1 KORINHTU 1 (JPCL)

KORINHTU NI KAW SHAGUN DAT AI LAIKA LANGAI

(1 CORINTHIANS)

Ga Nhpaw

Kasa Pawlu gaw shi de da ai Korinhtu mare na Hkristan Hpung a asak hkrung lam hte makam masham lam hte seng nna byin nga ai manghkang ni hpe sanglang na matu ndai laika ka dat sai. Dai ten hta Korinhtu mare gaw, Roma mungdan kata na mungdaw kaba langai mi rai nga ai masha baw amyu shagu hkum ai Ahkaia mungdaw a Grik mare daju langai mi rai nga ai.

Dai mare gaw hpaga yumga lam hta grai galu kaba ai mare, htung hking masa hkan sa ai lam hta arawng mala gumrawng nga ai mare, nawku htung amyu myu hkum ai mare ngu nna dan hkung ai mare langai mi rai nga ai. Kasa Pawlu a laika hta grau nna ahkyak madung shatai ai manghkang ni gaw: Hpung hta myit n hkrum nna daw hka bra wa ai lam ni, nse nsa lam hkan nna arawn alai hten za ai lam, num la kanawn mazum ai hte hkungran ai ga san ni, myit masin san seng lam, hpung kata hta hkan sa ra ai lam, Chyoi Pra ai Wenyi a chyeju kumhpa ni hte si ai kaw na bai hkrung rawt wa ai lam re ai ni rai nga ai. Shi gaw, Madu Yesu a lam Kabu Gara Shiga ngu ai mungga hte maren, dai ga san ni langai hte langai hpe grai sung ai hku mu mada chye na hkra tsun htai hparan, matsun madun wu ai.

Karai Kasang a amyu masha ni hpe Karai Kasang jaw ai shaman chyeju ni hta kaba htum ai tsaw ra ai myit a lam tang madun tawn ai Daw Kaba shi masum gaw, ndai laika ting hta masha yawng grau chye dik ai daw rai nga ai.

1 Karai Kasang a myit ra ai hte maren, Hkristu Yesu a Kasa aya hta dang da hkrum ai ngai Pawlu hte anhte a hpu nau wa Sosteni gaw,

2 Korinhtu mare na Karai Kasang a Hpung hta lawm nga ai ni hte, shara shagu hkan na, anhte hte shanhte a Madu rai nga ai Madu Yesu Hkristu hpe nawku daw jau nga ai Hkristu Yesu hta e, Karai Kasang a chyoi pra ai amyu masha tai na matu shaga la hkrum ai ni yawng hpang de ga shana dat ga ai.Ref 1:2: Kas 18:17; Rom 1:7; 10:12.

3 Anhte a Wa Karai Kasang hte Madu Yesu Hkristu kaw na ngwi pyaw ai gaw nanhte hta e anga nga malit ga law.

4 Ngai gaw, nanhte hpe Hkristu Yesu a marang e Karai Kasang nanhte hpe jaw ya ai shaman chyeju ni a matu tut nawng e nye a Karai Kasang hpe chyeju dum shakawn nga nngai. 5 Nanhte gaw Hkristu hte langai sha tai nga myit dai majaw, n-gup atsam hte chye chyang ai lam shagu hta, nanhte shi hta hkum tsup nga manit dai. 6 Anhte hkaw tsun ndau shabra ai dai Hkristu a lam Kabu Gara Shiga gaw nanhte hta e ngang ngang kang kang ru jung nga sai. 7 Dai re ai majaw, anhte a Madu Yesu Hkristu dan pru na ra ai hpe ala nga let nga nga yang, nanhte n hkam sha lu ai shaman chyeju ngu na langai mi pyi n nga ai sha yawng hkum dingnum hkam la lu na myit dai. 8 Anhte a Madu Yesu Hkristu bai du sa nna tara daw dan ai Nhtoi hta, mara shagun shara n nga hkra, shi nanhte hpe shangang shakang na marin dai. 9 Anhte a Madu ngu ai, Kasha Yesu Hkristu hte kanawn mazum lu mu ga, nanhte hpe shaga la ai Karai Kasang chyawm gaw, kangka re ai wa rai nga ai.

