15
1 Hpu nau ni e, ngai nanhte hpe hkaw tsun dan nna nanhte mung hkap la ai hte, dai hta nanhte a makam masham ngang ngang kang kang rai nga sai dai Kabu Gara Shiga a lam ngai nanhte hpe bai shadum mayu made ai. Ref 15:1: Rom 5:2; Gal 1:11.
2 Dai Kabu Gara Shiga gaw ngai nanhte hpe hkaw dan yu sai mungga rai nga ai. Nanhte gaw dai Kabu Gara Shiga hpe ngang ngang kang kang kam sham manoi manat ai rai yang, nanhte hkye hkrang la ai hkrum na rai nga ai. Dai n rai yang nanhte a kam sham ai gaw kaman lila kam sham ai lam sha rai na rai nga ai.
3 Hpa majaw nga yang, ngai hkam la sai ahkyak dik ai lam ni hpe, ngai nanhte hpe ap ya made ai. Dai gaw, Chyum Laika ni hta ka da nga ai hte maren, Hkristu gaw anhte a yubak mara a matu si hkam sai lam,Ref 15:3: 1Ko 11:2,23; Shk 22:15; Dan 9:26; Gal 1:12.
4 lup makoi ai shi hkrum nhtawm, Chyum Laika ni tsun ai hte maren, masum ya nhtoi hta e bai hkrung rawt wa sai lam;Ref 15:4: Shk 16:10; Luk 24:26,46; Kas 2:25-31; 13:33-35.
5 Shi gaw Petru kaw dan pru dan wu ai; dai hpang sape shi lahkawng kaw dan pru dan wu ai.Ref 15:5: Mat 28:17; Mrk 16:14; Luk 24:34-36.
6 Dai hpang lang lata sha shi a hpang hkan nang ai hpu nau manga tsa jan kaw dan pru wu ai. Shanhte hta na malawng maga ya du hkra naw hkrung nga shajang ma ai; nkau mi chyawm gaw yup pyaw mat wa masai.
7 Dai hpang Yaku kaw, dai hpang kasa ni yawng hte kaw, shi dan pru dan mu ai.
8 Hpang jahtum e, ngai nhtoi n-gu ai shangai wa ai ma zawn re ai wa kaw mung, shi shadan dan ni ai. Ref 15:8: Kas 9:4,17; 22:14,18.
9 Hpa majaw nga yang, kasa ni hta kaji htum ai wa ngai rai nga nngai-Karai Kasang a Hpung hpe zingri zingrat nngai majaw, kasa ngu na pyi n ging n dan nngai.Ref 15:9: Kas 8:3; 9:1; Gal 1:13; Ehp 3:8; 1Tm 1:13.
10 Rai ti mung, Karai Kasang a chyeju majaw, ngai gaw ngai wa rai nga nngai; ngai hpe Karai Kasang jaw ai chyeju mung kaman lila n rai nga ai sha, kaga kasa ni yawng hta, ngai grau nna bungli galaw gun hpai shaja nngai. Shing rai galaw lu ai gaw, nye a atsam majaw n rai, ngai hte rau amu galaw nga ai Karai Kasang a chyeju a majaw rai nga ai.
11 Dai rai nna, ngai rai ti mung, kaga kasa ni rai ti mung, ndai mungga hpe sha anhte hkaw tsun ndau ga ai hte, nanhte mung dai Kabu Gara Shiga hpe kam sham manit dai.
12 Ya, Hkristu gaw si mat ai ni kaw na bai hkrung rawt wa sai lam hpe anhte hkaw tsun dan nga yang, si mat wa ai ni a bai hkrung rawt wa ai lam n nga ai, nga nna nanhte hta na nkau mi kaning rai tsun lu nga myit ta?
13 Si mat ai ni bai hkrung rawt wa ai lam n nga ai rai yang gaw, Hkristu mung bai hkrung rawt wa sai n rai.
14 Hkristu gaw si mat ai kaw na bai n hkrung rawt a yang gaw, anhte hkaw dan ai ga gaw kaman lila rai nga ai hte, nanhte a makam masham mung kaman lila sha rai nga ai.
