KORINHTU NI KAW SHAGUN DAT AI LAIKA LAHKAWNG
(2 CORINTHIANS)
Ga Nhpaw
Kasa Pawlu gaw Korinhtu hpung hte matut mahkai ai shaloi yak hkak ai manghkang hte hkrum katut nga ai ten hta Korinhtu Ni Kaw Shagun Dat Ai Laika Lahkawng hpe ka nu ai. Hpung masha nkau mi, kasa Pawlu hpe aja awa mara shagun adawt nga ma ai lam dan leng nga ai; rai ti mung shi chyawm gaw shanhte bai htinglu htinglai hku hkau lu na lam hpe grai myit mada ra sharawng nga ai hte maren, dai lam byin tai wa ai shaloi shi a kabu gara ai lam kaba lu la ai lam tsun shapraw nga ai.
Ndai laika a shawng na daw hta, shi gaw hpung hta lawm nga ai hpung masha nkau mi shi hpe ninghkap ai hte roi n ra nga nna tsun ai ni hpe shi hpa majaw ga ja hte sheng mareng ngu nna tsun tai ai lam sanglang dan ai hpang, shing rai tai ai a majaw shanhte myit malai lu wa ma ai hte, shi hte bai hku hkau wa ai majaw shi grai kabu gara ai lam ka dat wu ai.
Dai hpang shi gaw Yuda mung na ra kadawn nga ai Hkristan hpu nau ni a matu ndaw nhta alu jaw ya na matu Korinhtu hpung hpe lajin dat wu ai. Hpang jahtum na daw ni hta, shi hpe, ?Kasa masu re, shanhte she kasa majing rai ga ai,? nga nna Korinhtu hpung hta hkan sharin ya nga ai sara masu nkau mi tsun shatan ai hpe tsun sanglang ai lam ka dat wu ai.
1
1 Karai Kasang a myit ra ai hku hte maren, Hkristu Yesu a Kasa wa ngai Pawlu hte anhte a hpu nau Timohti gaw,
Korinhtu mare na Karai Kasang a hpung hte Ahkaia mung ting na Karai Kasang a masha ni nlang hte hpe shakram dat ga ai.Ref 1:1: 1Ko 1:1; Kol 1:1-2; 1Tm 1:1.
2 Anhte a Wa Karai Kasang hte Madu Yesu Hkristu gaw chyeju hte ngwi pyaw ai lam nanhte hpe jaw ya myit ga law.
3 Matsan dum chye ai kawa hte karum ai lam amyu myu a Karai Kasang, anhte a Madu Yesu Hkristu a Kawa Karai Kasang hpe anhte chyeju dum shakawn ga law.
4 Anhte ru yak jam jau amyu myu hkrum ai shaloi Karai Kasang anhte hpe karum la mani ai. Dai rai nna, anhte gaw Karai Kasang kaw na anhte hkam la lu sai shalan shabran ai chyeju hte nan ru yak jam jau amyu myu hkrum nga ai kaga masha ni hpe bai karum la lu ga ai.
5 Anhte gaw Hkristu hkam sha ai law la ai nni nkri ni hpe shang lawm garan hkam sha ga ai hte maren, Hkristu hta Karai Kasang jaw ai karum ai chyeju kaba hpe mung anhte shang lawm garan hkam la nga ga ai.
6 Dai rai nna anhte hta tsin-yam tsindam hkrum yang, dai gaw nanhte a matu shalan shabran ai chyeju hte hkye hkrang la ai lam hkam la na matu rai nga ai. Anhte hta shalan shabran ai chyeju hkam la lu ga yang gaw, nanhte mung anhte hte maren, dai chyeju hpe hkam la lu nna, anhte hkam sharang ai nni nkri hpe nanhte myit galu ai hte hkam sharang lu na n-gun lu la myit dai.
7 Nanhte gaw anhte hkrum hkra nga ai nni nkri hta, nanhte mung hkrum lawm nga myit dai hte maren, anhte hkam la ai shalan shabran ai chyeju hpe mung, hkam la nga myit dai majaw, nanhte hta anhte a myit mada ai lam galoi mung n shamu n shamawt ai sha grin nga ai hpe anhte chye ga ai.
8 Hpu nau ni e, Asi mung e anhte hkrum sagaw ai tsin-yam tsindam a lam nanhte hpe bai shadum mayu ga ai. Anhte a ntsa e dip gamyet ai nni nkri ngu ai lit ni gaw kaba la ai hte li la ai majaw, anhte gaw asak hkrung na matu pyi n myit mada mat hkra rai saga ai.Ref 1:8: Kas 19:23; 1Ko 15:32; 16:9.
9 Anhte gaw si ari daw dan hkrum ai ni rai ga ai ngu nna pyi tinang hkum hpe nawn da ga ai. Rai ti mung ning rai byin ai lam gaw, anhte gaw tinang a hkum hpe n kam hpa ai sha si mat ai ni hpe hkrung sharawt ai Karai Kasang hta shamyet shanat kam hpa nga na matu rai nga ai.