10 Hpu nau ni e, anhte a Madu Yesu Hkristu a mying nsang ahkaw ahkang hte nanhte yawng hpe ngai hpyi nem dat nngai. Nanhte hta myit garan nna daw hka bra wa ai lam n nga na matu nanhte tsun shaga ai mung sumtu hta myit hkrum nga mu. Nanhte gaw myit mang ai lam langai sha, yaw shada ai lam langai sha hte tsep kawp myit hkrum kahkyin gumdin nga mu. 11 Hpa majaw nga yang, ngai hpu ngai nau ni e, nanhte shada da ga li ga law rai nga myit dai lam hpe Hkloe a nta na masha nkau mi ngai hpe asan sha sa tsun shana dan mi ai. 12 Ngai ning ngu nna tsun made ga, nanhte hta na masha nkau mi gaw, ?Ngai gaw Pawlu a sape rai nngai; ngai gaw Apolo a sape rai nngai; ngai gaw Petru a sape rai nngai; ngai gaw Hkristu a sape rai nngai,? nga nna nanhte langai hte langai shai ai hku tsun hkat shajang nga myit dai.Ref 1:12: 1Ko 3:4; Kas 18:24; 19:1. 13 Hkristu gaw shai wa bra wa sani? Pawlu gaw nanhte a matu wudang ntsa e si hkam ya sani? Nanhte gaw Pawlu a mying nsang hta hkalup hkam la manit ni?

14 Krispu hte Geu hta lai nna nanhte hta na kadai hpe mung ngai hka lup n jaw nngai majaw, Karai Kasang a chyeju hpe shakawn nngai.Ref 1:14: Kas 18:3; Rom 16:23. 15 Dai re ai majaw, nanhte gaw, nye a mying nsang hte hkalup hkam la ga ai nga nna kadai mung n tsun lu myit dai. 16 (O rai nga ai, Stehpan hte shi a nta masha ni hpe mung, ngai hkalup jaw mase ai; dai hta kaga gaw kadai hpe jaw nngai kun? ngai n dum lu ni ai.) 17 Hpa majaw nga yang, Hkristu ngai hpe shangun dat ai gaw hka lup jaw na matu n rai. Dai Kabu Gara Shiga hkaw tsun dan na matu she, Hkristu gaw ngai hpe shangun dat ni ai: rai ti mung, Hkristu a wudang ntsa e si hkam ai lam a n-gun atsam gaw kaman lila n rai mat u ga, masha a n-gup hpaji atsam hpe n lang ai sha hkaw tsun dan nngai.

18 Hpa majaw nga yang, Hkristu a wudang ntsa e si hkam ai lam ngu ai dai wudang a mung sumtu ga lachyum gaw, asak wenyi sum mat hkrum ai ni a matu, lachyum n pru ai angawk angak ga rai nga ai, rai ti mung, hkye hkrang la hkrum ai anhte a matu gaw, Karai Kasang a atsam rai nga ai. 19 Hpa majaw nga yang, dai Chyum Laika hta,

?Hpaji rawng ai ni a hpaji hpe ngai jahten kau na nngai,

hpaji ninghkrin ni a chye na ai lam hpe ngai yeng seng kau ya na mawe ai,? nga nna ka da nga ai.Ref 1:19: Esa 29:14; Yer 8:9.

20 Dai re ai majaw, hpaji byeng-ya rawng ai wa kanang nga a ta? Laika ka ai sara kanang nga a ta? Ndai mungkan ga na ga tsun shingjawng lu ai ni kanang nga a ta? Karai Kasang gaw ndai mungkan ga a hpaji byeng-ya hpe angawk angak kaman lila shatai kau ya manu ai n rai ni?Ref 1:20: Esa 33:18; 44:25; Rom 1:21.

