw Egutu mung na makoi da ai ja gumhpraw hte kaga manu dan ai sut gan rai ni hpe magawn mat wa ya na ra ai. Libya hte Ehtiopi mung hpe mung shi dang la na ra ai.
44 Dai hpang sinpraw hte dingdung maga de na shiga gaw shi hpe kajawng kahpra shangun na ra ai. Shi mung n-yun bu ai hte gasat nna masha law law hpe sat kau na ra ai.
45 Shi gaw panglai hte Nawku Htingnu shadun da ai bum yan a lapran hta hkawhkam sum kaba ni hpe pyi sharawt tawn da na ra ai. Rai ti mung dai yang e shi hpe karum la na kadai mung n nga ai sha shi si mat na ra ai.?