15 Dai hta kaga, Karai Kasang a lam hta masu ai sakse ni anhte tai wa na saga ai; hpa majaw nga yang, Karai Kasang gaw Hkristu hpe hkrung sharawt nu ai, nga nna shi a lam anhte sakse hkam saga ai rai ti mung, si mat ai ni teng teng bai n hkrung rawt ma yang gaw, Karai Kasang shi hpe hkrung sharawt nu ai n rai.
16 Lama wa Karai Kasang gaw si mat ai ni hpe bai n jahkrung sharawt a yang gaw, Hkristu mung bai hkrung rawt wa sai n rai.
17 Hkristu bai n hkrung rawt a yang gaw, nanhte a makam masham kam shut ai lam langai mi rai nga ai hte, nanhte gaw nanhte a yubak hta e naw lup nga dingyang rai nga myit dai.
18 Dai hta kaga Hkristu hpe kam sham nna si mat wa ai ni mung sum mat hkrum sai lachyum rai nga ai.
19 Ndai prat e sha Hkristu hta e myit mada shara lu ga yang gaw, anhte gaw mungkan ntsa na shinggyim masha yawng hta, grau nna matsan mayan hkrum ai ni rai nga ga ai.Ref 15:19: 2Tm 3:12.
20 Rai ti mung, teng teng byin ai lam gaw, Hkristu gaw si mat ai ni kaw na bai hkrung rawt wa sai rai nna, yup pyaw mat wa sai ni bai hkrung rawt wa na mara ai lam pahkam hkam ai lam lu la saga ai.
21 Hpa majaw nga yang, masha langai mi a jaw e si hkrung si htan byin wa ai zawn, masha langai mi a jaw e mung, si mat ai ni a matu bai hkrung rawt wa na lam tai wa sai.
22 Masha yawng mayawng gaw Adam hte langai sha rai nga ma ai majaw si ma ai. Dai hte maren, Hkristu hte langai sha rai nga ma ai majaw, yawng mayawng gaw si ai kaw na Hkristu hta e bai hkrung rawt wa na mara ai.
23 Rai ti mung, langai hte langai tinang ang ai hku hkrung rawt wa na mara ai; Hkristu gaw yawng a shawng e hkrung rawt wa ai, dai hpang Hkristu bai du sa ai shaloi e, shi hte seng ai ni hkrung rawt wa na mara ai.
24 Dai hpang e jahtum ladaw du na ra ai; dai shaloi e Hkristu gaw up madu sha nga ai wenyi minla ni, ahkang aya lu ai ni hte hpung dagu yawng mayawng hte hpe dang kau nna, dai mungdan hpe Kawa Karai Kasang a lata de ap ya na ra ai.
25 Hpa majaw nga yang Hkristu gaw Karai Kasang e gumlau ni yawng mayawng hpe dang kau nna Hkristu a lagaw lahpan npu e tawn da ya ai ten du hkra up hkang nga na rai nga ai.Ref 15:25: Shk 110:1; Kas 2:34,35; Heb 1:13.
26 Hpang jahtum na hpyen wa ngu ai si hkrung si htan gaw yeng seng kau ai hkrum na ra ai.
27 Chyum Laika hta, ?Karai Kasang gaw arai yawng mayawng hte hpe shi a lagaw npu e tawn da nu ai,? nga nna tsun nga ai. ?Arai yawng mayawng,? ngu ai hta Karai Kasang shi hkum dai n lawm ai lam dan leng nga ai. Hpa majaw nga yang, arai yawng mayawng hpe Hkristu a lagaw lahpan npu e tawn da ai Madu gaw Karai Kasang nan rai nga ai.Ref 15:27: Shk 8:6; Mat 28:18; Heb 2:8; 1Pe 3:22.
28 Rai ti mung, yawng mayawng hte hpe Hkristu a up hkang ai npu e tawn da ngut ai shaloi, dai Kasha wa shi hkum nan arai yawng mayawng hpe Kawa Karai Kasang a npu e tawn da na ra ai rai nna, Karai Kasang gaw nga manga hte a ntsa e awm dawm up madu na ra ai.
