7
1 Ya nanhte ka dat ai lam hte seng nna tsun htai na nngai. Lasha langai mi gaw numsha langai mi hte hkum shan shada n hkrum kanawn ai nga lu yang gaw grau mai nga ai.
2 Rai ti mung hpye ai amu nau wa law htam nga ai majaw, dai hpe koi gam na matu lasha shagu gaw shi a madu jan lu u ga, numsha shagu mung shi a madu wa lu u ga.
3 Madu wa gaw htung hte maren madu jan hte kanawn u ga, madu jan mung dai hte maren madu wa hte kanawn nna, langai wa gaw langai wa a ra ai lam ni hpe jahkum shatsup ya u ga.
4 Madu jan gaw tinang a hkum hkrang a madu n tai lu ai, dai madu wa she madu nga ai, dai hte maren madu wa mung, tinang a hkum hkrang a madu n tai lu ai, shi a madu jan she madu rai nga ai.
5 Nanhte gaw akyu hpyi na matu, shawng kaw nna jahkring mi aten la na myit hkrum da ai lam sha n nga yang gaw, madu jan madu wa hkum shan kanawn ai lam hpe hkum koi gam nga myit; akyu hpyi ai ten htum ai hpang bai kanawn nga mu. Dai hku rai yang she nanhte n sharang lu ai majaw, Satan e gunglau ai n hkrum na myit dai.
6 Ning ngu nna ngai tsun ai gaw, nanhte hpe jep hkang da nngai n rai, shayawm nna ahkang jaw ai lam sha rai nga ai.
7 Kaja wa nga yang, masha yawng mayawng hte hpe ngai zawn rai shangun mayu nngai; rai ti mung langai hte langai gaw Karai Kasang kaw na tinang a laklai ai chyeju kumhpa lu shajang ma ai; marai langai mi amyu mi, kaga wa amyu mi lu la shajang ma ai.
8 Ya garai n hkungran ai ni hte, gaida jan ni hpe ngai tsun nngai gaw, ngai zawn matut nna nga mat wa yang nanhte a matu grau nna mai kaja na re.
9 Rai ti mung nanhte a myit hpe n sharang lu myit yang gaw hkungran mu ga, hpa majaw nga yang, katu kahtet nga na hta hkungran ai gaw grau kaja nga ai.
10 Hkungran sai ni a matu hkang da ai lam langai mi ngai jaw made ai; dai gaw ngai kaw na n rai, Madu kaw na rai nga ai; Madu wa gaw madu jan hte n hka u ga.Ref 7:10: Mal 2:14,16; Mat 5:32; Mrk 10:11-12; Luk 16:18.
11 Rai ti mung shi hka yang gaw, shi num bai n wa u ga, shing n rai yang mi na madu wa hte htinglu htinglai nna bai kanawn nga u ga; madu wa mung madu jan hpe n jahka kau u ga.
12 Dai Madu hkang da ai ga n rai hkra rai ti mung, kaga masha ni hpe ngai hkang da mayu ai lam gaw: Hkristan la langai mi gaw, n kam n sham ai madu jan lu dam ti mung, dai numsha shi hte rau nga nga mayu a yang gaw, shi hpe n jahka kau u ga.
13 Dai hte maren Hkristan numsha langai mi n kam n sham ai madu wa lu dam ti mung, dai la wa matut nna numsha hte rau nga mayu a yang gaw, dai la wa hpe n jahka kau u ga.
14 Hpa majaw nga yang, n kam n sham ai madu wa gaw, kam sham ai madu jan a jaw e mung, n kam n sham ai madu jan gaw, kam sham ai madu wa a jaw e mung, shachyoi shapra ai hkrum nna Karai Kasang e hkap la ging ai ni tai wa lu ma ai; dai hku n rai yang gaw, nanhte a kashu kasha ni n san n seng ai maigan kashu kasha ni tai na ma ai; ya chyawm gaw, Karai Kasang e hkap la ging ai ni shanhte tai ma ai.