21 Hpa majaw nga yang, masha gaw tinang a hpaji byeng-ya hte Karai Kasang hpe n chye lu mu ga nga, Karai Kasang gaw shi a hpaji daw ai hte maren galaw lajang da nu ai. Shing rai na malai anhte hkaw dan ai angawk angak mungga ngu ai ga hpe kam sham ai ni hpe hkye hkrang la na matu Karai Kasang gaw myit daw dan da nu ai.Ref 1:21: Mat 11:25; Luk 10:21; Rom 1:20-21,28. 22 Dai hkaw dan ai mungga gaw, Karai Kasang kaw na re ai n re ai sakse mu lu na matu, Yuda ni gaw lamik kumla hpyi ma ai, Heleni ni mahtang gaw hpaji byeng-ya hpe tam ma ai. 23 Anhte chyawm gaw, wudang hta jen da hkrum ai Hkristu a lam hkaw dan ga ai, dai hkaw dan ai mungga gaw Yuda ni a matu grai n rawn hpa hte myit kataw shara, maigan masha ni a man e lachyum n pru ai angawk angak re ai lam rai nga ai. 24 Rai ti mung, Karai Kasang e shaga la hkrum ai Yuda ni hte maigan masha ni a matu mara, shi gaw Karai Kasang a atsam hte Karai Kasang a hpaji byeng-ya ngu ai Hkristu nan rai nga ai. 25 Hpa majaw nga yang, Karai Kasang a angawk angak re ai lam rai nga ai ngu nna myit nawn ai lam gaw, masha a hpaji byeng-ya hta grau hpaji rawng nga ai, Karai Kasang a n-gun kya ai zawn re ai ngu nna myit nawn ai lam mahtang gaw, shinggyim masha a n-gun atsam hta grau ja nga ai.

26 Ya hpu nau ni e, nanhte hpe Karai Kasang e shaga la ai shaloi na lam hpe myit dum aru yu mu; shinggyim myi jut maga hku yu ga nga yang, hpaji byeng-ya rawng ai ni, ahkang aya lu ai ni, du amyu hta na law law wa nanhte hta lawm nga myit dai n rai. 27 Rai ti mung Karai Kasang gaw, dingsang di ai hku nna hpaji byeng-ya rawng ai ni hpe kaya kahpa jahkrum na matu, mungkan e angawk angak re ai ni ngu nna sawn nawn ai ni hpe lata la wu ai; n-gun ja ai ni hpe kaya kahpa jahkrum na matu mungkan ga e n-gun kya ai ni ngu nna sawn nawn ai ni hpe lata la wu ai. 28 Mungkan e ahkyak dik sai, rai la sai ngu ai ni hpe anyawp jahten kau na matu mungkan e hti n mai ai, yu kaji nna matsat kau hkrum ai hte hpa n re ai ngu nna sawn nawn ai ni hpe lata la wu ai. 29 De a lachyum gaw, Karai Kasang a man e kadai mung gumrawng gumtawng n rai lu na matu rai nga ai. 30 Karai Kasang nanhte hpe Hkristu hte langai sha byin tai shangun manit dai rai nna, Karai Kasang gaw Hkristu hpe anhte a hpaji byeng-ya tai wa shangun sai. Shi a marang e Karai Kasang a man e ding hpring wa lu ga ai, Karai Kasang a chyoi pra ai amyu masha ni tai wa lu ga ai hte yubak mara kaw na raw dat ai hkrum lu saga ai.Ref 1:30: Yhn 17:19; Rom 4:25; Ehp 1:7; Hpl 3:9. 31 Dai re ai majaw, Chyum laika hta tsun ai hte maren, ?Kadai rai ti mung, gumrawng gumtawng mayu ai wa gaw, Karai Kasang galaw ai amu bungli a matu sha gumrawng gumtawng nga u ga.Ref 1:31: Yer 9:23-24; 2Ko 10:17.