29 Si mat ai ni a matu mara shanhte a malai hku nna hkalup hkam la ai masha ni a lam gaw gara hku rai ta? Hpa akyu shabyin mayu ai myit mada let galaw ma ta? Nkau mi kam ai hte maren, si mat sai ni bai hkrung rawt ai lam n nga ai teng yang gaw, si mat sai ni a matu ngu nna hpa majaw masha ni hkalup hkam shajang ma ta?
30 Anhte mung hpa majaw hkying hkum shagu hkrit tsang hpa lam hta sak dan nna hkan nga ga ni?Ref 15:30: 2Ko 11:26; Gal 5:11.
31 Hpu nau ni e ngai gaw shani shagu si hkrung si htan hte hkrum kadup nga nngai! Ngai ndai zawn tsun lu ai gaw dai Madu hta nanhte a jaw e ngai kabu gumrawng nga ai majaw re.
32 Lama wa ngai shinggyim masha a maw mawn ai myit hte sha mungkan akyu hpe myit mada let Ehpesu Mare na matse labye dusat ni hte gasat hkat nngai rai yang gaw, nye a matu hpa akyu nga na a ta? Si mat ai ni bai n hkrung rawt wa na rai yang gaw, masha ni tsun ga ai ga, ?Anhte lu ga, sha ga, pyaw pyaw rai nga ga, hpawt ni anhte si na ga ai,? nga ai hte maren sha rai na rai nga ai. Ref 15:32: Kas 17:18.
33 Nanhte lam hkum dam myit, ?N kaja ai kanawn manang ni gaw kaja ai arawn alai hpe jahten ma ai.?
34 Ding man ai hpe hkan na dum hprang mu, matut nna yubak lam hkum galaw myit. Nanhte hta na nkau mi Karai Kasang hpe n chye ma ai: nanhte kaya dum myit ga, ngai ning ngu tsun nngai.
35 ?Si mat ai ni gara hku nna bai hkrung rawt lu na ma ta? Kaning san ai hkum hkrang rai na rai ta?,? nga nna langai ngai san na mara ai.
36 Dai gaw angawk ai wa a ga san sha rai nga ai. Nang gaw ga hta nli tum langai mi hkai dat ai shaloi, dai nli tum shawng nhten mat yang gaw tu hkrung wa lu ai n rai.
37 Nang ga hta hkai dat ai nli tum gaw mam gu shing n rai kaga nli tum lama ma sha rai nga ai. Hpang e bai tu pru wa ai hkum gaw mi nang hkai da ai tum n rai mat sai.
38 Karai Kasang gaw shi myit ra ai hku hte maren, dai nli tum hpe hkum hkrang ningnan jaw da wu ai. Madu gaw, nli tum shagu hpe tinang hte htap htuk ai hkum hkrang jaw shajang mu ai.
39 Asak hkrung nga ai hkum shan nga manga hte gaw, amyu langai sha rai ma ai n rai. Shinggyim masha ni a hkum shan gaw amyu mi, dusat ni a hkum shan gaw amyu mi, u ni a hkum shan gaw amyu mi, nga ni a hkum shan gaw amyu mi rai nga malu ai.
40 Sumsing lamu hte seng ai hkum hkrang ni, ginding aga ntsa na hte seng ai hkum hkrang ni ngu nna, kaga ga nga nga ma ai. Sumsing lamu na hkum hkrang ni hte seng ai hpung shingkang gaw, ginding aga hte seng ai hkum hkrang ni a hpung shingkang hte shai nga ai.
41 Jan mung shi a hpung shingkang shi lu nga ai, shagan ni mung hpung shingkang kaga lu nga ma ai; shagan ni hta sha pyi langai hte langai a htoi kabrim ai lam kaga ga rai nga ai.
42 Si mat ai ni a bai hkrung rawt wa na lam mung, dai hte maren rai nga ai. Dai hkum hkrang gaw ga hta lup makoi ai shaloi, hten mat yat mat chye nga ai; bai hkrung rawt ai shaloi n hten n mat chye ai rai na ra ai.
43 Lup makoi hkrum ai shaloi n tsawm n htap ai hte n-gun n rawng nga ai; hkrung rawt wa ai shaloi, dai gaw tsawm htap ai hte n-gun atsam rawng na ra ai.