15 Rai ti mung, dai n kam n sham ai madu wa shing n rai, madu jan hka mayu yang hka wa u ga, dai zawn re ai amu hta Hkristan re ai madu wa, shing n rai madu jan gaw n dut n dang galaw na ahkang lu nga ai rai nna, Karai Kasang gaw nanhte hpe ngwi pyaw sim sa ai hte nga lu na shaga da manit dai.
16 Hkristan numsha e, na a madu wa hpe hkye la lu na n re ngu nna hkrak nang kaning rai tsun lu n ta? Dai hte maren Hkristan lasha e, na a madu jan hpe hkye la lu na n re ngu nna hkrak nang kaning rai tsun lu n ta?
17 Masha langai hte langai gaw, shi hpe Karai Kasang garan jaw ai chyeju kumhpa hte maren, Karai Kasang shaga lata la ai ten hta nga ai mabyin masa hte maren matut nna asak hkrung nga u ga. Ndai gaw hpung shagu hpe ngai hkaw tsun sharin shaga ai tara lam rai nga ai.
18 Matu gadoi hkam sai wa langai mi gaw Karai Kasang e shaga lata ai hkrum ai rai yang matu gadoi hkam sai masat kumla ni hpe shaprai kau n ra sai. Matu gadoi n hkam ai sha, Karai Kasang e lata shaga la hkrum ai rai yang, matu gadoi ai n hkam la u ga.
19 Masha langai mi matu gadoi hkam ai, n hkam ai ngu ai gaw hpa lachyum n pru nga ai. Karai Kasang a htet da ai lam hkan nang na chyu sha ahkyak madung rai nga ai.
20 Langai hte langai gaw Karai Kasang e lata shaga la ai ten hta galaw lu galaw sha ai hte maren sha matut galaw nga u ga.
21 Shaga lata la hkrum ai ten hta mayam rai nga ai wa gaw, myit hkum tsang et, rai ti mung mayam kaw na lawt lu na ahkang lu na rai yang gaw, dai ahkaw ahkang hpe la u.
22 Hpa majaw nga yang, mayam rai nga yang dai Madu e shaga la hkrum ai wa gaw, Madu a shanglawt masha rai nga ai; dai hte maren, shanglawt masha langai mi rai nna Madu e shaga lata la hkrum ai wa gaw, Hkristu a mayam rai nga ai.
23 Nanhte hpe Karai Kasang gaw manu jahpu daw nna mari da sai majaw masha a mayam hkum tai myit.
24 Hpu nau ni e, langai hte langai gaw, shaga lata la hkrum ai ten na hte maren Karai Kasang hte kanawn mazum let matut nna asak hkrung nga u ga law.
25 Ya nanhte laika ka nna san dat ai garai n hkungran ai ni hte seng nna dai Madu kaw na htet da ai ga ngai n lu nngai: rai ti mung Karai Kasang a matsan dum ai chyeju majaw kam ging ai wa langai mi rai nga ai hku nna, nye a myit la lu ai lam hpe tsun shana dat nngai.
26 Ya anhte hkrum hkra nga ai myit ru kyin dut hte hpring ai ban prat a majaw, la langai mi gaw shi rai nga ai hte maren nga nga yang grau mai nga ai ngu nna ngai myit lu nngai.
27 Nang gaw dinghku de nna madu jan lu ai wa rai n yang gaw, shi hpe jahka kau na lam hkum tam et. Dinghku n de ai la rai yang gaw, dinghku de na hkum myit et.
28 Rai ti mung nang hkungran nna dinghku shang n yang mung, yubak, mara langai ngai tawt lai ai lam n rai nga ai; mahkawn langai mi hkungran a yang gaw, shi yubak mara galaw tawt lai nu ai n rai. Rai ti mung dinghku de sai ni shani shagu hkrum katut hkam sha nga ai nni nkri ni hte tsan gang shangun mayu ai majaw, ning ngu nna ngai tsun made ai rai nga ai.