10 Shi gaw shing san ai hkrithpa si lam hta na anhte hpe mawai la mani ai rai nna, bai mung naw mawai la na mi ai. Nanhte mung nanhte a akyu hpyi ai hku nna anhte hpe karum nga myit dai majaw, naw hkye la na ra ai ngu nna anhte shi hpe naw myit mada ala nga ga ai.
11 Dai majaw Karai Kasang gaw nanhte a shing rai akyu hpyi ai ga ni hpe htan ya nna anhte hpe shaman chyeju jaw na ra ai. Masha law law mung anhte hkam la ai shaman chyeju a majaw chyeju shakawn shagrau na mara ai.
12 Anhte myit kata hta asan sha gumrawng na lam langai mi nga ai; dai gaw, ndai mungkan hta anhte a asak hkrung lam, grau nna nanhte hte kanawn mazum matut mahkai ai lam ni hta masha a machye machyang hta n shamyet shanat ai sha Karai Kasang a chyeju atsam hte anhte gaw Karai Kasang jaw ai teng man san seng ai myit masin e up hkang ai hku nna amu galaw ai lam rai nga ai.
13 Ya anhte ka shagun dat ai laika ni hta nanhte hti nna chye na lu na lam ni sha ka dat ga ai.
14 Anhte a Madu Yesu Hkristu bai du sa ai nhtoi hta anhte gaw nanhte a majaw gumrawng lu na ga ai hte maren, nanhte mung anhte a majaw gumrawng lu mu ga, ya e anhte a lam kau chyen sha mi nanhte chye na tawn ti mung, hkum tsup kup hkra chye na wa na hpe ngai myit mada nga nngai.
15 Ndai lam hte hpe myit mu myit hkut ai hte, nanhte lahkawng lang na chyeju lu la myit ga, nanhte kaw shawng sa du na ngu nna nnan e ngai myit yaw shada nngai.
16 Hpa majaw nga yang, Makedoni mung de sa wa let mung, dai kaw nna bai wa ai shaloi mung, nanhte kaw shang nhtawm Yuda mung de sa wa na hkrun lam a matu nanhte kaw na karum ai lam lu la n ga ngu nna ngai myit da se ai. Ref 1:16: 1Ko 16:5-6.
17 Ya ndai zawn yaw shada ai hta ngai gaw myit n grin ai kajam kalam myit rawng ai wa re ai lam madun nga nngai kun? Nye a yaw shada ai lam ni hpe ngai myit daw dan sa wa ai shaloi tinang akyu tam ai maw mawn ai myit hte galaw sa wa nngai kun? Aten langai mi hta sha, ?Rai sa, rai sa,? nga nna mung, ?N rai law, n rai law,? nga nna mung, ga kabra tsun nngai kun?
18 Kaja wa Karai Kasang gaw tengman ai hpe tsun nga ai hte maren, ngai nanhte hpe jaw ai ga sadi mung, ?Re ai,? hte ?N re ai,? kayau ai ga kabra n rai nga ai.
19 Hpa majaw nga yang, nanhte hpe ngai hte Sila yan Timohti hkaw dan sai Karai Kasang a kasha Hkristu Yesu gaw, ?Re ai hte n re ai,? kayau kaya re ai wa n rai. Kaja wa nga yang shi gaw Karai Kasang a myit ra ai lam hpe, ?Re ai,? ngu nna tsun ai Madu rai nga ai.Ref 1:19: Luk 1:35; Kas 9:20; Heb 13:8.
20 Shi gaw Karai Kasang a ga ndat ni yawng a matu ?Re ai? ngu ai mahtai rai nga ai. Dai rai nna anhte gaw Karai Kasang a hpung shingkang dan hkung shangun na matu Yesu Hkristu hta ?Amen? ngu ga ai.
21 Nanhte hte anhte hpe Hkristu hta langai sha tai hkra asak hkrung shangun ai wa gaw Karai Kasang shi nan rai nga ai.
22 Karai Kasang shi nan anhte hpe kaga san di lata la nna, shi a amyu masha ni re ai lam masat dazik dawk shakap da mani ai hte, du na ra ai ten hta anhte hkam la na chyeju nlang a matu hkam dahka galaw ai hku nna anhte a myit masin ni hta dai chyoi pra ai Wenyi ru jaw bang ya mi ai.
23 Korinhtu mare de ngai bai n sa sana ngu nna ngai myit daw dan ai lam gaw nanhte hpe hkyamsa shangun mayu ai majaw re ai lam, nye a myit masin hpe chye ya ai Karai Kasang gaw nye a sakse rai nga sai.
24 Nanhte hpa baw hpe kam sham ra myit dai ngu nna anhte hkang ga ai n rai. Nanhte ngang ngang kang kang dai makam masham hta tsap nga myit dai hpe anhte chye ga ai. Anhte gaw nanhte a ngwi pyaw kabu gara ai lam a matu she nanhte hte rau amu gun hpai nga ga ai.