44 Lup makoi ai shaloi dinghta hkum hkrang rai nga ai; bai hkrung rawt ai shaloi, wenyi hkum hkrang rai na ra ai. Dinghta hkum nga ai rai yang gaw, wenyi hkum hkrang mung nga na rai nga ai.
45 Chyum laika hta tsun ai hte maren, ?Shawng na masha Adam gaw asak hkrung ai shinggyim masha hku nna hpan da hkrum sai,? rai ti mung, hpang jahtum na Adam chyawm gaw, asak jahkrung ya ai Wenyi rai nga ai.Ref 15:45: Nin 2:7; Yhn 6:33,39-40; Hpl 3:21; Kol 3:4.
46 Wenyi hkum hkrang shawng nga ai n rai, dinghta hkum hkrang shawng nga ai hpang she dai wenyi hte seng ai hkum hkrang bai nga ai.
47 Shawng na masha Adam gaw ga hte hpan da ai rai nna, dinghta ga na rai nga ai; hpang na Adam chyawm gaw sumsing lamu na du sa ai rai nga ai.
48 Dinghta ga hte seng ai masha ni gaw ga yun hte hpan da hkrum ai wa hte bung nga ma ai; sumsing lamu hte seng ai ni gaw, sumsing lamu kaw nna du sa ai masha wa hte bung nga ai.
49 Ga yun hte galaw ai masha wa hte bung ai gawng shingyan hpe anhte gun ga ai hte maren, sumsing lamu na du sa ai Masha wa hte bung ai gawng shingyan mung anhte gun na ra ga ai.
50 Hpu nau ni e, ngai nanhte hpe tsun mayu ai lam gaw, asai yan ashan hte rai nga ai masha gaw, Karai Kasang a mungdan a sali wunli n dagraw la lu ai hte hten mat chye ai gaw n hten n mat chye ai sali wunli hpe madu lu na n rai.
51 Madat mu, makoi magap da ai teng man ai lam langai mi ngai nanhte hpe tsun dan made ga: anhte yawng si mat wa na ga ai n rai.Ref 15:51: Hpl 3:21; 1Ht 4:15-17.
52 Rai ti mung, hpang jahtum na pahtau ngoi ai shaloi e, akajawng sha, myi grip mi laman hta e, anhte yawng hte gaw galai mat wa na ga ai; hpa majaw nga yang, dai pahtau dum dat ai shaloi si mat ai ni gaw n hten n mat ai sha bai hkrung rawt wa na mara ai hte, galoi mung bai si sana n rai. Anhte yawng galai mat wa na ga ai.Ref 15:52: Mat 24:31; 1Ht 4:16.
53 Hpa majaw nga yang, dai hten mat chye ai gaw, n hten n mat chye ai de galai mat na ra ai: ndai si mat chye ai mung, n si n mat chye ai de galai mat lu na rai nga ai.
54 Dai rai nna, ndai hten mat, yat mat chye ai gaw n hten n mat chye ai hpe mung, si mat chye ai gaw n si n mat chye ai hpe mung galai dagraw la ai shaloi, ?Si hkrung si htan gaw padang e kamaw mayu ai hkrum nu ai; si hkrung si htan hpe padang dip ai lam ngut kre sai!,? nga nna Chyum Laika hta tsun da ai ga dik wa na ra ai.Ref 15:54: Esa 25:8; Heb 2:14-15; Shr 20:14.
55 ?Si hkrung si htan e, na a padang ninghkaw kanang nga nga a ta?
Si hkrung si htan e, na a palen kanang nga nga a ta?,? Ref 15:55: Hos 13:14.
56 Si hkrung si htan gaw shi a palen dai yubak mara kaw na lu la wu ai, yubak mara mahtang shi a atsam hpe dai jep ai tara kaw na lu la wu ai.
57 Rai ti mung Madu Yesu a jaw e, anhte hpe awng padang jaw ai Karai Kasang a chyeju chyawm gaw kaba la nga a hka!
58 Dai re ai majaw, ngai tsaw ngai ra ai hpu nau ni e, ngang ngang kang kang dinggrin dingyang tsap nga mu. Madu a bungli gun hpai ai lam gaw galoi mung kaman lila n rai nga ai hpe nanhte dum chye nga let, dai Madu a bungli hta tut nawng e tsam mari shakut sharang gun hpai nga mu law.