29 Bai, hpu nau ni e, ngai ngu mayu ai gaw ndai hku rai nga ai: ahkying ladaw law law n nga sai, ya kaw nna hkungran sai la ni gaw, n hkungran ai la ni zawn nga manu ga.
30 Hkrap ngu hkrap ngoi ai ni gaw n yawn n hkyen ai ni zawn, kabu gara nna mani ai ni gaw, n kabu n gara ai ni zawn, sut rai mari la ai ni gaw, shanhte mari la ai sut rai a madu n re ai ni zawn,
31 mungkan sut gan jai lang ai ni gaw awm dawm madu da nna n jai lang lu ai ni zawn, rai wa manu ga: hpa majaw nga yang, ndai ya mu mada nga ai mungkan ga gaw, nhtoi ladaw na na wa nga nga na n rai sai.
32 Ngai gaw nanhte hta myit ru myit tsang ai lam n nga na hpe ra sharawng nga nngai. Num n la ai wa gaw dai Madu a amu hta myit lawm myit tsang nga ai wa rai nna, Madu a myit ra ai lam galaw mayu nga ai.
33 Rai ti mung num la ai wa chyawm gaw, madu jan ra ai lam byin shangun mayu ai majaw mungkan hte seng ai hpe myit tsang nga ai.
34 Dai re ai majaw shi gaw myit lahkawng gabra nga lu ai. Num n wa ai numsha shing n rai hkawn jet re ai wa gaw Karai Kasang hpe shi a hkum hkrang hte wenyi chyoi pra nga u ga, sak nawng mayu ai rai nna, Madu a amu lam hpe grai myit lawm myit tsang nga ai: rai ti mung num wa sai num gaw, tinang a madu wa a myit ra sharawng ai lam byin shangun mayu ai majaw, mungkan hte seng ai lam hpe myit tsang mat nga ai.
35 Ndai lam ngai tsun nga ai gaw, ngai nanhte hpe karum mayu ai majaw tsun ai re. Nanhte hpe tara hte jum manat da na matu n rai. Nanhte hpe teng man htap htuk nna lam jaw ai hku hkan sa galaw shangun mayu ai hta n ga, Madu a magam hta ngam da ai lam n nga hkra awm dawm ap nawng daw jau shangun mayu ai majaw she ngai ndai lam tsun nga nngai.
36 Mahtan da sai hpang hkungran ai lam n galaw na ngu nna myit daw dan ai yan a lam hte seng nna: la wa gaw num jan a ntsa e tinang galaw ai lam n seng n ang dum ai rai yang mung, shi a myit nau katu nna n sharang lu ai majaw hkungran ai lam galaw ra ai ngu nna sawn nawn ai rai yang mung, shi myit ra ai hte maren shan hkungran ai lam galaw mu ga. Shing rai shi galaw ai gaw hpa yubak mara n rai nga ai.
37 Rai ti mung, lasha gaw tinang dai num n la ai nga na matu myit daw dan nna, tinang a myit hpe mung tsep kawp hkang kau lu nna numsha hte n hkungran ai sha nga yang gaw, kaja ai hku galaw nu ai.
38 Dai rai nna, numsha hte hkungran ai wa gaw kaja ai hku galaw nga ai; rai ti mung dai numsha hpe n la ai sha nga ai wa gaw grau kaja ai galaw nu ai.
39 Hkungran sai num langai mi gaw, shi a madu wa ahkrung nga dingsa shi hte naw makyit nga ai; rai ti mung, madu wa si mat sayang gaw shanglawt lu sai rai nna shi ra ai kadai wa hte rai tim, hkungran lu sai. Rai ti mung, dai hkungran ai lam gaw Hkristan lasha hte rai ra nga ai.
40 Rai ti mung dai numsha gaw dinghku bai n shang ai sha nga lu a yang gaw shi grau pyaw ai hte a lu ai lam rai na ra ai. Ndai gaw nye a myit sawn jeyang jahkrat ai lam rai nga ai; ngai mung Karai Kasang a Wenyi hkam la lu ai, Wenyi rawng ai wa re ai ngu nna myit kam nngai law.