10
Israela Ni Rehoboam Hpe Gum Lang Ai Lam
1 Ya Rehoboam gaw Shehkem mare de lung wa sai; kaning rai nme law, shi hpe hkawhkam aya dang na nga Israela masha ni yawng, Shehkem mare de du ma ai.
2 Ya Nebat a kasha Yeroboam gaw, hkawhkam Shawlumon a myi man kaw na hprawng mat nna, Egutu mung e nga nga ya yang, dai lam na wu ai shaloi, Egutu mung na bai wa ai.
3 Dai re ai majaw shanhte hte shi hpe shaga nna, Yeroboam hte Israela sha wa ting sa nna Rehoboam hpe,
4 “Na nwa gaw anhte a kandang hpe li wa shangun ya mi ai: dai re majaw, na nwa a yak la ai amu makan hte, anhte e shagun ya ai li la ai kandang hpe, nang shayawm shatsang kau ya mi; shaloi anhte nang hpe daw jau nga na ga ai,” ngu nna tsun mu ai.
5 Shaloi shi gaw, “Masum ya lai jang she ngai hpang de sa marit,” ngu nna shanhte hpe tsun dat mu ai. Masha ni mung wa mat ma ai.
6 Ya hkawhkam Rehoboam gaw, shi kawa Shawlumon a prat e shi a man e tsap nga ai salang ni hte bawng yu nna, “Ndai masha ni hpe htan ya na ga, nanhte ngai hpe hpa lam daw ya na myit ta?” ngu mu ai.
7 Shanhte gaw, “Nang dai masha ni hpe ga ngwi ga sau tsun nna, shanhte hpe myit shapyaw ai hte mai kaja ai ga tsun yang gaw, shanhte prat dingsa na a mayam ni tai na mara ai,” ngu nna shi hpe daw ya mu ai.
8 Shi chyawm gaw salang ni shi hpe hpaji daw ya ai hku kau da nhtawm, shi man e tsap nga nna, shi hte rau kaba wa ai shabrang ni hte bawng yu nna,
9 Ndai masha ni gaw, “Na nwa anhte hpe shagun ya ai kandang hpe tsang shangun ya mi. nga nna ngai hpe hpyi ma ai majaw, shanhte hpe ga htan ya na lam, nanhte gara hku hpaji daw ya nga myit ta?” ngu nna shanhte hpe san mu ai.
10 Shaloi shi hte rau kaba wa ai shabrang ni gaw, “Na nwa anhte a kandang hpe li shangun nga timung, nang dai hpe anhte a matu tsang shangun ya mi, nga nna nang hpe hpyi ma ai masha ni hpe ning ngu u, Nye a yung hkyi gaw, nye wa nshang hte grau kaba nga ai;
11 nye wa gaw nanhte hpe li la ai kandang shagun da timung, ngai nanhte a kandang hta naw jat na we ai; nye wa gaw, nanhte hpe ri lasik hte kayat ai; ngai mahtang nanhte hpe hpri n-gawgawk hte kayat na made ai,” ngu nna tsun u, ngu mu ai.
12 Shing rai hkawhkam wa gaw, Masum ya lai jang she, ngai hpang de sa marit, nga nna hkang da ai hte maren, Yeroboam hte mung masha ni nlang masum ya nhtoi hta e Rehoboam hpang de bai sa ma ai.
13 Hkawhkam wa gaw mung masha ni hpe sheng mareng ga tsun nna, salang ni shi hpe hpaji daw ya ai ga kau da nhtawm,
14 shabrang ni shi hpe hpaji daw ya ai ga hku hkan nna, “Nye wa gaw nanhte a kandang hpe shali timung, ngai dai hta naw jat na we ai; nye wa gaw nanhte hpe ri lasik hte kayat ai, ngai mahtang hpri n-gawgawk hte kayat na made ai,” ngu nna shanhte hpe tsun dat mu ai.
15 Shing rai hkawhkam wa gaw mung masha ni a ga n madat nga ai; dai lam gaw, Yehowa nan, Shilo masha Ahiya n-gup hte Nebat a kasha Yeroboam hpe tsun da ai ga hpe shagrin da na matu, Karai Kasang kaw nan pru ai lam rai nga ai.
16 Hkawhkam wa gaw shanhte a ga n madat nga ai hpe Israela masha ni gaw, “Anhte Dawi hta hpa daw nga ga ta? Yese kasha hta anhte sali n lawm ga ai; Israela e langai hte langai tinang a sum nta ni de bai wa mu; Dawi e na nta hpe ya yu yu u law,” ngu nna hkawhkam wa hpe htan nhtawm, Israela gaw tinang a sum nta ni de bai wa ma ai.
17 Rai timung Yuda mung na mare ni hta nga nga ai Israela masha ni a ntsa e, Rehoboam gaw up nga ai.
18 Shaloi hkawhkam Rehoboam gaw, nchyang amu galaw ai ni a ntsa e up nga ai Hadoram hpe shangun dat wu yang, Israela masha ni gaw shi hpe nlung hte hkap kabai sat kau mu ai. Hkawhkam Rehoboam mung Yerusalem mare de hprawng wa na matu shi a leng hta alawan gat shang wu ai.
19 Shing rai Israela amyu ni gaw, dai ni du hkra Dawi a dap lakung ni hpe gumlau nga ma ai.